କେନ୍ଦ୍ରାପଡା ତୁଳସୀ ମହିଳା ମହାବିଦ୍ୟାଳୟରେ ଆଜି ଦେଖାଦେଇଛି ଅଶାନ୍ତି | କଲେଜ ଅଧ୍ୟକ୍ଷଙ୍କୁ ବିଶ୍ବରୂପ ଦେଖାଇଛନ୍ତି ଛାତ୍ରୀ। ଅଧ୍ୟାପକ ନିଯୁକ୍ତି ଦାବିରେ କଲେଜରେ ଆନ୍ଦୋଳନ କରିଥିଲେ ଯୁକ୍ତ ୩ ଶ୍ରେଣୀର ଛାତ୍ରୀ | ଉତ୍ୟକ୍ତ ଛାତ୍ରୀ କଲେଜ ମୁଖ୍ୟ ଗେଟରେ ପକାଇ ଦେଇଥିଲେ ତାଲା | ଫଳରେ କଲେଜର ଅଧ୍ୟକ୍ଷ ଓ ଅନ୍ୟ ଅଧ୍ୟାପକମାନେ କଲେଜ କ୍ୟାମ୍ପସକୁ କରିପାରିନଥିଲେ ପ୍ରବେଶ | କଲେଜ କର୍ତ୍ତୃପକ୍ଷ ବାରମ୍ବାର ବୁଝାଇଥିଲେ ବି ମିଳିନଥିଲା ସୁଫଳ | ଫଳରେ କଲେଜକୁ ଆଜି ସମ୍ପୂର୍ଣ ଠପ୍ କରିଦେଇଥିଲେ ଆନ୍ଦୋଳନରତ ଛାତ୍ରୀ | ନା କଲେଜ ଖୋଲିଥିଲା ନା ହୋଇଥିଲା ପାଠପଢା |
ଛାତ୍ରୀଙ୍କ ଅଭିଯୋଗ ଅନୁଯାୟୀ, ଆସନ୍ତା ୨୬ ତାରିଖରେ ଯୁକ୍ତ ୩ ଶ୍ରେଣୀର ୟୁନିଭରସିଟି ପରୀକ୍ଷା ଆରମ୍ଭ ହେବ | କିନ୍ତୁ କଲେଜରେ କମ୍ପୁଟର ସାଇନ୍ସ ବିଭାଗରେ ନାହାନ୍ତି ଅଧ୍ୟାପକ | ହୋଇପାରୁନି ପାଠପଢା | କିଭଳି ପରୀକ୍ଷା ଦେବେ ସେ ନେଇ ଚିନ୍ତାରେ ପଡିଛନ୍ତି ଛାତ୍ରୀମାନେ । ଅଧ୍ୟକ୍ଷଙ୍କ ନିକଟରେ ଛାତ୍ରୀମାନେ ଏ ନେଇ ଲିଖିତ ଅଭିଯୋଗ କରିଥିଲେ ମଧ୍ୟ ତାହା ସମାଧାନ ହୋଇନାହିଁ | ଫଳରେ ଆଜି କଲେଜରେ ଏହି ଆନ୍ଦୋଳନ କରିବାକୁ ବାଧ୍ୟ ହେଲୁ ବୋଲି କହିଛନ୍ତି ଆନ୍ଦୋଲରତ ଛାତ୍ରୀମାନେ |
