ବିଶୁଦ୍ଧ ନୁହେଁ , ଦୂଷିତ ପାଣିରେ ଗାଁ ଲୋକଙ୍କ ଜୀବନ ।
ଗାଁ ଲୋକଙ୍କ ପାଇଁ ବିଶୁଦ୍ଧ ଆଉ ମଧୁର ଜଳ ମୁନ୍ଦାଏ ମିଳୁନାହିଁ , ତେଣୁ ଗାଁ ଲୋକମାନେ ବାଧ୍ୟହୋଇ ପୋଖରୀ ପାଣି କୁ ନିତ୍ୟ ବ୍ୟବହାର କାର୍ଯ୍ୟ ରେ ଲଗାଇ ଥାନ୍ତି । ଏଇ ଘଟଣା କୌଣସି ଉପାନ୍ତ ଅଞ୍ଚଳର ନୁହେଁ ବରଂ ଖୋର୍ଦ୍ଧା ଜିଲ୍ଲାର ଚିଲିକା ବ୍ଲକ ଅଧିନସ୍ଥ ଆମ୍ବପଡା ଗାଁର ଦୃଶ୍ୟ । ଏଠି ପାନୀୟ ଜଳ ପାଇଁ କସରତ ଚଳାଇଛନ୍ତି ଗ୍ରାମବାସୀ । ସରକାରୀ ଟ୍ୟାପ ପଏଣ୍ଟ ଅଛି ହେଲେ ପାଣି ଆସୁନାହିଁ , ନଳକୂପ ଅଛି ହେଲେ ବାହାରୁନି ମଧୁର ପାଣି । ଏହି ସମସ୍ୟା ଦିନେ ନୁହେଁ କି ଦୁଇ ଦିନ ନୁହେଁ , ବର୍ଷେ ନୁହେଁ କି ଦୁଇ ବର୍ଷ ନୁହେଁ , ଦୀର୍ଘ ୧୫ ରୁ ୨୦ ବର୍ଷ ହେଲା ଦେଖା ଦେଇଛି ଏହି ସମସ୍ୟା । ପାନୀୟ ଜଳ ହୋଇଛି ଏହି ଗାଁର ମୂଖ୍ୟ ସମସ୍ୟା । ମଧୁର ଜଳ ମୁଁନ୍ଦାଏ ପାଇଁ ନଈ-ପୋଖରୀ ର ପାଣି ହେଉଛି ଏହି ଗାଁ ଲୋକଙ୍କ ସାହା ଭରଷା ।
ଖୋର୍ଦ୍ଧା ଜିଲ୍ଲା ର ଚିଲିକା ବ୍ଲକ ଅଧୀନସ୍ଥ ସିଙ୍ଗେଶ୍ୱର ପଞ୍ଚାୟତର ଆମ୍ବପଡା ଗ୍ରାମର ପାନୀୟ ଜଳ ହେଉଛି ମୂଖ୍ୟ ସମସ୍ୟା। ଜାତୀୟ ରାଜପଥର ପାର୍ଶ୍ୱରେ ରହିଛି ଏହି ଆମ୍ବପଡା ଗ୍ରାମ । ଯେଉଁ ଗ୍ରାମରେ ପ୍ରାୟ ୧ ହଜାରରୁ ଅଧିକ ଲୋକ ମାନେ ବସବାସ କରନ୍ତି। ଏହି ଅଞ୍ଚଳରେ ମଧୁର ପାନୀୟ ଜଳ ମୁନ୍ଦାଏ ପାଇବା ସାତ-ସପନ ହୋଇଥାଏ । ଚିଲିକା ହ୍ରଦର ଲବଣାକ୍ତ ଜଳରାଶି ଯୋଗୁଁ ଚିଲିକା ବ୍ଲକର ଅଧିକାଂଶ ପଞ୍ଚାୟତ ର ଅଧିବାସୀମାନେ ସର୍ବଦା ମଧୁର ପାନୀୟ ଜଳ ପାଇଁ ସଂଘର୍ଷ କରୁଛନ୍ତି। ରାଜ୍ୟ ସରକାର ବିଭିନ୍ନ ଲୋକାଭିମୁଖୀ ଯୋଜନା ମାଧ୍ୟମରେ ବିଭିନ୍ନ ଅଞ୍ଚଳରେ ପାନୀୟ ଜଳ ଯୋଗାଣ ପ୍ରକଳ୍ପ ଖୋଲିଛନ୍ତି । କିନ୍ତୁ ବାସ୍ତବ କ୍ଷେତ୍ରରେ ସରକାରୀ କର୍ମଚାରୀ ଏବଂ ଅଧିକାରୀମାନଙ୍କ ଦାୟୀତ୍ୱ ହୀନତା ଯୋଗୁଁ ଦୁର୍ଦ୍ଦଶା ଭୋଗୁଛନ୍ତି ଏହି ଗାଁର ଲୋକମାନେ ।
ସରକାରୀ ସ୍ତରରେ ଗାଁରେ ସରକାରୀ ଟ୍ୟାପ ପଏଣ୍ଟ ର ବ୍ୟବସ୍ଥା ହୋଇଛି ମାତ୍ର ଅଚଳ ହୋଇ ପଡିଛି । ଅଭିଯୋଗ ପାଇବା ପରେ ଆମେ ପହଞ୍ଚିଲୁ ଗ୍ରାଉଣ୍ଡ ରେ ଏବଂ ସତ୍ୟାସତ୍ୟ ମଧ୍ୟ ପରଖିଲୁ , ଲୋକଙ୍କ କୋଳାହଳ ହେଲା , ଲୋକେ କହିଲେ ବହୁତ ବାବୁ-ନେତା ଙ୍କୁ ଗୁହାରୀ କରି କରି ଥକି ଗଲୁଣି , କେହିବି ଆମ ଗାଁର ଏହି ପାନୀୟ ଜଳର ସମସ୍ୟା ସମାଧାନ କରୁନାହାନ୍ତି , ଏହି ପୋଖରୀ ପାଣି ପିଇବା ଦ୍ୱାରା ବିଭିନ୍ନ ଚର୍ମ ରୋଗ ସାଙ୍ଗକୁ ଅନ୍ୟାନ୍ୟ ରୋଗରେ ଆକ୍ରାନ୍ତ ହୋଇ ଗାଁର ବହୁ ଲୋକଙ୍କ ଜୀବନ ଗଲାଣି , ତଥାପି ସମସ୍ୟା ସମାଧାନ ହେଉନାହିଁ । ବ୍ଲକ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ପର୍ଯ୍ୟନ୍ତ ଦୌଡ଼ି ଦୌଡ଼ି ନୟାନ୍ତ ହୋଇ ଗଲେଣି କିନ୍ତୁ କେହି ଗୁହାରୀ ଶୁଣୁ ନଥିବା ଗାଁ ଲୋକ ଅଭିଯୋଗ କରିଛନ୍ତି ।
ଗାଁ ପୋଖରୀ-ନଈ , ଗାଡିଆ ଇତ୍ୟାଦି ରୁ ଏହି ଅପରିଷ୍କାର ଜଳ ଏବେ ଗାଁ ଲୋକଙ୍କ ପାଇଁ ଏକ ମାତ୍ର ବିକଳ୍ପ ପାନୀୟ ଜଳ ପାଲଟି ଯାଇଛି । ବିଭାଗୀୟ ଅଧିକାରୀ ଙ୍କ ଅପାରଗତା ଯୋଗୁଁ ଏଭଳି ପରିସ୍ଥିତି ଉପୁଜିଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ଭୋଟ ସମୟ ଆସିଲେ ଏଠାକୁ ନେତା ମନ୍ତ୍ରୀ ମାନେ ଆସନ୍ତି ପ୍ରତିଶ୍ରୁତି ମଧ୍ୟ ଦିଅନ୍ତି,କିନ୍ତୁ ଭୋଟ ସରିଲା ପରେ କେହି ଆମ ସମସ୍ୟା ବୁଝନ୍ତି ନାହିଁ ବୋଲି ଗ୍ରାମବାସୀ ମାନେ ଅଭିଯୋଗ କରିଛନ୍ତି। ଏନେଇ ଆମେ ଚିଲିକା ବିଡ଼ିଓ ଏବଂ ଜଳ ଯୋଗାଣ ବିଭାଗର ଯନ୍ତ୍ରୀଙ୍କୁ ଯୋଗାଯୋଗ କରିଥିଲୁ। କ୍ୟାମେରା ସାମ୍ନାରେ ମୁଁହଁ ଖୋଲି ନାହାନ୍ତି । ଆମେ ଆଶା କରୁଛୁ ନିଉଜ ପ୍ରସାରିତ ପରେ ପ୍ରଶାସନିକ ଅଧିକାରୀ ମାନେ ଏହି ପାନୀୟ ଜଳର ସୁବିଧା କରିବେ ।
#KHORDHA #NNSODIA
