ଛୋଟ, ବଡ଼, ଚର୍ଚ୍ଚିତ ଘଟଣାରେ ପରିପୂର୍ଣ୍ଣ ଥିଲା ‘ବର୍ଷ-୨୦୨୧’ । କିଛି ଖବର ହୁଏତ ଗଣମାଧ୍ୟମର ବ୍ରେକିଙ୍ଗ କାଟେଗୋରୀରେ ନ ଥିଲା, କିନ୍ତୁ ବନିଥିଲା ଚର୍ଚ୍ଚିତ ଘଟଣା । ଯାହାକି ଦେଶବାସୀଙ୍କ ହୃଦୟକୁ ଛୁଇଁ ଯାଇଥିବା ବେଳେ ସଭିଙ୍କ ମନରେ ଛାଡ଼ିଥିଲା ଏକ ସକରାତ୍ମକ ଛାପ । ଯେଉଁଠି ନିଜ ଜୀବନକୁ ବାଜି ଲଗାଇ ରେଲୱେ ଅଧିକାରୀ ଶିଶୁର ଜୀବନ ବଞ୍ଚାଇଥିଲେ ତ ଆଉ କେଉଁଠି ନିଜ ପୁଅର ଜୀବନ ବଞ୍ଚାଇବା ଲାଗି ୪୦୦ କିଲୋମିଟର ଯାତ୍ରା କରିଥିଲା ବାପା । ଆଉ କେଉଁଠି କରୋନା ଭାଇରସ କବଳରେ ରହି ମଧ୍ୟ ଅନ୍ୟ ପାଇଁ ଶଯ୍ୟା ତ୍ୟାଗ କରିବାକୁ ପଛାଇ ନ ଥିଲେ କିଛି ମହାନ ବ୍ୟକ୍ତି । ଏହାକୁ ନେଇ ଆମର ସ୍ୱତନ୍ତ୍ର ରିପୋର୍ଟ ଭୁଲିହୁଏନି ସେ ସ୍ମୃତିର ପୃଷ୍ଠା….
ପୋଡ଼ି ଯାଇଥିବା ନୋଟ ବଦଳରେ RBI ଦେଲା ନୂଆ ନୋଟ …
ଚର୍ଚିତ ଘଟଣା ହେଉଛି ଗୁଜୁରାଟର ସୁରେନ୍ଦ୍ରନଗରର । ଯେଉଁଠି ଜଣେ ଚାଷୀଙ୍କ ପୋଡ଼ି ହୋଇ ଯାଇଥିବା ନୋଟକୁ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ପରିବର୍ତ୍ତନ କରିଥିଲା । ବାସ୍ତବରେ ଘଟଣା ଥିଲା କିଛି ଏପରି । ଏହି ଅଞ୍ଚଳର ଲୁଣ ତିଆରି କରୁଥିବା ଚାଷୀ ବାବୁ ରେଡାନୀଙ୍କ ଘରେ ନିଆଁ ଲାଗିଯାଇଥିଲା । ଏହି ଅଗ୍ନିକାଣ୍ଡରେ ତାଙ୍କ ଘରେ ଥିବା ନୋଟ୍ ଗୁଡ଼ିକ ପୋଡ଼ି ହୋଇଯାଇଥିଲା । ଅଧା ଜଳା ନୋଟ୍କୁ ନେଇ ବ୍ୟସ୍ତବିବ୍ରତ ହୋଇ ବ୍ୟାଙ୍କରେ ପହଞ୍ଚିଥିଲେ ବାବୁ । ଏଠାରେ ଥିବା ଅଧିକାରୀମାନେ ତାଙ୍କୁ ଅହମ୍ମଦାବାଦରେ ଥିବା RBI କାର୍ଯ୍ୟାଳୟକୁ ପଠାଇଥିଲେ । ୨୦୨୧ ଜାନୁଆରୀ ମାସରେ RBI ତାଙ୍କୁ ପୋଡ଼ି ଯାଇଥିବା ନୋଟ୍କୁ ବଦଳାଇ ୬୪୫୦ ନଗଦ ଟଙ୍କା ଦେଇଥିଲା । ଏହାପରେ ମଉଳି ପଡ଼ିଥିବା ବାବୁଙ୍କ ମୁହଁରେ ଫୁଟିଥିଲା ହସ ।
ପୁଅର ଜୀବନ ବଞ୍ଚାଇବା ଲାଗି ୪୦୦ କି.ମି. ସାଇକେଲ ଯାତ୍ରା …
ଝାଡ଼ଖଣ୍ଡର ଗୋଡ୍ଡା ଜିଲ୍ଲାର ପ୍ରତାପପୁର ଗାଁରେ 5 ବର୍ଷ ବୟସ୍କ ବିବେକ ଥାଲାସେମିଆରେ ପୀଡିତ ହୋଇଥିଲେ । ପ୍ରତି ମାସରେ ତାଙ୍କୁ ୨ ୟୁନିଟ୍ ରକ୍ତର ଆବଶ୍ୟକତା ପଡୁଥିଲା । ଫେବ୍ରୁୟାରୀରେ ଲକଡାଉନ ଲାଗୁ ହୋଇଥିବା ବେଳେ ବିବେକଙ୍କ ବାପା ଦିଲ୍ଲୀପ ପରିବାର ସହିତ ଦିଲ୍ଲୀରୁ ଗାଁକୁ ଆସିଥିଲେ । ଏଠାରେ ତାଙ୍କ ପୁଅକୁ ରକ୍ତ ଦେବା ପାଇଁ ଜାମତାଡ଼ା ଯିବାକୁ ପଡୁଥିଲା । କାରଣ ଜାମତାଡ଼ାରେ ୨ ଜଣ ଯୁବକ A ନେଗେଟିଭ ରକ୍ତଦାନ କରୁଥିଲେ । ଏଭଳି ସ୍ଥିତିରେ ଦିଲ୍ଲୀପ ପୁଅ ବିବେକଙ୍କୁ ରକ୍ତ ଦେବା ପାଇଁ ସାଇକେଲରେ 200 କିଲୋମିଟର ଦୂରରେ ଥିବା ଜାମତାଡ଼ାରେ ପହଞ୍ଚିଥିଲେ ଓ ପୁଣି ସାଇକଲେ ଚଲାଇ ଫେରିଥିଲେ ମଧ୍ୟ । ନିଜ ପୁତ୍ରର ଜୀବନ ରକ୍ଷା ପାଇଁ କରୋନା କାଳରେ ସେ ପ୍ରତି ମାସରେ 400 କିଲୋମିଟର ସାଇକେଲ ଚଳାଉଥିଲେ ।
୬୦ ବର୍ଷ ମଧ୍ୟରେ ପ୍ରଥମ ଥର ଲାଗି ନାଗାଲାଣ୍ଡ ବିଧାନସଭାରେ ବାଜିଲା ଜାତୀୟ ସଙ୍ଗୀତ…
୨୦୨୧ରେ ନାଗାଲାଣ୍ଡ ବିଧାନସଭାରେ ମଧ୍ୟ ସୃଷ୍ଟି ହୋଇଥିଲା ଇତିହାସ । ଏଠାରେ ବିଗତ ୬୦ ବର୍ଷ ମଧ୍ୟରେ ପ୍ରଥମ ଥର ପାଇଁ ବାଜିଥିଲା ଜାତୀୟ ସଙ୍ଗୀତ । ୧୯୬୩ ମସିହା ଡିସେମ୍ବର ୧ ତାରିଖରେ ଆସାମରୁ ବିଭାଜିତ ହୋଇ ନାଗାଲାଣ୍ଡ ଏକ ସ୍ବତନ୍ତ୍ର ରାଜ୍ୟର ମାନ୍ୟତା ପାଇଥିଲା । ଏହାପରେ ସେଠାରେ ଥିବା ବିଧାନସଭାରେ ରାଷ୍ଟ୍ରଗାନ ବାଜୁନଥିଲା । କିନ୍ତୁ ୨୦୨୧ ଫେବୃଆରୀ ମାସରେ ନାଗାଲାଣ୍ଡ ବିଧାନସଭାର ବାଚସ୍ପତି ଶାରିଙ୍ଗେନ୍ ଲଙ୍ଗକୁମର ବଜେଟ ଅଧିବେଶନ ଆରମ୍ଭ ହେବା ପୂର୍ବରୁ ରାଜ୍ୟପାଳଙ୍କ ଅଭିଭାଷଣର କିଛି ମୁହୂର୍ତ୍ତ ପୂର୍ବରୁ ‘ଜନ ଗଣ ମନ’ ସଙ୍ଗୀତ ଗାନ କରାଯାଇଥିଲା । ଏଥିଲାଗି ରାଜ୍ୟ ସରକାରଙ୍କଠାରୁ ମଧ୍ୟ ଅନୁମତି ନିଆଯାଇଥିଲା ।
ମହାକାଶକୁ ISRO ପଠାଇଥିଲା ଆମେରିକା ସାଟେଲାଇଟ…
ସାଟେଲାଇଟ 2021 ଫେବୃଆରୀରେ ଭାରତୀୟ ମହାକାଶ ଗବେଷଣା ସଂସ୍ଥା(ISRO) ଶ୍ରୀହାରିକୋଟା ୱର୍କହୋର୍ସ ପୋଲାର ସାଟେଲାଇଟ୍ ଲଞ୍ଚ ଯାନ (PSLV-C51)କୁ ଲଞ୍ଚ କରିଥିଲା । PSLV-C51 ବ୍ରାଜିଲର ଉପଗ୍ରହ ଆମାଜୋନିଆ-1 ସହିତ 18ଟି ଉପଗ୍ରହ ସହିତ ମହାକାଶକୁ ଯାଇଥିଲା । ଏହି ଉତକ୍ଷେପଣ ବିଷୟରେ ବିଶେଷ କଥା ହେଉଛି ଏହି 13ଟି ଉପଗ୍ରହ ଆମେରିକାରୁ ଆସିଥିଲା । ଏହା ସହିତ ଭଗବଦ୍ ଗୀତା ମଧ୍ୟ ମହାକାଶକୁ ପଠାଯାଇଥିଲା ।
କରୋନା ଭାଇରସ କବଳରେ ଥାଇ ମଧ୍ୟ ଅନ୍ୟ ପାଇଁ ଶଯ୍ୟା ତ୍ୟାଗ…
ଲୋକମାନେ ଏପ୍ରିଲରେ କୋରୋନାର କରାଳ ରୂପକୁ ଭୁଲି ପାରିବେ ନାହିଁ । ଏହି ସମୟରେ ବିଭିନ୍ନ ହସ୍ପିଟାଲରେ ଅମ୍ଳଜାନ ଏବଂ ଶଯ୍ୟା ପାଇଁ ଲଢେଇ ଚାଲିଥିଲା । କିଛି ଆତ୍ମୀୟ ସ୍ବଜନ ସଂକ୍ରମଣ ଭୟରେ ହାତ ଛାଡି ଦେଉଥିଲେ । କିନ୍ତୁ କରୋନାରେ ସଂକ୍ରମିତ ହୋଇଥିବା ମହାରାଷ୍ଟ୍ରର ନାରାୟଣ ଭାଓରାଓ ଦାବଦକର (85) ନିଜର ନିସ୍ବାର୍ଥପର ମନୋବୃତ୍ତି ପାଇଁ ଦେଶରେ ପରିଚିତ ହୋଇଥିଲେ । ସେ ମହାରାଷ୍ଟ୍ରର ନାଗପୁରର ଏକ ହସ୍ପିଟାଲରେ ଭର୍ତ୍ତି ହୋଇଥିଲେ । ଏହି ସମୟରେ ଜଣେ ମହିଳା 40 ବର୍ଷର ସ୍ବାମୀଙ୍କ ସହ ଡାକ୍ତରଖାନାରେ ପହଞ୍ଚିଥିଲେ, କିନ୍ତୁ ଶଯ୍ୟା ଖାଲି ନ ଥିବାରୁ ଡାକ୍ତରଖାନା କର୍ତ୍ତୃପକ୍ଷ ତାଙ୍କ ଚିକିତ୍ସା ପାଇଁ ମନା କରିଥିଲେ । ସ୍ବାମୀଙ୍କ ଚିକିତ୍ସା ପାଇଁ ମହିଳା ଜଣଙ୍କ ଡାକ୍ତରଙ୍କ ଆଗରେ ନିବେଦନ କରିବା ଆରମ୍ଭ କରିଥିଲେ । ଏହା ଦେଖି 85 ବର୍ଷୀୟ ନାରାୟଣ ଡାକ୍ତରଖାନା କର୍ତ୍ତୃପକ୍ଷଙ୍କୁ ମହିଳାଙ୍କ ସ୍ବାମୀଙ୍କୁ ତାଙ୍କ ଶଯ୍ୟା ଦେବାକୁ ଅନୁରୋଧ କରିଥିଲେ । ସେ କହିଥିଲେ ଯେ, ‘ମୁଁ ମୋ ଜୀବନକୁ ଜିଇଁ ସାରିଲିଣି । ମୋତେ ବର୍ତ୍ତମାନ 85 ବର୍ଷ । ଏହି ମହିଳାଙ୍କ ସ୍ବାମୀ ଯୁବକ । ସେ ପରିବାରର ଦାୟିତ୍ବ ବହନ କରୁଛନ୍ତି । ତେଣୁ ତାଙ୍କୁ ମୋର ଶଯ୍ୟା ଦିଅନ୍ତୁ ।
ନିଜ ଜୀବନକୁ ବାଜି ଲଗାଇ ଶିଶୁର ଜୀବନ ବଞ୍ଚାଇଥିଲେ ରେଲୱେ ଅଧିକାରୀ…
ଏପ୍ରିଲ ମାସରେ, ମହାରାଷ୍ଟ୍ରର ଭଙ୍ଗାନି ଷ୍ଟେସନରେ ରେଲୱେ ପଏଣ୍ଟମ୍ୟାନ ମୟୂର ସଖାରାମ ଶେଲକେ ଏପରି ସାହସ ଦେଖାଇଥିଲେ, ଯାହାକୁ ଦେଖିଥିଲା ଦେଶ । ଆଉ ଏହି ଘଟଣା ପରେ ତାଙ୍କୁ ବିଭିନ୍ନ କ୍ଷେତ୍ରରୁ ପ୍ରଶଂସାର ସୁଅ ଛୁଟିଥିଲା । ସେ ନିଜ ଜୀବନକୁ ବାଜି ଲଗାଇ 6 ବର୍ଷର ଶିଶୁର ଜୀବନ ରକ୍ଷା କରିଥିଲେ । ଆପଣ ଏଥିରୁ ସଖାରାମାଙ୍କ ସାହସ ସମ୍ପର୍କରେ ଅନୁମାନ ଲଗାଇ ପାରୁଥିବେ । ଯଦି କିଛି ସେକେଣ୍ଡ ବିଳମ୍ବ ହୋଇଥାନ୍ତା,ଏହାପରେ ଶିଶୁଟି ଜୀବନ ହରାଇଥାନ୍ତା । ଏପ୍ରିଲ 17 ତାରିଖରେ ଘଟିଥଲା ଏହି ଘଟଣା । 6 ବର୍ଷର ଶିଶୁ କେନ୍ଦ୍ରୀୟ ରେଳବାଇର ଭଙ୍ଗାନି ଷ୍ଟେସନରେ ତାଙ୍କ ଅନ୍ଧ ମା’ ସହିତ ଯାଉଥିଲେ । ଛୋଟ ପିଲାଟି ପ୍ଲାଟଫର୍ମରୁ ଖସି ପଡି଼ଥିଲା । ଉଦ୍ୟାନ ଏକ୍ସପ୍ରେସ ସମାନ ଟ୍ରାକ୍ରେ ଦ୍ରୁତ ଗତିରେ ଆସୁଥିଲା । ସଖାରାମ ନିଜ ସମ୍ପର୍କରେ ଚିନ୍ତା ନକରି ଉକ୍ତ ଶିଶୁକୁ ରକ୍ଷା କରିଥିଲେ ।
ଶହୀଦ ସ୍ୱାମୀଙ୍କ ପଥ ଅନୁସରଣ କଲେ ପତ୍ନୀ ନିକିତା….
ପୁଲୱାମାର ପିଙ୍ଗଲାନ୍ ଗ୍ରାମରେ ଆତଙ୍କବାଦୀଙ୍କ ସହ ଲଢିବା ବେଳେ ନିକିତା କୌଲଙ୍କ ସ୍ବାମୀ ତଥା ମେଜର ବିଭୂତି ଢୌଣ୍ଡିୟାଲ ଶହୀଦ ହୋଇଥିଲେ । ଲେଫ୍ଟନାଣ୍ଟ ନିତିକା କୌଲ୍ ପ୍ରଥମେ 2019ରେ ଲୋକଲୋଚନକୁ ଆସିଥିଲେ । ବିବାହର 10 ମାସ ପରେ ତାଙ୍କ ସ୍ବାମୀ ଦୁନିଆ ଛାଡି ଚାଲି ଯାଇଥିଲେ । କିନ୍ତୁ ଭାଙ୍ଗି ପଡି଼ନଥିଲେ ନିକିତା । ସେ ମଧ୍ୟ ସେହି ପଥ ବାଛିଲେ ଯେଉଁ ପଥରେ ତାଙ୍କ ସ୍ବାମୀ ଚାଲିଥିଲେ । ନିକିତା ସର୍ଟ ସର୍ଭିସ କମିଶନ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ । ସେପ୍ଟେମ୍ବର 2019ରେ ସେ SSCର ଫର୍ମ ପୂରଣ କରିଥିଲେ । ମେ 2021ରେ ନିତିକା କୌଲ୍ ଚେନ୍ନାଇର ଅଫିସର୍ସ ଟ୍ରେନିଂ ଏକାଡେମୀରୁ ପାସ୍ କରି ଭାରତୀୟ ସେନାରେ ଲେଫ୍ଟନାଣ୍ଟ ହୋଇଥିଲେ ।
ସ୍କ୍ବାର୍ଡର ଏସପି ଙ୍କୁ ନିଆରା ଶ୍ରଦ୍ଧାଞ୍ଜଳି
ହୃଦୟକୁ ଛୁଇଁବା ପରି ଏହି ଘଟଣା ଉତ୍ତରପ୍ରଦେଶର ମୁଜଫରନଗରରୁ ଆସିଥିଲା । ଏଠାରେ ଉତ୍ତରପ୍ରଦେଶ ପୋଲିସ ଡଗ୍ ସ୍କ୍ବାର୍ଡର ସଦସ୍ୟ ଟିଙ୍କିଙ୍କ ମୃତ୍ୟୁ ପରେ ତାଙ୍କର ପ୍ରତିମୂର୍ତ୍ତି ତିଆରି କରାଯାଇଥିଲା । ଏହି ସ୍କ୍ବାର୍ଡରେ ଟିଙ୍କି ASP ପଦବୀରେ ରହିଥିଲେ । ଏଏସପି ଟିଙ୍କି ମୁଜଫରନଗରରେ କାମ କରୁଥିବା ବେଳେ ପ୍ରାୟ ୪୯ଟି ରହସ୍ୟମୟ ଘଟଣାରୁ ପରଦା ଉଠାଇଥିଲେ । ୨୦୨୦ ମସିହାରେ ତାଙ୍କର ମୃତ୍ୟୁ ଘଟିଥିଲା । ଏହି ପ୍ରତିଭାବାନ ପୋଲିସ କର୍ମଚାରୀଙ୍କୁ ମନେ ରଖିବା ପାଇଁ ତାଙ୍କ ସ୍ମୃତିରେ ଏକ ପ୍ରତିମୂର୍ତ୍ତି ନିର୍ମାଣ କରାଯାଇଥିଲା ।
