ହାସ୍ୟ ଅଭିନେତା କପିଲ ଶର୍ମାଙ୍କ ବାୟୋପିକ୍ ଚଳଚ୍ଚିତ୍ର ନିର୍ମାଣ ହେବାକୁ ଯାଉଛି | ନିର୍ମାତା ମହାବୀର ଜୈନ କମେଡି କିଙ୍ଗ କପିଲ ଶର୍ମାଙ୍କ ଉପରେ ବାୟୋପିକ ଚଳଚ୍ଚିତ୍ର ନିର୍ମାଣ କରିବାକୁ ଘୋଷଣା କରିଛନ୍ତି। ଏହି ଚଳଚ୍ଚିତ୍ରର ନାମ ରହିବ ‘ଫନକାର’ | ଲାୟକା ପ୍ରଡକ୍ସନ୍ସ ଅଧୀନରେ ନିର୍ମିତ ହେବ ଏହି ଚଳଚ୍ଚିତ୍ର | ଚଳଚ୍ଚିତ୍ରର ନିର୍ଦ୍ଦେଶନା ଦେବେ ମୃଗଦୀପ ସିଂ ଲାମ୍ବା। ସେ ଫିଲ୍ମ ‘ଫୁକ୍ରେ’ ର ମଧ୍ୟ ନିର୍ଦ୍ଦେଶନା ଦେଇଛନ୍ତି।
କପିଲ ଶର୍ମା ଭାରତର ଜଣେ ସଫଳ ହାସ୍ୟ ଅଭିନେତା | ତାଙ୍କର କଠିନ ପରିଶ୍ରମ ଏବଂ ପ୍ରତିଭା ଆଧାରରେ ସେ ଫିଲ୍ମ ଇଣ୍ଡଷ୍ଟ୍ରିରେ ଏକ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି | କପିଲ ଆଜି ଯେଉଁ ସ୍ଥାନରେ ପହଂଚିଛନ୍ତି ତାହା କେବଳ ତାଙ୍କର କାମ ପାଇଁ | ଇଣ୍ଡଷ୍ଟ୍ରିରେ ତାଙ୍କର କେହି ଗଡଫାଦର ନଥିଲେ | କପିଲ ଶର୍ମା ତାଙ୍କ କ୍ୟାରିୟରରେ ଅନେକ ସଂଘର୍ଷ ଦେଖିଛନ୍ତି | ତାଙ୍କର ଏହି ଯାତ୍ରା ଅତ୍ୟନ୍ତ ପ୍ରେରଣାଦାୟକ | କପିଲଙ୍କ ଜୀବନରେ ମଧ୍ୟ ଅନେକ ଉତ୍ଥାନ-ପତନ ଘଟିଛି। ଡିପ୍ରେସନ ସମସ୍ୟାଠାରୁ ଆରମ୍ଭ କରି ସୁନୀଲ ଗ୍ରୋଭରଙ୍କ ସହ ଝଗଡା ପର୍ଯ୍ୟନ୍ତ ଅନେକ ବିବାଦକୁ ନେଇ କପିଲ ଚର୍ଚ୍ଚାରେ ରହି ଆସିଛନ୍ତି | ନିକଟରେ ଏକ ସାକ୍ଷାତକାରରେ କପିଲ ଶର୍ମା କହିଥିଲେ ଯେ ସେ ଯାହା ବି ହୋଇପାରିଛନ୍ତି, ତାହା ଅର୍ଚ୍ଚନା ପୁରନ ସିଂଙ୍କ କାରଣରୁ। ତାଙ୍କ କ୍ୟାରିଅରରେ ଆଗକୁ ବଢିବା ପାଇଁ ଅର୍ଚ୍ଚନା ତାଙ୍କୁ ବହୁତ ସାହାଯ୍ୟ କରିଛନ୍ତି | କମେଡିଆନ କପିଲଙ୍କ ପ୍ରଶଂସକମାନେ ତାଙ୍କ ନୂତନ ପ୍ରୋଜେକ୍ଟ ଘୋଷଣାକୁ ନେଇ ସର୍ବଦା ଉତ୍ସାହିତ ଥାନ୍ତି | କପିଲଙ୍କ ତରଫରୁ ପ୍ରଶଂସକମାନଙ୍କ ପାଇଁ ଏକ ଖୁସି ଖବର ଆସୁଛି |
ନିର୍ଦ୍ଦେଶକ ମୃଗଦୀପ ସିଂ ଲାମ୍ବା ଏହି ଚଳଚ୍ଚିତ୍ର ବିଷୟରେ କହିଛନ୍ତି, “ଆମେ ଭାରତର ସବୁଠାରୁ ପ୍ରିୟ କମେଡିଆନ କପିଲ ଶର୍ମାଙ୍କ କାହାଣୀ ଦର୍ଶକଙ୍କ ନିକଟରେ ଉପସ୍ଥାପନ କରିବାକୁ ଯାଉଛୁ । ଦର୍ଶକମାନେ ଏହି କାହାଣୀକୁ ପସନ୍ଦ କରିବେ ବୋଲି ଆଶା କରୁଛି |
