ଏନଏନଏସ୍: ଦିଲ୍ଲୀ ମଙ୍ଗଳପୁରୀରେ ବିଜେପି ନେତାଙ୍କ ସହ ତାଙ୍କ ପତ୍ନୀ ଓ ପୁଅ ଉପରେ ଦୁର୍ବୃତ୍ତଙ୍କ ଆକ୍ରମଣ । ଫଳରେ ଗୁରୁତର ଅବସ୍ଥାରେ ନେତାଙ୍କ ପରିବାରକୁ ସଫଦରଜଙ୍ଗ ହସ୍ପିଟାଲରେ ଭର୍ତ୍ତି କରାଯାଇଛି । ଅନ୍ୟପଟେ ପୋଲିସ ଉକ୍ତ ଘଟଣାରେ ୨ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡ଼ିଛି ।
ପୋଲିସ ପ୍ରାଥମିକ ତଦନ୍ତ ମୁତାବକ, ରବିବାର ବିଳମ୍ବିତ ରାତିରେ ୧୨ରୁ ୧୩ ଜଣ ବ୍ୟକ୍ତି ବିଜେପି ନେତା ନରେଶ ଉଜାଲାଙ୍କ ଘରକୁ ଧସେଇ ପଶିବା ପରେ ଲାଠି ଓ ଧାରୁଆ ଅସ୍ତ୍ରରେ ନରେଶ ଉଜାଲାଙ୍କ ସହ ତାଙ୍କ ପତ୍ନୀ ଓ ପୁଅକୁ ଆକ୍ରମଣ କରିଥିଲେ । ନରେଶଙ୍କ ମୁଣ୍ଡକୁ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ତାଙ୍କ ଅବସ୍ଥା ଗୁରୁତର ହେବା ସହ ତାଙ୍କ ପତ୍ନୀ ଓ ପୁଅଙ୍କ ଅବସ୍ଥା ମଧ୍ୟ ଶଙ୍କଟାପନ୍ନ ଥିବା କୁହାଯାଉଛି । ତେବେ ପୂର୍ବ ଶତ୍ରୁତାକୁ କେନ୍ଦ୍ର କରି ଏଭଳି ଆକ୍ରମଣ କରାଯାଇଥିବା ସୂଚନା ରହିଛି । ଆକ୍ରମଣ ପରେ ଦୁର୍ବୃତ୍ତମାନେ ଫେରାର ହୋଇଯାଇଥିବାବେଳେ ୨ ଜଣଙ୍କୁ ଗିରଫ କରି ପୋଲିସଜେରା କରିଛି ।
