ବିଧାୟକଙ୍କ ଗାଡ଼ିକୁ ଆକ୍ରମଣ | ଲୋଇସିଂହା ବିଜେପି ବିଧାୟକ ମୁକେଶ ମହାଲିଙ୍ଗଙ୍କ ଗାଡିକୁ ହୋଇଛି ଆକ୍ରମଣ । ଗାଡିକୁ ଅଟକାଇ ପି.ଏସ.ଓ ଓ ଡ୍ରାଇଭରଙ୍କୁ ଆକ୍ରମଣ କରିଛନ୍ତି ଦୁଇ ଜଣ ଦୁର୍ବୃତ୍ତ । ବଲାଙ୍ଗିର ଜିଲ୍ଲା ଲୋଇସିଂହା ଥାନା ବୁର୍ଡା ଛକଠାରେ ହୋଇଛି ଏହି ଆକ୍ରମଣ | ପ୍ରତିବାଦ କରିବାରୁ ସେମାନେ ଗାଡି ଡ୍ରାଇଭର ଓ ବିଧାୟକଙ୍କ ପିଏସଓଙ୍କୁ ଆକ୍ରମଣ କରିଥିଲେ । ଫଳରେ ଗାଡି ଚାଳକ ଓ ପିଏସଓ ଆହତ ହୋଇଛନ୍ତି । ଉଭୟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ଆଜି ବିଧାୟକ ମୁକେଶ ମହାଲିଙ୍ଗ ବାଦିବାହାଲ ଗାଁରେ ଏକ କାର୍ଯ୍ୟକ୍ରମ ସାରି ନିଜ ଗାଁ ନଅଗାଁ (ଖ) କୁ ଫେରୁଥିଲେ । ହଠାତ ବଲାଙ୍ଗିର-ସମ୍ୱଲପୁର ଏନ.ଏଚ-୨୬ ର ବୁର୍ଡା ଛକ ଠାରେ ଦୁଇଜଣ ଯୁବକ ବାଇକରେ ଆସି ଗାଡିକୁ ଅଟକାଇ ଗାଡି ସାମ୍ନାରେ ବାଇକ ରଖିଦେଇଥିଲେ । ପି.ଏସ.ଓ ଶଂକର ବରିହା ଏବଂ ଡ୍ରାଇଭର ଦେବରାଜ ନାଗ ବାଇକକୁ ସେଠାରୁ ହଟାଇବା ପାଇଁ କହିଥିଲେ । ପରେ ଦୁଇ ଯୁବକ ଡ୍ରାଇଭର ଏଵଂ ପି.ଏସ.ଓଙ୍କୁ ଆକ୍ରମଣ କରିଥିଲେ । ବିଧାୟକ ଗାଡିରୁ ଓହ୍ଲାଇବା ପରେ ସେମାନେ ଫେରାର ମାରିଥିଲେ । ଗୁରୁତର ଡ୍ରାଇଭର ଏବଂ ପି.ଏସ.ଓଙ୍କୁ ଲୋଇସିଂହା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ଲୋଇସିଂହା ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଆକ୍ରମଣକାରୀ ଦୁଇ ଯୁବକ ଫେରାର ଥିବା ଜଣାପଡିଛି ।
