ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା ଅନ୍ତର୍ଗତ ବ୍ୟବସାୟୀକ ପେଣ୍ଠସ୍ଥଳୀ ରାହାମାରୁ ବିପୁଳ ପରିମାଣର ଗଞ୍ଜେଇ ଜବତ ହେବା ସହ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି।ରାହାମା ହାଟ ବଜାରରେ ଥିବା ଭାଙ୍ଗ ଦୋକାନରୁ ୨୮ କିଲୋଗ୍ରାମ ଗଞ୍ଜେଇ ଜବତ କରାଯିବା ସହ ବଇଆ ଓରଫ ବୈକୁଣ୍ଠ ଲେଙ୍କାଙ୍କୁ ତିର୍ତ୍ତୋଲ ପୋଲିସ ଗିରଫ କରିଥିଲା। ବୈକୁଣ୍ଠର ଘର ଓ ବିଭିନ୍ନ ସଂଦିଗ୍ଧ ସ୍ଥାନରେ ପୋଲିସ ଚଢ଼ାଉ କରିଥିଲା। ଅପରାହ୍ନରେ ଗଞ୍ଜେଇ ଚୋରା ବେପାର କରୁଥିବା ଅଭିଯୁକ୍ତ ବୈକୁଣ୍ଠ ଲେଙ୍କାଙ୍କୁ କୋର୍ଟ ଚାଲାଣ କରାଯାଇଛି।ଗତ ସପ୍ତାହକ ମଧ୍ୟରେ ତିର୍ତ୍ତୋଲ ପୋଲିସ ରାହାମା ଓ ଆଖପାଖ ଅଞ୍ଚଳରୁ ବିପୁଳ ପରିମାଣର ମାଦକଦ୍ରବ୍ୟ ଜବତ କରିବାରେ ସଫଳ ହୋଇଛି।ଗତ ୧୨ ତାରିଖରେ ରାହାମା ନିକଟ ଭାଲିଆପାଟଣା ଗ୍ରାମରୁ ତିର୍ତ୍ତୋଲ ପୋଲିସ ୧୫ ଗ୍ରାମ ଓଜନର ବ୍ରାଉନ ସୁଗାର ଜବତ କରିବା ସହ ଚକ ଓରଫ ହୃଷିକେଶ ବେଉରା ଓ ପୁତୁରା ହାପି ବେଉରାକୁ ଗିରଫ କରି କୋର୍ଟ ଚାଲାଣ କରିଥିଲା।ରାହାମା ଅଞ୍ଚଳରୁ ଜଗତସିଂହପୁର ଜିଲ୍ଲାର ତିର୍ତ୍ତୋଲ, କୁଜଙ୍ଗ, ଏରସମା ଓ ବାଲିକୁଦା ବ୍ଲକ ଅଞ୍ଚଳ ସମେତ କେନ୍ଦ୍ରାପଡା ଜିଲ୍ଲାର ବିଭିନ୍ନ ସ୍ଥାନକୁ ଚୋରା ଗଞ୍ଜେଇ ଓ ବ୍ରାଉନ ସୁଗାର ଚୋରା ଚାଲାଣ ହେଉଥିବା ବେଳେ ଦୁଇ ପାଇକାରୀ ଗୋଷ୍ଠୀର ମୁଖ୍ୟ ବୈକୁଣ୍ଠ ଏବଂ ହୃଷିକେଶକୁ ପୋଲିସ ଗିରଫ କରି କୋର୍ଟ ଚାଲାଣ କରିବା ପରେ ଏମାନଙ୍କ ଚୋରା ନେଟୱାର୍କର ଗତିବିଧି କିପରି ରହୁଛି ତାହାହିଁ ଦେଖିବାକୁ ବାକି ରହିଲା।।
#tirtol #NNSODIA
