ଆସନ୍ତା ମାସରେ ହେବ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍ 2022) ପାଇଁ ନିଲାମ | ନିଲାମରେ ଅଂଶ ଗ୍ରହଣ କରିବା ପାଇଁ ପଞ୍ଜୀକୃତ ଖେଳାଳିଙ୍କ ସଂଖ୍ୟା ବୋର୍ଡ ଅଫ୍ କ୍ରିକେଟ୍ ଇନ୍ ଇଣ୍ଡିଆ (ବିସିସିଆଇ) ଘୋଷଣା କରିଛି। ଏଥିରେ ମୋଟ 1214 ଖେଳାଳିଙ୍କ ନାମ ପଞ୍ଜିକୃତ ହୋଇଛି | ସେମାନଙ୍କ ମଧ୍ୟରୁ 896 ଭାରତୀୟ ଖେଳାଳି ହୋଇଥିବା ବେଳେ 318 ବିଦେଶୀ ଖେଳାଳିଙ୍କ ନାମ ପଞ୍ଜୀକୃତ ହୋଇଛି | ତେବେ ଏହି ନିଲାମର 217 ଖେଳାଳି ଅଂଶ ଗ୍ରହଣ କରିପାରିବେ ବୋଲି ବିସିସିଆଇ ପକ୍ଷରୁ କୁହାଯାଇଛି | ଏଥିମଧ୍ୟରୁ ଅନେକ ପ୍ରସିଦ୍ଧ ଖେଳାଳି ସେମାନଙ୍କ ନାମ ପଞ୍ଜୀକୃତ କରିଥିବା ବେଳେ ଅନେକ ଆଇପିଏଲ୍ ରୁ ଓହରି ଯାଇଥିବା ଜଣାପଡିଛି |
ରିପୋର୍ଟ ଅନୁଯାୟୀ, ମେଗା ନିଲାମ ପାଇଁ 2 କୋଟିର ବେସ ପ୍ରାଇସ ତାଲିକାରେ 49 ଖେଳାଳି ଅଛନ୍ତି | ଏହି ତାଲିକାରେ 17 ଜଣ ଭାରତୀୟ ଥିବାବେଳେ 32 ଜଣ ବିଦେଶୀ ଖେଳାଳି ଅଛନ୍ତି | ଭାରତୀୟ ଖେଳାଳି ରବିଚନ୍ଦ୍ରନ ଅଶ୍ୱିନ୍, ପୂର୍ବତନ ୱିଣ୍ଡିଜ୍ ଅଲରାଉଣ୍ଡର ଡ୍ୱେନ୍ ବ୍ରାଭୋ ତାଙ୍କର ବେଶ ପ୍ରାଇସ 2 କୋଟି ଟଙ୍କା ରଖିଛନ୍ତି। ସେହିଭଳି କଙ୍ଗାରୁ ମିଚେଲ ମାର୍ଶ, ଶ୍ରେୟାସ ଆୟର, ଶିଖର ଧୱନ, ଇଶାନ କିଶନ, ସୁରେଶ ରାଇନା ମଧ୍ୟ ସେମାନଙ୍କର ବେଶ ପ୍ରାଇସକୁ 2 କୋଟି ଟଙ୍କା ରଖିଛନ୍ତି।
ଏଥିସହିତ, ଅନ୍ୟ ଖେଳାଳିଙ୍କ ମଧ୍ୟରେ ଅଷ୍ଟ୍ରେଲିଆର ପ୍ୟାଟ୍ କମିନ୍ସ,, ସାକିବ-ଅଲ-ହାସନ, ଟ୍ରେଣ୍ଟ ବୋଲ୍ଡ,, ଷ୍ଟିଭ ସ୍ମିଥ, କ୍ୱିଣ୍ଟନ ଡି କକ ଏବଂ କୋଗିସୋ ରବାଡା ପଞ୍ଜୀକରଣରେ ସେମାନଙ୍କର ବେସ ପ୍ରାଇସ 2 କୋଟି ଟଙ୍କା ରଖିଛନ୍ତି।
ସେହିଭଳି 1 କୋଟି ବେସ୍ ପ୍ରାଇସ ତାଲିକାରେ ଅଛନ୍ତି ପୀୟୁଷ ଚାୱଲା, କେଦାର ଯାଦବ,ପ୍ରସିଦ୍ଧ କୃଷ୍ଣ, ଟି। ନଟରାଜନ୍, ମନୀଷ ପାଣ୍ଡେ, ଅଜିଙ୍କ୍ୟ ରାହାନେ, ନୀତୀଶ ରାଣା,
ସେହିଭଳି ୱେଷ୍ଟଇଣ୍ଡିଜ୍ ର ମହାନ ଖେଳାଳି କ୍ରିସ୍ ଗେଲ୍, ଅଷ୍ରେଲିଆର ବାମ ପେସର୍ ମିଚେଲ୍ ଷ୍ଟାର୍କ ଏବଂ ଇଂଲଣ୍ଡର ଅଲରାଉଣ୍ଡର ବେନ୍ ଷ୍ଟୋକ୍ସ ନିଲାମରେ ଅଂଶ ଗ୍ରହଣ କରିବା ପାଇଁ ସେମାନଙ୍କ ନାମ ପଞ୍ଜିକରଣ କରିନାହାଁନ୍ତି।
