ନବରଙ୍ଗପୁର ଜିଲ୍ଲା ପୋଡାଲଗୁଡା ଠାରୁ ଡୁଲୁଘାଟି ପର୍ୟ୍ୟନ୍ତ ୩୪ କିଲୋମିଟର ରାସ୍ତା ପୂର୍ତ୍ତ ବିଭାଗ ଦ୍ୱାରା ନିର୍ମାଣ କରାଯାଉଛି। କିନ୍ତୁ ନିର୍ମାଣ ରାସ୍ତାର ପାର୍ଶ୍ଵରେ ଅନେକ ଚାଷୀଙ୍କ ଜମି ଯାଉଛି । ଫଳରେ ଜମି ମାଲିକ ମାନେ ଜମି ହରାଇ ଚିନ୍ତାରେ ରହି ରାସ୍ତା କାମ ଚାଲିଥିବା ବେଳେ କ୍ଷତି ପୂରଣ ଦେବାକୁ ଦାବି କରି ରାସ୍ତା ନିର୍ମାଣ କାର୍ୟ୍ୟ ବନ୍ଦ କରିବାକୁ କହିଛନ୍ତି । ଫଳରେ ରାସ୍ତା କାମ ବନ୍ଦ ରହିଛି ।
ନବରଙ୍ଗପୁର ଜିଲ୍ଲାର ତେନ୍ତୁଳିଖୁଣ୍ଟି ବ୍ଲକ ଅନ୍ତର୍ଗତ ଅମଳାଭଟା ଗ୍ରାମରେ ଦେଖିବାକୁ ମିଳିଛି ଏପରି ଦୃଶ୍ୟ । ଗ୍ରାମର ଅନେକ ଚାଷୀ ନିଜ ଚାଷଜମି ହରାଇ ଚିନ୍ତାରେ ଅଛନ୍ତି । ସେହି ଜମିରେ ସେମାନେ ଚାଷ କରି ପରିବାର ପ୍ରତିପୋଷଣ କରନ୍ତି । କିନ୍ତୁ ଜମି ହରାଇ ପ୍ରଶାସନ ନିକଟରୁ କୌଣସି ପ୍ରକାର ଜମି ବାବଦକୁ ଟଙ୍କା ପାଇ ନାହାଁନ୍ତି । ଦୀର୍ଘ ଦିନ ହେଲା ପ୍ରଶାସନ ନିକଟରେ ଅବଗତ କରାଇଥିଲେ ବି ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ । ଫଳରେ ଜମି ମାଲିକ ମାନେ ମିଶି ନିର୍ମାଣ କାର୍ୟ୍ୟକୁ ବନ୍ଦ କରିବାକୁ ବାଧ୍ୟ ହୋଇଛୁ ବୋଲି କହିଛନ୍ତି ।
୩୫ ସେଣ୍ଟ ରୁ ୭ ଏକର ପର୍ୟ୍ୟନ୍ତ ଜମି ହରାଉଛନ୍ତି କେତେକ ଚାଷୀ । ପଟ୍ଟାଧାରୀ ଜମି ମାଲିକ କ୍ଷତି ପୂରଣ ଦେବାକୁ ଦାବି କରିଛନ୍ତି। ଏମାନଙ୍କ ମଧ୍ୟରୁ ସମସ୍ତେ ଚାଷୀ ହୋଇଥିବାରୁ ସେମାନଙ୍କ ଭରଣପୋଷଣ ଚାଷରେ ହିଁ ହୋଇଥାଏ ବୋଲି ହିତାଧିକାରୀ କହିଛନ୍ତି। ଜମି ପଟ୍ଟାଧାରୀଙ୍କ କହିବା ପ୍ରକାରେ ଆମେ ରାସ୍ତା ନିର୍ମାଣକୁ ବିରୋଧ କରୁ ନାହୁଁ,ହେଲେ କ୍ଷତି ପୂରଣ ପ୍ରଦାନ ନ କରାଯିବା ପର୍ୟ୍ୟନ୍ତ ରାସ୍ତା ନିର୍ମାଣ ବନ୍ଦ କରିବାକୁ କହିଛନ୍ତି। ଅନ୍ୟପଟେ ବିଭାଗୀୟ ଅଧିକାରୀ କହିଛନ୍ତି ଆମେ ଜିଲ୍ଲାପାଳ ଙ୍କୁ ଅବଗତ କରାଇ ଫାଇଲ ପ୍ରୋସେସ କରି ଲୋକଙ୍କ ସମସ୍ୟା କୁ ସମାଧାନ କରିବୁ ।
