କାଶୀ ବିଶ୍ୱନାଥ କରିଡର ପ୍ରକଳ୍ପ ଉଦଘାଟନ ପୂର୍ବରୁ ଗଙ୍ଗା ନଦୀରେ ବୁଡ ପକାଇଲେ ମୋଦି

ଉତ୍ତରପ୍ରଦେଶ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାରାଣାସୀରେ ଆଜି କାଶୀ ବିଶ୍ୱନାଥ କରିଡର ପ୍ରକଳ୍ପର ଉଦଘାଟନ କରୁଛନ୍ତି। କରିଡର୍‌ ଉଦ୍‌ଘାଟନ କରିବା ପୂର୍ବରୁ ଆଜି ମୋଦୀ ସେଠାରେ ଥିବା ଗଙ୍ଗା ନଦୀରେ ବୁଡ ପକାଇ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ କରିଥିଲେ | ପରେ କାଳଭୈରବ ମନ୍ଦିରକୁ ଯାଇ ପୂଜାର୍ଚ୍ଚନା କରିଛନ୍ତି । ପରେ ମୋଦି ଖିଲାଡିଆ ଘାଟରୁ ଗଙ୍ଗାଜଳ ନେଇ କାଶୀ ବିଶ୍ୱନାଥ ଧାମ ଯାଇଥିଲେ ।
କାଶୀ ବିଶ୍ୱନାଥ କରିଡରକୁ ପିଏମ ମୋଦୀଙ୍କ ଡ୍ରିମ ପ୍ରୋଜେକ୍ଟ କୁହାଯାଉଛି । କାଶୀ ବିଶ୍ୱନାଥ କରିଡର୍‌ର ପ୍ରଥମ ପର୍ଯ୍ୟାୟ ଉଦ୍‌ଘାଟନ ଉପଲକ୍ଷେ ବାରାଣସୀ ଆଜି ଉତ୍ସବମୁଖର ହୋଇଉଠିଛି । ଏହି କରିଡର କାଶୀ ବିଶ୍ୱନାଥ ମନ୍ଦିର ସହ ଗଙ୍ଗା ଘାଟର ସଂଯୋଗ କରିବ । ୯୦୦ କୋଟି ଟଙ୍କାରେ ଏହି ପ୍ରକଳ୍ପରେ ୭୫ ମିଟର ଓସାରର ଚଲାପଥ ନିର୍ମାଣ କରାଯାଇଛି । ଏହି ଅବସରରେ ପ୍ରଧାନମନ୍ତ୍ରୀ ୩୩୯ କୋଟି ଟଙ୍କାରେ ନିର୍ମାଣ ହୋଇଥିବା ୨୩ଟି କୋଠା ଏବଂ ୨୭ ଟି ମନ୍ଦିର ବିଶିଷ୍ଟ ଏହି କରିଡରରର ଉଦଘାଟନ କରିବେ । ମନ୍ଦିରକୁ ବୁଲିବାକୁ ଆସୁଥିବା ତୀର୍ଥଯାତ୍ରୀଙ୍କ ପାଇଁ ଏହି ଏହି କୋଠା ଗୁଡିକ ନିର୍ମାଣ କରାଯାଇଛି । ଏହି କରିଡର ୫୦ ହଜାର ବର୍ଗ ମିଟର ପରିସର ଅନ୍ତର୍ଭୁକ୍ତ ହୋଇଥିବା ବେଳେ ଏହାକୁ ୩ ଭାଗରେ ବିଭକ୍ତ କରାଯାଇଛି । ଏଠାରେ ୪ଟି ବଡ଼ ପ୍ରବେଶ ଦ୍ୱାର ଥିବା ବେଳେ ୨୨ଟି ଶିଳାଲେଖ ନିର୍ମାଣ କରାଯାଇଛି ଯେଉଁଥିରେ କାଶୀଧାମର ମହିମା ଉଲ୍ଲେଖ ଅଛି ।