“ହଁ, ଶିକ୍ଷୟିତ୍ରୀ ମମିତା ମେହେରଙ୍କୁ ମୁଁ ମର୍ଡର କରିଛି। ମୁଁ ହିଁ ମମିତାଙ୍କର ହତ୍ୟାକାରୀ । ” ପୁଲିସ୍ ହେପାଜତରୁ ଖସି ଗତକାଲି ଧରା ପଡ଼ିଥିବା ଗୋବିନ୍ଦ ସାହୁ ଶେଷରେ ମାନିଯାଇଛି ସତ। ଏହା ପୂର୍ବରୁ ପୁଲିସ୍ କବଜାରେ ୪ ଦିନ ରହିଥିବା ଗୋବିନ୍ଦ ପାଟି ଫିଟାଉ ନ ଥିବା ବେଳେ ହଠାତ୍ ସବୁ ସତ ଉଗାଳି ଦେଇଛି। ଫଳରେ ଗତ ୧୨ ଦିନ ଧରି ଶିକ୍ଷୟିତ୍ରୀ ମମିତା ମେହେରଙ୍କ ନିଖୋଜ ମାମଲାକୁ ନେଇ ଚାଲିଥିବା ତଦନ୍ତ କିଛି ସାମ୍ନା କୁ ଆସିଛି। ମମିତା ମିସିଂ ମିଷ୍ଟ୍ରି ଏବେ ମମିତା ମର୍ଡର ମିଷ୍ଟ୍ରିରେ ପରିଣତ ହୋଇଯାଇଛି। ମିଳିଥିବା ସୂଚନା ଅନୁଯାୟୀ, ଜେରା ବେଳେ ପୁଲିସ୍ ନିକଟରେ ଶିକ୍ଷୟିତ୍ରୀ ମମିତା ମେହରଙ୍କୁ ହତ୍ୟା କରିଥିବା କଥା ସ୍ୱୀକାର କରିଛି ଗୋବିନ୍ଦ ସାହୁ। ଯେଉଁ ୱାଗନର କାର୍ରେ ସେ ମମିତାଙ୍କୁ ନେଇ ଯାଇଥିଲା, ସେଥିରେ ହିଁ ତାଙ୍କୁ ହତ୍ୟା କରିଥିଲା ଗୋବିନ୍ଦ। ୮ ତାରିଖରେ ମମିତାଙ୍କୁ ଏହି କାର୍ରେ ନେଇ ଯାଇଥିଲା ଗୋବିନ୍ଦ । କାର୍ ଭିତରେ ମମିତା ଏବଂ ଗୋବିନ୍ଦଙ୍କ ମଧ୍ୟରେ ବଚସା ହୋଇଥିଲା । ବଚସା ସମୟରେ ଉତ୍ତ୍ୟକ୍ତ ଗୋବିନ୍ଦ କାର୍ ଭିତରେ ହିଁ ମମିତାଙ୍କୁ ହତ୍ୟା କରିଥିବା ସତ ଓଗାଳିଛି। କାର୍ର ପଛ ସିଟ୍ ଚିରି ଯାଇଥିବା ଦେଖି ସ୍ପଷ୍ଟ ହେଉଛି ବଞ୍ଚିବା ପାଇଁ ମମିତା ସଂଘର୍ଷ କରିଥାଇପାରନ୍ତି। ହତ୍ୟା କରିବା ପରେ ୮ ତାରିଖ ବିଳମ୍ବିତ ରାତିରେ ମମିତାଙ୍କ ମୃତଦେହକୁ ମହାଲିଙ୍ଗରେ ନିର୍ମାଣାଧୀନ ଷ୍ଟାଡିୟମ ଭିତରେ ପୋତା ଯାଇଥିଲା । ୧୪ ତାରିଖରେ ଉକ୍ତ କାର୍କୁ ଜବତ କରିଥିଲା ପୁଲିସ ଜବତ କାର୍ରୁ ମିଳିଥିଲା ଗୋଟିଏ ପାଉଁଜି ଆଉ ପେଟ୍ରୋଲ ଜାର୍ ।
ଗତକାଲି ମୃତଦେହ ପୋତା ଯାଇଥିବା ସ୍ଥାନରୁ ଆଉ ଏକ ପାଉଁଜି ମିଳିଥିଲା। ମମିତାକୁ ହତ୍ୟା କରିବା ନିମନ୍ତେ ପୂରା ସୁଚିନ୍ତିତ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିଲା ଗୋବିନ୍ଦ। ଏଥିପାଇଁ ୬ ତାରିଖରୁ ଖୋଳାଯାଇଥିଲା ଗାତ। ସୁଚନା ଅନୁସାରେ, ୪ ଦିନ ଧରି ଅଟକ ରହିବା ପରେ ପୁଲିସ୍ ବାରାକ୍ରୁ ଖସି ପଳାଇଥିବା ଗୋବିନ୍ଦ ସାହୁକୁ ଗତକାଲି ବଙ୍ଗୋମୁଣ୍ଡା ବ୍ଲକ୍ ଝରିଆଲ ପଞ୍ଚାୟତ ବୁଢ଼ିପଦର ଗାଁର ଏକ ଆଖୁ ବାଡ଼ିରୁ ଗିରଫ କରିଥିଲା ପୁଲିସ୍। ତାକୁ ଅଧିକ ପଚରାଉଚରା ପାଇଁ ବଲାଙ୍ଗିର ଅଣାଯାଇଥିଲା। ବଲାଙ୍ଗୀର ଏସ୍ପି, ଡିଆଇଜି ଓ ବଛା ବଛା ଅଧିକାରୀ ଘନ ଘନ ପଚରାଉଚରା କରିବା ପରେ ଗୋବିନ୍ଦ ସତ ଉଗାଳିଥିବା କୁହାଯାଉଛି। ଗୋବିନ୍ଦ ସମେତ ତା ସହଯୋଗୀ ରାଧେ, ଜେସିବି ଡ୍ରାଇଭର, ଏବଂ ଷ୍ଟାଡିୟମ ମୁନସିଙ୍କୁ ମଧ୍ୟ ଅଟକ ରଖି ପଚରାଉଚରା କରୁଛି ପୁଲିସ୍। ଗୋବିନ୍ଦଙ୍କୁ ଆଜି ସନ୍ଧ୍ୟା ସୁଦ୍ଧା କୋର୍ଟରେ ହାଜର କରାଯିବ ବୋଲି ସୂଚନା ମିଳିଛି। ଏହାପରେ ପୁଲିସ୍ ଗୋବିନ୍ଦଙ୍କୁ ରିମାଣ୍ଡରେ ଆଣିବାକୁ ଆବେଦନ କରିବ ବୋଲି ଜଣାପଡୁଛି। ତେବେ ମମିତା ମେହେରଙ୍କୁ କାହିଁକି ମାରିଲା ଗୋବିନ୍ଦ ସାହୁ, କ’ଣ ଅଛି ଭିତରି ରହସ୍ୟ । ଗୋବିନ୍ଦଙ୍କ ସ୍କୁଲ୍ରେ ସେକ୍ସ ରାକେଟ୍ ଚାଲିଥିଲା ବୋଲି ଅଭିଯୋଗ ହୋଇଥିଲା। ଶୁଣାଯାଉଛି ସେକ୍ସ ରାକେଟ୍କୁ ମମିତା ବିରୋଧ କରିବା ସହିତ ଗୋବିନ୍ଦଙ୍କୁ କୁଆଡ଼େ ବର୍ବାଦ୍ କରିଦେବେ ବୋଲି ଧମକ ଦେଇଥିଲେ। ସେଥିପାଇଁ ତାଙ୍କୁ ମାରି ଦେଇନି ତ ଗୋବିନ୍ଦ? ଏ ପ୍ରଶ୍ନର ଉତ୍ତର ଏଯାଏଁ ମିଳିନି। ତେବେ ଜଣାପଡ଼ିଛି, ଏ ଘଟଣା ନେଇ ବଲାଙ୍ଗିର ପୋଲିସ ଏକ ସାମ୍ବାଦିକ ସମ୍ମିଳନୀ କରିବ। ଏଥିରେ ସବୁ ତଥ୍ୟ ରଖାଯିବ ବୋଲି କୁହାଯାଉଛି। ବ୍ୟୁରୋ ରିପୋର୍ଟ NNS ODIA ,
