କୁବେର ଯନ୍ତ୍ରୀ କାର୍ତ୍ତିକେଶ୍ୱର ରାଉଳଙ୍କ ଦ୍ୱିତୀୟ ପତ୍ନୀ ଗିରଫ । ସହକାରୀ ଯନ୍ତ୍ରୀ କାର୍ତ୍ତିକେଶ୍ୱର ରାଉଳଙ୍କୁ ଭିଜିଲାନ୍ସ ଗିରଫ କରିଥିବା ବେଳେ ଆଜି ତାଙ୍କ ଦ୍ୱିତୀୟ ପତ୍ନୀ କଳ୍ପନା ପ୍ରଧାନଙ୍କୁ ମଧ୍ୟ ଗିରଫ କରିଛି | ସ୍ୱାମୀଙ୍କ ବେଆଇନ ଟଙ୍କା କାରବାରରେ ସ୍ତ୍ରୀଙ୍କ ସମ୍ପୃକ୍ତି ଅଭିଯୋଗରେ ତାଙ୍କୁ ବାନ୍ଧିଛି ଭିଜିଲାନ୍ସ । ଗତକାଲି ତାଙ୍କ ଦ୍ୱିତୀୟ ପତ୍ନୀ କଳ୍ପନାଙ୍କ ଘରୁ ୨ କୋଟିରୁ ଅଧିକ ଟଙ୍କା ଜବତ ହୋଇଥିଲା ।ଭିଜିଲାନ୍ସ ଜେରା ଚାଲିଥିବା ବେଳେ କାର୍ତ୍ତିକେଶ୍ୱରଙ୍କ ଗୁମର ଖୋଲିଥିଲେ ଦ୍ୱିତୀୟ ପତ୍ନୀ କଳ୍ପନା । ତାଙ୍କ ଭଉଣୀ ଘରେ ଟଙ୍କା, ସୁନା ରଖାଯାଇଥିବା କଥା ଖୁଲାସା କରିଥିଲେ କଳ୍ପନା । ଆଜି ସକାଳେ କଳ୍ପନାଙ୍କ ଭଉଣୀଙ୍କ ଭୁବନେଶ୍ୱର ସାଲିଆ ସାହିରେ ଥିବା ଘରୁ ୧କୋଟି ୪୧ ଲକ୍ଷ ୬୨ ହଜାର ୪୦୦ ଟଙ୍କା ଜବତ କରିଛି ଭିଜିଲାନ୍ସ ।
୩ ଦିନ ଚଢ଼ାଉ ଭିତରେ କାର୍ତ୍ତିକେଶ୍ୱର ରାଉଳଙ୍କ ପାଖରୁ ଭିଜିଲାନ୍ସ ମୋଟ ନଗଦ ୩କୋଟି ୪୧ଲକ୍ଷ ୬୭ ହଜାର ୨୮୦ ଟଙ୍କା ଜବତ କଲାଣି | ଯାହାକି ଭିଜିଲାନ୍ସ ଚଢ଼ାଉରେ ଏକ ରେକର୍ଡ ବୋଲି କୁହାଯାଉଛି | ଏହି ସଂପତ୍ତି ତାଙ୍କ ଆୟଠାରୁ ୭ ଗୁଣ ଅଧିକ ବୋଲି କୁହାଯାଉଛି | ଏଥିସହ ତାଙ୍କର ୭ଟି ପ୍ଲଟ ଜବତ କରାଯାଇଛି | କାର୍ତ୍ତିକେଶ୍ୱର ପୋଖରୀପୁଟରେ ମଧ୍ୟ ଦ୍ୱିତୀୟ ପତ୍ନୀଙ୍କ ନାଁରେ ଏକ ୩ ମହଲା ଘର କିଣିଛନ୍ତି । ଏହାକୁ ସେ କେଶରୀ ଇଷ୍ଟେଟ ପ୍ରାଇଭେଟ ଲିମିଟେଡଠାରୁ ନଗଦ ୭୮ ଲକ୍ଷ ୫୦ ହଜାର ଟଙ୍କ ଦେଇ କିଣିଥିବା ଜଣାପଡିଛି ।
