ନିର୍ବାଚନ ପୂର୍ବରୁ ଦେଖିବାକୁ ମିଳିଛି ନିର୍ବାଚନୀ ହିଂସା | ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ ଅନ୍ତର୍ଗତ ବିରିତୋଳ ପଞ୍ଚାୟତରେ ଘଟିଛି ରାଜନୈତିକ ହିଂସାକାଣ୍ଡ । ବିରୋଧୀଙ୍କ ଭୁଜାଲି ଆକ୍ରମଣରେ ଗୋଟିଏ ପରିବାରର ତିନିଜଣ ଗୁରୁତର ଆହତ ହୋଇଛନ୍ତି | ସମସ୍ତଙ୍କୁ ଚିକିତ୍ସା ପାଇଁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିବା ଜଣାଯାଇଛି | ଆହତମାନେ ହେଲେ ବିରିତୋଳ ଗ୍ରାମର ସଞ୍ଜୟ କୁମାର ସାସମଲ, ତାଙ୍କ ସ୍ତ୍ରୀ ସୀମା ସାସମଲ ଓ ସଞ୍ଜୟଙ୍କ ମାଆ ସୁଲୋଚନା ସାସମଲ ।
ସଞ୍ଜୟ କଂଗ୍ରେସ ଦଳକୁ ସମର୍ଥନ କରୁଥିବାରୁ ବିରୋଧୀଙ୍କ ଇଙ୍ଗିତରେ ତାଙ୍କ ପରିବାର ଉପରେ ମରଣାନ୍ତକ ଆକ୍ରମଣ ହୋଇଥିବା ସେ ଅଭିଯୋଗ କରିଛନ୍ତି। ସଞ୍ଜୟଙ୍କ ଦାଦା ଅଜୟ ସାସମଲ ଓ ତାଙ୍କ ପୁଅ ଅନିରୁଦ୍ଧ ସାସମଲ ବିରୋଧୀ ଦଳ ନେତାଙ୍କ ଇଙ୍ଗିତରେ ଏହି ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି | ସେ ବାପା ପୁଅ ଭୂଜାଲି ଆଦି ମାରଣାସ୍ତ୍ର ଧରି ଘରେ ପଶି ସଞ୍ଜୟ, ତାଙ୍କ ସ୍ତ୍ରୀ ଓ ମାଆଙ୍କୁ ମରଣାନ୍ତକ ଆକ୍ରମଣ କରିଥିଲେ ବୋଲି ସଞ୍ଜୟଙ୍କ ପରିବାର ଲୋକେ ଅଭିଯୋଗ କରିଛନ୍ତି। ପୋଲିସ ଘଟଣାର ଅନୁସନ୍ଧାନ କରୁଛି । ଏହି ନିର୍ବାଚନୀ ହିଂସା ଘଟଣାକୁ ନେଇ ସଂପୃକ୍ତ ପଞ୍ଚାୟତରେ ଚାପା ଉତ୍ତେଜନା ପ୍ରକାଶ ପାଇଛି।।
