କୁହାଯାଏ ଯେତେବେଳେ ଭଗବାନ ଦିଅନ୍ତି, ଛପର ଫାଡ଼ି ଦିଅନ୍ତି | ଏହାର ଏକ ଜ୍ୱଳନ୍ତ ଉଦାହରଣ କେରଳର ଜଣେ ୬୦ ବର୍ଷ ବୟସ୍କ ଦିନ ମଜୁରୀଆଙ୍କ କ୍ଷେତ୍ରରେ ଦେଖିବାକୁ ମିଳିଛି | ରାତାରାତି ବଦଳିଯାଇଛି ତାଙ୍କ ଭାଗ୍ୟ | ଦିନ ମଜୁରୀଆ ଶ୍ରମିକରୁ ପାଲଟିଯାଇଛନ୍ତି ସୁପର ମଡେଲ | ତାଙ୍କର ଏହି ପରିବର୍ତ୍ତିତ ରୂପ ଦେଖି ସମସ୍ତେ ଆଶ୍ଚର୍ଯ୍ୟ | କେହି ବି ବିଶ୍ୱାସ କରୁନାହାନ୍ତି ଏ ପୂର୍ବରୁ ଥିଲେ ଜଣେ ଶ୍ରମିକ | ପୁରୁଣା ଲୁଙ୍ଗି ଏବଂ ସାର୍ଟ ପିନ୍ଧୁଥିବା ମାମିକ୍କା ଆଜି କାରରେ ବୁଲୁଛନ୍ତି |ତାଙ୍କ ଫଟୋ ଏବଂ ଭିଡିଓ ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି |
କେରଳର କୋଜିକୋଡେରେ ରୁହନ୍ତି ମାମିକ୍କା | ପେସାରେ ସେ ଥିଲେ ଦିନ ମଜୁରିଆ | କିନ୍ତୁ ଜଣେ ଫଟୋଗ୍ରାଫର ଯିଏକି ମାମିକ୍କାଙ୍କ ଭାଗ୍ୟ ବଦଳାଇବାରେ ବେଶ ସହଯୋଗ କରିଥିଲେ | ମାମିକ୍କାଙ୍କ ଚେହେରା ଦେଖିବା ପରେ ସେ ଚିନ୍ତା କଲେ ଯଦି ଏହି ବ୍ୟକ୍ତିଙ୍କୁ ଠିକ୍ ଭାବରେ ସାଜସଜ୍ଜା କରିଦିଆଯାଏ ତେବେ ସେ ଜଣେ ସୁପର ମଡେଲ୍ ଭାବରେ ଉଭା ହୋଇପାରିବେ | ତା ପରଠୁ ମାମିକ୍କାଙ୍କୁ ମଡେଲ ଭାବେ ପ୍ରସ୍ତୁତି ଆରମ୍ଭ ହୋଇଗଲା | ମେକଅପ୍ କରିବା ପରେ ମାମିକ୍କାଙ୍କ ଯେଉଁ ଫଟୋ ଇଣ୍ଟରନେଟରେ ପୋଷ୍ଟ ହୋଇଥିଲା ତାହା ରକେଟ ବେଗରେ ଚାରିଆଡେ ଛାଇଗଲା | ମାମିକ୍କା ରାତାରାତି ପାଲଟିଗଲେ ଷ୍ଟାର |
