ଶେଷରେ ବନ୍ଧା ହେଲେ ଶର୍ମିଷ୍ଠା ରାଉତ । ବହୁ ଚର୍ଚ୍ଚିତ କ୍ୟାମେରା ମ୍ୟାନ୍ ମାନସ ସ୍ୱାଇଁ ହତ୍ୟାକାଣ୍ଡର ମାଷ୍ଟର ମାଇଣ୍ଡ ଶର୍ମିଷ୍ଠା ରାଉତଙ୍କୁ ଗିରଫ କରିଛି ପୋଲିସ । ଭଦ୍ରକ ନଳାଙ୍ଗରୁ ଗିରଫ ହୋଇଛନ୍ତି ଶର୍ମିଷ୍ଠା । ଭଦ୍ରକ ପୋଲିସ ଓ କ୍ରାଇମବ୍ରାଞ୍ଚର ମିଳିତ ସହଯୋଗରେ ‘ସମ୍ପୂର୍ଣ୍ଣ’ ନାମକ ୱେବ ପୋର୍ଟାଲର ମୁଖ୍ୟ ଶର୍ମିଷ୍ଠାଙ୍କୁ କରାଯାଇଛି ଗିରଫ ।
ଶର୍ମିଷ୍ଠାଙ୍କ ସହଯୋଗୀ ଝୁନା ଭୋଇଙ୍କୁ ମଧ୍ୟ ପୋଲିସ ଗିରଫ କରିଛି। ଉଭୟଙ୍କୁ ଆଜି ଚାନ୍ଦବାଲି ଜେଏମଏଫସି କୋର୍ଟରେ ହାଜର କରାଯିବ | ତେବେ ଉଭୟଙ୍କୁ ୧୦ ଦିନିଆ ରିମାଣ୍ଡ ପାଇଁ ଆବେଦନ କରିବ ପୋଲିସ। ଶର୍ମିଷ୍ଠାଙ୍କୁ ପଚରାଉଚରା ପରେ ପୂରା ଘଟଣା ଉପରୁ ହଟିବ ପରଦା । ଏହି ଘଟଣାରେ ପୂର୍ବରୁ ଓଆଇଏସ୍ ନିରଂଜନ ସେଠୀଙ୍କୁ ଗିରଫ କରାଯାଇଛି | ବନ୍ଧା ହୋଇଥିବା ଅନ୍ୟ ୫ ଅଭିଯୁକ୍ତଙ୍କୁ ମଧ୍ୟ ୧୦ ଦିନ ରିମାଣ୍ଡ ପାଇଁ ଆବେଦନ ହେବ ବୋଲି ଜଣାଯାଇଛି ।
ସୂଚନା ଯୋଗ୍ୟ ଯେ, ଗତ ଫେବୃଆରୀ ମାସ ୭ ତାରିଖରେ ମାନସଙ୍କୁ ହତ୍ୟା କରାଯାଇଥିଲା । ଏକ ମେମୋରୀ ଚିପ୍ ପାଇଁ ମାନସଙ୍କୁ ହତ୍ୟା ହୋଇଥିବା ଅଭିଯୋଗ ହୋଇଥିଲା । ଚାନ୍ଦବାଲିରୁ ଅପହରଣ କରି ଭୁବନେଶ୍ୱରରେ ହତ୍ୟା କରାଯାଇଥିଲା । ଭୁବନେଶ୍ୱରରେ ହତ୍ୟା ପରେ ନୟାଗଡ଼ ନୟାଗଡ଼ର ଏକ ପାହାଡ଼ ନିକଟରେ ମାଟି ତଳେ ଶବ ପୋତି ଦିଆଯାଇଥିଲା । ପ୍ରାୟ ମାସକ ପରେ ମାନସଙ୍କ ମୃତଦେହକୁ ଖୋଜି ବାହାର କରିଥିଲା ପୋଲିସ ।
