କେନ୍ଦ୍ରାପଡାରେ ପୁଣି ଫୁଟିଲା ଗୁଳି | ମହାକାଳପଡା ମଦ କାଉଣ୍ଟର ନିକଟରେ ଥିବା ଏକ ହୋଟେଲ ପାଖରେ ଘଟିଛି ଏହି ଗୁଳିକାଣ୍ଡ । ଆଜି ଅପରାହ୍ନରେ ଦୁଇଟି ବାଇକରେ ୬ ଜଣ ଦୁର୍ବୃତ୍ତ ଆସି ଜଣେ ଯୁବକଙ୍କୁ ଗୁଳିମାଡ କରି ଫେରାର ହୋଇଯାଇଛନ୍ତି । ଗୁଳିମାଡରେ ମହାକାଳପଡା ବ୍ଲକ ବଜରଙ୍ଗ ଦଳର ସହ ସଂଯୋଜକ ଲକ୍ଷ୍ମଣ ମଲ୍ଲିକ ଗୁରୁତର ଆହତ ହୋଇଛନ୍ତି । ତାଙ୍କ ଡାହାଣ ଗୋଡରେ ଗୁଳି ବାଜିଛି | ବେଆଇନ ଗୋରୁ ଚାଲାଣ ରୋକିବା ଘଟଣାକୁ ନେଇ ଏହି ଗୁଳିକାଣ୍ଡ ହୋଇଥିବା କୁହାଯାଉଛି |
ଆଜି ବଜରଙ୍ଗ ଦଳର ସାଥିମାନେ ଏକ ପାରିବାରିକ କଳହର ସମାଧାନ କରିବାକୁ ବାରଡାଙ୍ଗ ଗାଁକୁ ଯାଇଥିଲେ । ସେଠାରୁ ଫେରି ମହାକାଳପଡା ମଦ କାଉଣ୍ଟର ନିକଟରେ ଥିବା ହୋଟେଲରେ ଖାଇବା ପାଇଁ ଅଟକି ଥିଲେ । ଲକ୍ଷ୍ମଣ ହାତ ଧୋଇବାକୁ ବାହାରକୁ ଆସିଥିବା ବେଳେ ଦୁର୍ବୃତ୍ତମାନେ ହଠାତ ତାଙ୍କ ଉପରକୁ ଗୁଳି ଚାଳନା କରିଥିଲେ । ୨ ରାଉଣ୍ଡ ଗୁଳି ଫୁଟିଥିବା ବେଳେ ଲକ୍ଷ୍ମଣଙ୍କ ଗୋଡରେ ଗୋଟିଏ ରାଉଣ୍ଡ ଗୁଳି ବାଜିଛି । ତାଙ୍କୁ କଟକ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି | ଏହି ଘଟଣାକୁ ନେଇ କେନ୍ଦ୍ରାପଡା ସହରରେ ଚାପା ଉତ୍ତେଜନା ଦେଖାଦେଇଛି । ପୋଲିସ ଘଟଣାର ତଦନ୍ତ କରୁଛି |
