ଅନେକ ଲୋକ ଶାଗ ଖାଇବାକୁ ଭଲ ପାଆନ୍ତି ନାହିଁ | କିନ୍ତୁ ଆପଣ ଜାଣିଛନ୍ତି କି ସଜନା ଏପରି ଏକ ଶାଗ, ଯାହା ଆପଣଙ୍କୁ କିଛି ଘାତକ ତଥା ଭୟଙ୍କର ରୋଗରୁ ଦୂରେଇ ରଖିବ । ଯଦି ଆପଣ ସଜନା ଶାଗ ଖାଆନ୍ତି ନାହିଁ, ତେବେ ଆଜି ହିଁ ଆପଣ ଏହାକୁ ଆପଣଙ୍କର ଡାଏଟରେ ସାମିଲ କରନ୍ତୁ | ତେବେ ଆୟୁର୍ବେଦିକ ଔଷଧ ତିଆରି କରିବା ପାଇଁ ସଜନା ପତ୍ର ହଜାର ହଜାର ବର୍ଷ ଧରି ବ୍ୟବହୃତ ହୋଇଆସୁଛି | ଏଥିରେ ଭିଟାମିନ୍, ମିନେରାଲ୍ସ ଏବଂ ଆଣ୍ଟିଅକ୍ସିଡାଣ୍ଟ ଥାଏ, ଯାହା ଆପଣଙ୍କ ସ୍ୱାସ୍ଥ୍ୟ ପାଇଁ ବହୁତ ଉପକାରୀ | ତେବେ କେଉଁ ରୋଗ ପାଇଁ ସଜନା ପତ୍ର ରାମବାଣ ସଦୃଶ ଆସନ୍ତୁ ଜାଣିବା ..
ମଧୁମେହ ରୋଗୀଙ୍କ ପାଇଁ ସଜନା ପତ୍ର ବହୁତ ଉପଯୋଗୀ | ବାସ୍ତବରେ ସଜନା ପତ୍ରରେ ଆଣ୍ଟିଅକ୍ସିଡାଣ୍ଟ ଗୁଣ ଥାଏ | ଯାହା ରକ୍ତ ଶର୍କରାକୁ ନିୟନ୍ତ୍ରଣରେ ରଖିଥାଏ | ତେଣୁ ମଧୁମେହ ରୋଗୀ ତାଙ୍କ ଡାଏଟରେ ସଜନା ପତ୍ର ସାମିଲ କରିବା ନିହାତି ଜରୁରୀ|
ସଜନା ପତ୍ର ଆପଣଙ୍କ ଶରୀରରେ ଖରାପ କୋଲେଷ୍ଟ୍ରଲ୍ ତିଆରି କରେ ନାହିଁ | ଏହି ପତ୍ରରେ ଓମେଗା -3 ଫ୍ୟାଟି ଏସିଡ୍ ଭରପୁର ମାତ୍ରାରେ ଥାଏ | ଯାହା କୋଲେଷ୍ଟ୍ରଲ୍ ସ୍ତରକୁ ହ୍ରାସ କରିବାରେ ସାହାଯ୍ୟ କରେ | ଏହା ହୃଦୟ ସମ୍ବନ୍ଧୀୟ ସମସ୍ୟାକୁ ଦୂର କରିବାରେ ମଧ୍ୟ ସହାୟକ ହୋଇଥାଏ | ସଜନା ପତ୍ରରେ ଅଧିକ ପରିମାଣର ପୋଟାସିୟମ୍ ରହିଛି | ଯାହା ରକ୍ତଚାପ ନିୟନ୍ତ୍ରଣରେ ରଖିବାରେ ମଧ୍ୟ ସାହାଯ୍ୟ କରେ | ତେଣୁ ଯେଉଁମାନଙ୍କର ବିପି ଅଧିକ ରହିଥାଏ, ସେମାନେ ନିଶ୍ଚିତ ଭାବରେ ସଜନା ପତ୍ର ଖାଇବା ଉଚିତ | ସେହିଭଳି ସଜନା ପତ୍ର ଦ୍ୱାରା କର୍କଟ ରୋଗ ହେବାର ଆଶଙ୍କା ମଧ୍ୟ କମ ହୋଇଥାଏ |
ଆପଣଙ୍କୁ କହିରଖୁ ଯେ, ସଜନା ପତ୍ରରେ ଅନେକ ପ୍ରକାରର ଆଣ୍ଟିଅକ୍ସିଡାଣ୍ଟ, ଭିଟାମିନ୍ ସି, ଜିଙ୍କ ଏବଂ ଅନ୍ୟାନ୍ୟ ସକ୍ରିୟ ଉପାଦାନ ମିଳିଥାଏ, ଯାହା କର୍କଟ କୋଷ ଏବଂ ମୁକ୍ତ ରେଡିକାଲର ପ୍ରଭାବକୁ ହ୍ରାସ କରିବାରେ ସହାୟକ ହୋଇଥାଏ | ଏହା ସହିତ, ସଜନା ପତ୍ର ମଧ୍ୟ ରକ୍ତହୀନତା ରୋଗୀଙ୍କ ପାଇଁ ବହୁତ ଉପକାରୀ | ଦୃଷ୍ଟିଶକ୍ତି ବୃଦ୍ଧି ପାଇଁ ମଧ୍ୟ ସଜନା ପତ୍ର ବେଶ ଉପଯୋଗୀ |
