ଏବେ ମନୁଷ୍ୟ ମସ୍ତିଷ୍କରେ ଲାଗିବ ମାଇକ୍ରୋ ଚିପ୍ | ପୁରୁଣା ସ୍ମୃତିକୁ ସଂରକ୍ଷଣ କରି ରଖିପାରିବେ କିମ୍ବା ବଦଳାଇ ମଧ୍ୟ ପାରିବେ | ଆପଣ ଏହାକୁ ନୂଆ ଶରୀର କିମ୍ବା ରୋବଟ୍ ବଡିରେ ମଧ୍ୟ ଡାଉନଲୋଡ୍ କରିପାରିବେ | ଏହା କୌଣସି ଚଳଚିତ୍ରର ଡାଇଲଗ ନୁହେଁ | ଏଭଳି ଦାବି କରିଛନ୍ତି ସ୍ପେସ୍ ଏକ୍ସ ଏବଂ ଟେସଲାର ମୁଖ୍ୟ ଏଲୋନ୍ ମସ୍କ |
ମଣିଷ ଉପରେ ମସ୍ତିଷ୍କ-କମ୍ପ୍ୟୁଟର ଇଣ୍ଟରଫେସ୍ ଟେକ୍ନୋଲୋଜି ପରୀକ୍ଷା କରିବାକୁ ଏଲୋନ୍ ମସ୍କ ଆଉ ଏକ ପାଦ ଆଗକୁ ବଢିଛନ୍ତି | ଏଥିପାଇଁ ଏଲୋନ୍ ମସ୍କଙ୍କ ନ୍ୟୁରୋଟେକ୍ ଷ୍ଟାର୍ଟଅପ୍ ନ୍ୟୁରାଲିଙ୍କ୍ ର କ୍ଲିନିକାଲ୍ ଟ୍ରାଏଲ୍ ମଧ୍ୟ ଆରମ୍ଭ ହୋଇଛି । ଅର୍ଥାତ ବ୍ରେନ -ଚିପ୍ ଗବେଷଣାକୁ ପରବର୍ତ୍ତୀ ପର୍ଯ୍ୟାୟକୁ ନେବାକୁ ନ୍ୟୁରାଲିଙ୍କ୍ ପ୍ରସ୍ତୁତ ଅଛି | ଏହା ପୂର୍ବରୁ ନ୍ୟୁରାଲିଙ୍କ୍ ଘୁଷୁରି ଏବଂ ମାଙ୍କଡ଼ ଉପରେ ଏହି ପରୀକ୍ଷା କରିସାରିଛି | ଜଣେ 9 ବର୍ଷର ମାଙ୍କଡ଼ ମସ୍ତିଷ୍କରେ ମଧ୍ୟ ଏକ ଚିପ୍ ଲଗାଯାଇଥିଲା | ଫଳରେ ସେ କେବଳ ନିଜ ମସ୍ତିସ୍କ ସହିତ ଭିଡିଓ ଗେମ୍ ଖେଳିବାରେ ସକ୍ଷମ ହୋଇପାରିଥିଲା |
ଏଲୋନ୍ ମସ୍କ ଏହି ଷ୍ଟାର୍ଟଅପ୍ ଟେକ୍ନୋଲୋଜି ବ୍ୟବହାର କରି ଏକ ମାନବ- AI ସିମ୍ବିଓସିସ୍ ସୃଷ୍ଟି କରିବାକୁ ଚେଷ୍ଟା କରୁଛନ୍ତି | ଗତ ମାସରେ ଏଲୋନ୍ ମସ୍କ କହିଥିଲେ ଯେ, ମଣିଷ ଉପରେ ଏହାର ପ୍ରାରମ୍ଭିକ ପରୀକ୍ଷା 2022 ରେ ଆରମ୍ଭ ହେବ | ଏହି ପରୀକ୍ଷଣରେ ପକ୍ଷାଘାତ ରୋଗୀ, ମାନସିକ ବିକୃତ ରୋଗୀ ଅନ୍ତର୍ଭୁକ୍ତ ହେବାର ସମ୍ଭାବନା ଅଛି | ଏଥିରେ କମ୍ପ୍ୟୁଟର କର୍ସର୍ ଦ୍ୱାରା ସିଧାସଳଖ ସ୍ନାୟୁ ନିୟନ୍ତ୍ରଣ ହାସଲ କରାଯିବାକୁ ପ୍ରୟାସ କରାଯିବ |
ମସ୍କଙ୍କ କହିବା ଅନୁଯାୟୀ, ନ୍ୟୁରାଲିଙ୍କ ଉପକରଣ ଏକ ମୁଦ୍ରାର ଆକାର ସଦୃଶ | ଏହାକୁ ମସ୍ତିଷ୍କର କଙ୍କାଳ କିମ୍ବା ଖପୁରୀରେ ଲଗାଯାଇପାରିବ | ମାନସିକ ବିକୃତି ଏବଂ ରୋଗରେ ପୀଡିତ ଲୋକଙ୍କୁ ଆରୋଗ୍ୟ କରିବା କ୍ଷେତ୍ରରେ ନ୍ୟୁରାଲିଙ୍କ ଟେକ୍ନୋଲୋଜିର ପ୍ରଥମ ବ୍ୟବହାରିକ ପ୍ରୟୋଗ କରାଯିବ | କେବଳ ଗୋଟିଏ ଉପକରଣ ଦ୍ୱାରା ମସ୍ତିଷ୍କ ଏବଂ ମେରୁଦଣ୍ଡର ସମସ୍ୟା ସହଜରେ ସମାଧାନ ହୋଇପାରିବ ବୋଲି ଏଲୋନ୍ ମସ୍କ କହିଛନ୍ତି। ମସ୍କଙ୍କ କହିବା ଅନୁଯାୟୀ, ନ୍ୟୁରାଲିଙ୍କ ବ୍ରେନ ଚିପ ଦକ୍ଷତା ଅସୀମ ଅଟେ।
