ସ୍ଵାଭିମାନ ଅଞ୍ଚଳର ବିକାଶ ପାଇଁ ରାଜ୍ୟ ସରକାର ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା | କାର୍ଯ୍ୟକାରୀ କରିଛନ୍ତି ଅନେକ ଯୋଜନା । ଜନ୍ମରୁ ମୃତ୍ୟୁ ପର୍ଯ୍ୟନ୍ତ ଖଞ୍ଜି ଦେଇଛନ୍ତି ଅନେକ ସୁବିଧା | କିନ୍ତୁ ଏହି ସବୁ ଯୋଜନା କାହା ପାଇଁ ? ବାସ୍ତବରେ କଣ ଗରିବ ହିତାଧିକାରୀ ପାଉଛନ୍ତି ଏହି ଯୋଜନାର ସୁଫଳ | ମାଲକାନଗିର ଭଳି ଉପାନ୍ତ ଅଂଚଳରେ କଣ ଲୋକଙ୍କ ନିକଟରେ ପହଞ୍ଚିପାରୁଛି ଯୋଜନା | ଲୋକଙ୍କ ମନରେ ଏଭଳି ଅନେକ ପ୍ରଶ୍ନବାଚୀ ସୃଷ୍ଟି ହେଉଛି | ଏହାର ସଦ୍ୟ ଉଦାହରଣ ଦେଖିବାକୁ ମିଳିଛି ସ୍ଵାଭିମାନ ଅଞ୍ଚଳର ଜୋଡାଆମ୍ବ ପଞ୍ଚାୟତ ସ୍ଥିତ ଖଜୁରିଗୁଡା ଗ୍ରାମରୁ । ୭ ମାସରୁ ଊର୍ଦ୍ଧ୍ୱ ଜଣେ ଗର୍ଭବତୀ ଆଦିବାସୀ ମହିଳାଙ୍କୁ ମିଳୁନି କୌଣସି ପ୍ରକାର ସରକାରୀ ଯୋଜନା । ଅଙ୍ଗନୱାଡି କେନ୍ଦ୍ରଠାରୁ ଆରମ୍ଭ କରି ସ୍ଥାନୀୟ ସ୍ୱାସ୍ଥ୍ୟ କର୍ମୀ ପର୍ଯ୍ୟନ୍ତ, ସମସ୍ତଙ୍କୁ ଗୁହାରି ପରେ ବି ଆଜି ସୁଦ୍ଧା ତାଙ୍କୁ ମମତା ଯୋଜନାରେ କରାଯାଇନାହିଁ ସାମିଲ । ଏପରିକି ସ୍ୱାସ୍ଥ୍ୟ ବିଭାଗ ପକ୍ଷରୁ ମାଗଣାରେ ଯୋଗାଇ ଦିଆଯାଉଥିବା କ୍ୟାଲସିୟମ ଓ ଆଇରନ ଭଳି ବଟିକା ମଧ୍ୟ ମିଳୁନି ।
ଜୋଡାଆମ୍ବ ପଞ୍ଚାୟତ ସ୍ଥିତ ଖଜୁରିଗୁଡା ଗ୍ରାମର ଜଣେ ଆଦିବାସୀ ମହିଳା ହେଲେ ମୋତି ଖରା | ସେ ଏବେ ୭ ମାସର ଗର୍ଭବତୀ | ଗର୍ଭବତୀଙ୍କ ପାଇଁ ସରକାର ମମତା ଯୋଜନା କାର୍ଯ୍ୟକାରୀ କରିଥିଲେ ମଧ୍ୟ ତାଙ୍କୁ ଏହି ଯୋଜନାରେ ସାମିଲ କରାଯାଇ ନାହିଁ | ଅଙ୍ଗନୱାଡି କର୍ମୀଙ୍କ ମନମୁଖୀ କାର୍ଯ୍ୟ ଯୋଗୁ ଗରିବ ମହିଳାମାନେ ସରକାରୀ ସହାୟତରୁ ବଂଚିତ ହେଉଥିବା ମୋତି ଖରା ଅଭିଯୋଗ କରିଛନ୍ତି । ଗ୍ରାମବାସୀଙ୍କ କହିବା ଅନୁଯାୟୀ, ଖଜୁରିଗୁଡା ଗାଁରେ ଅଙ୍ଗନୱାଡି ଘର ନଥିବା କାରଣରୁ ଆସୁନାହାନ୍ତି କାର୍ଯ୍ୟରତ ଅଙ୍ଗନୱାଡି କର୍ମୀ । ମାସ ମାସ ଅନୁପସ୍ଥିତ ରହୁଛନ୍ତି ଅଙ୍ଗନୱାଡି ଦିଦି । ଅଙ୍ଗନୱାଡି କେନ୍ଦ୍ରକୁ ଆସୁଥିବା ପୁଷ୍ଟିକର ଖାଦ୍ୟ ଛତୁଆ, ଅଣ୍ଡା ଆଦି ପିଲା ଓ ଗର୍ଭବତୀଙ୍କୁ ଦିଆଯାଉନଥିବା ସେମାନେ ଅଭିଯୋଗ କରିଛନ୍ତି |
