ପୋଲିସ ନକ୍ସଲଙ୍କ ମଧ୍ୟରେ ହୋଇଛି ଭୀଷଣ ଗୁଳି ବିନିମୟ। ଉଭୟ ପକ୍ଷରୁ ପ୍ରାୟ ଏକ ଘଣ୍ଟା ଧରି ଚାଲିଥିଲା ଗୁଳି ବର୍ଷଣ | ଏଥିରେ ଅନେକ ନକ୍ସଲ ନିହତ ହୋଇଥିବା ସୂଚନା ମିଳିଛି । ଗତକାଲି ରାତିରେ ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ କାଙ୍କେର ଜିଲ୍ଲାର ସୁଦୂର ନକ୍ସଲ ପ୍ରଭାବିତ ତାଡୋକି ଅଞ୍ଚଳରେ ଘଟିଛି ଏହି ଘଟଣା । ଏଥିରେ ଅନେକ ନକ୍ସଲଙ୍କ ମୃତ୍ୟୁ ହୋଇଥିବା ପୋଲିସ ଦାବି କରୁଛି। ଏସପି ଶଲଭ ସିହ୍ନା ମଧ୍ୟ ଏହି ଘଟଣାକୁ ନିଶ୍ଚିତ କରିଛନ୍ତି।
କୋସରୋଣ୍ଡା ଜଙ୍ଗଲରେ ବହୁ ସଂଖ୍ୟାରେ ନକ୍ସଲଙ୍କ ଉପସ୍ଥିତି ସମ୍ପର୍କରେ ପୋଲିସକୁ ମିଳିଥିଲା ସୂଚନା। ଏହା ପରେ ଡିଆରଜି ଏବଂ ଏସଏସବି ବାହିନୀର ଯବାନମାନେ ମିଳିତ ଭାବେ ସର୍ଚ୍ଚ ଅପରେସନ ଚଳାଇଥିଲେ। ରାତି ପ୍ରାୟ ୧ ଟା ବେଳେ ନକ୍ସଲଙ୍କ ସହ ଯବାନମାନେ ମୁହାଁମୁହିଁ ହୋଇଥିଲେ | ଉଭୟ ପାର୍ଶ୍ୱରୁ ଗୁଳି ବିନିମୟ ହୋଇଥିଲା। ପ୍ରାୟ ଏକ ଘଣ୍ଟା ଧରି ଗୁଳି ବିନିମୟ ପରେ ଯବାନମାନେ ଭାରି ପଡିବାରୁ ନକ୍ସଲମାନେ ଜଙ୍ଗଲ ଆଢ଼ୁଆଳରେ ଖସି ପଳାଇଥିଲେ। ଘଞ୍ଚ ଜଙ୍ଗଲ ହେତୁ ରାତିରେ ସର୍ଚ୍ଚ ଅପରେସନ ବିପଜ୍ଜନକ ହୋଇପାରେ ବୋଲି ଯବାନମାନେ ସକାଳେ ଘଟଣାସ୍ଥଳକୁ ଯାଇ ତଲାସି କରିଥିଲେ। ଘଟଣାସ୍ଥଳରେ ରକ୍ତ ଛିଟା ଦାଗ ଥିବା ବେଳେ ଅନେକ ସ୍ଥାନରେ ମୃତଦେହ ଟାଣି ନେବାର ଚିହ୍ନ ମଧ୍ୟ ଦେଖିବାକୁ ମିଳିଛି। ଏହି କାରଣରୁ ଏହି ଏନକାଉଣ୍ଟରରେ ଅନେକ ନକ୍ସଲ ନିପାତ ହୋଇଥିବା ପୋଲିସ ପକ୍ଷରୁ ଅନୁମାନ କରାଯାଉଛି।
