ଆପଣ ପୋଷା ବିଲେଇ, ପୋଷା କୁକୁର କଥା ଶୁଣିଛନ୍ତି | କିଏ କିଏ ଅନ୍ୟ ପଶୁପକ୍ଷୀଙ୍କୁ ମଧ୍ୟ ପୋଷା ବନାଇ ଘରେ ରଖିଥାନ୍ତି | କିନ୍ତୁ ଜଙ୍ଗଲ ରାଜା ବାଘକୁ ପୋଷା ବନାଇବା କଥା କେବେ ଶୁଣିଛନ୍ତି | ନାହିଁ ନାଁ, ବାଘକୁ ପୋଷା ବନାଇବା ତ ଦୂରର କଥା ଆମେ ବାଘକୁ ଦେଖିଲେ ଡରରେ ଛାନିଆ ହୋଇଯାଉ | ଆମେ ବାଘକୁ ପାଖରୁ ଦେଖିଛେ ସତ କିନ୍ତୁ ଚିଡିଆଖାନାରେ କିମ୍ବା ଟିଭି ପରଦାରେ | କିନ୍ତୁ ଆଜି ଆମେ ଆପଣଙ୍କୁ ଏମିତି ଏକ ଭିଡ଼ିଓ ଦେଖେଇବୁ ଆପଣ ଆଶ୍ଚର୍ଯ୍ୟ ନ ହୋଇକି ରହିପାରିବେନି | ଭିଡିଓରେ ଗୋଟେ ଜଙ୍ଗଲୀ ହିଂସ୍ର ବାଘ ଜଣେ ବ୍ୟକ୍ତିଙ୍କ ଉପରେ ଝାମ୍ପ ମାରୁଛି | ବାଘଟି ଆକ୍ରମଣ ପାଇଁ ଏଭଳି ଝାମ୍ପ ମାରୁନି ବରଂ ସେ ବ୍ୟକ୍ତିଙ୍କ ସହ ଗେଲ୍ହା ହେଉଥିବା ଦେଖିବାକୁ ମିଳୁଛି | ଏହି ଭିଡିଓରେ ଦୁଇ ଜଣ ପରସ୍ପର ସହ ଖେଳୁ ଥିବା ନଜର ଆସୁଛି | ତେବେ ଏହି ଭିଡିଓଟି ଇଣ୍ଡୋନେସିଆର ଏବଂ ଏହି ବ୍ୟକ୍ତିଙ୍କ ନାମ ହେଲା ଅବଦୁଲ୍ଲା | ଗତ 4 ବର୍ଷ ହେଲା ଜଙ୍ଗଲୀ ବାଘଟି ପ୍ରତିଦିନ ଅବଦୁଲ୍ଲାଙ୍କ ଘର ପାଖକୁ ଆସି ତାଙ୍କ ସହ ଖେଳିଥାଏ | କିନ୍ତୁ ଅବଦୁଲ୍ଲାଙ୍କୁ କୌଣସି କ୍ଷତି ପହଞ୍ଚାଇ ନଥାଏ | ବାଘଟି କିଛି ସମୟ ଅବଦୁଲ୍ଲାଙ୍କ ସହ ଖେଳିବା ପରେ ପୁଣି ଜଙ୍ଗଲକୁ ଚାଲିଯାଇଥାଏ | ଅବଦୁଲ୍ଲା ଏବଂ ଜଙ୍ଗଲୀ ବାଘର ବନ୍ଧୁତ୍ୱ ସମ୍ପର୍କରେ ସମଗ୍ର ଇଣ୍ଡୋନେସିଆବାସୀ ଜାଣିଛନ୍ତି | ଏହି ଭିଡ଼ିଓଟି ବେଶ ଭାଇରାଲ ହେବାରେ ଲାଗିଛି |
