ସର୍ଟସର୍କିଟରୁ ସର୍ବହରା

ବିଦ୍ୟୁତ ସର୍ଟସର୍କିଟରୁ ଅଗ୍ନିକାଣ୍ଡ । ଆଖି ଆଗରେ ଚାଲିଗଲା ଗୋଟିଏ ପରିବାରର ସର୍ବସ୍ବ । ଜଳିଗଲା ୪ ବଖରା ଘର ଏବଂ ଜଣେ ବ୍ୟକ୍ତି ଗୁରୁତର ଆହତ ହେବା ସହିତ ଜିଅନ୍ତା ଜଳିଗଲେ ଗୃହ ପାଳିତ ଜୀବ । ସାମାନ୍ୟ ସର୍ଟସର୍କିଟରୁ ଘଟିଯାଇଛି ଏଭଳି ଦୁଃଖଦ ଘଟଣା । ଘଟଣାଟି ଜଗତସିଂହପୁର ଜିଲ୍ଲା ଏରସମା ବ୍ଲକ କୃଷ୍ଣଚନ୍ଦ୍ରପୁର ପଞ୍ଚାୟତ ଅନ୍ତର୍ଗତ ଅଟିମଟି ଗ୍ରାମରେ । ଗତକାଲି ବିଳମ୍ବିତ ରାତିରେ ଅଟିମଟି ଗ୍ରାମର ନିମାଇଁ ମଲ୍ଲିକଙ୍କ ଘରେ ସର୍ଟସର୍କିଟରୁ ଅଗ୍ନିକାଣ୍ଡ ହୋଇଥିଲା । ଅଗ୍ନିକାଣ୍ଡରେ ୪ ବଖରା ବାସଗୃହ ସମେତ ଗୁହାଳ ଘର ଜଳିଯାଇଥିଲା । ଅଗ୍ନିକାଣ୍ଡ ଯୋଗୁଁ ୬ଟି ଗୋରୁ,୨୫ଟି ଛେଳି ଓ ୯ଟି କୁକୁଡ଼ା ଜୀବନ୍ତଦଗ୍ଧ ହୋଇ ଯାଇଥିଲେ । ଅଗ୍ନିକାଣ୍ଡ ସମୟରେ ଜୀବନ ବଞ୍ଚାଇ ପରିବାର ଲୋକ ବାହାରି ଆସିବା ବେଳେ ନିମାଇଁ ମଲ୍ଲିକଙ୍କ ପୁଅ ବିକାଶ ମଲ୍ଲିକ ଗୁରୁତର ଆହତ ହୋଇଥିଲେ । ଖବରପାଇ ଏରସମା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିବା ବେଳେ ଆମ୍ବୁଲାନ୍ସ ଯୋଗେ ଗୁରୁତର ବିକାଶଙ୍କୁ ଚିକିତ୍ସା ପାଇଁ ଏରସମା ମେଡିକାଲରେ ଭର୍ତ୍ତି କରାଯାଇଛି । ଖବରପାଇ ଏରସମା ବିଡ଼ିଓ କୈଳାଶ ଚନ୍ଦ୍ର ବେହେରା ଓ ଏରସମା ପଶୁଧନ ଅଧିକାରୀ ଅଗ୍ନିବିପ୍ପନ ପରିବାରକୁ ଭେଟିବା ସହ ଘଟଣାର ଅନୁସନ୍ଧାନ କରିଛନ୍ତି।।

#ShortCircuit #fire #NNSODIA