ନୂଆଦିଲ୍ଲୀ,୧୦.୦୪.୨୦୨୩ (ଏନଏନଏସ ଓଡ଼ିଆ) : ଚଳିତ ଆଇପିଏଲରେ କ୍ରିକେଟର ରିଙ୍କୁ ସିଂଙ୍କ ବିସ୍ଫୋରକ ବ୍ୟାଟିଂ ଏବେ ଖବରର ଶିରୋନାମା ପାଲଟିଛି । ଆଇପିଏଲ-୧୬ରେ ରବିବାର ଗୁଜୁରାଟ ଏବଂ କୋଲକାତା ମଧ୍ୟରେ ମ୍ୟାଚ ହୋଇଥିଲା । ଏଥିରେ କୋଲକାତାକୁ ୨୯ ରନ ଆବଶ୍ୟକ ଥିଲା । ବୋଲର ୟଶ ଦୟାଲଙ୍କୁ ଶେଷ ୫ଟି ବଲରେ ୫ଟି ଛକା ମାରି ରିଙ୍କୁ ସିଂ ଗୁଜରାଟ ହାତରୁ ମ୍ୟାଚ୍ ଛଡ଼ାଇ ଆଣିଥିଲେ । ତାଙ୍କର ଏହି ଛକା ପାଇଁ ସେ ଆଜି ଚର୍ଚ୍ଚାର ବିଷୟ ପାଲଟିଛନ୍ତି । ଯାହାଦ୍ୱାରା ସୋସିଆଲ ମିଡିଆରେ ରିଙ୍କୁ ଛାଇ ଯାଇଛନ୍ତି ।
ରିଙ୍କୁ ସିଂ ୧୨ ଅକ୍ଟୋବର ୧୯୯୭ ମସିହା ଉତ୍ତରପ୍ରଦେଶରେ ଜନ୍ମ ହୋଇଥିଲେ । ଏକ ଗରିବ ପରିବାରରେ ଜନ୍ମ ହୋଇଥିବା ରିଙ୍କୁଙ୍କ ବାପା ଗ୍ୟାସ ବିତରଣ କରି ପରିବାର ଚଳାଉଥିଲେ । ରିଙ୍କୁଙ୍କ ଭାଇ ଅଟୋ ଚଳାନ୍ତି । ପିଲାଟିବେଳୁ ରିଙ୍କୁଙ୍କର କ୍ରିକେଟ ପ୍ରତି ଦୁର୍ବଳତା ଥିଲା । ଯେଉଁଥିପାଇଁ ସେ ନବମ ଶ୍ରେଣୀରେ ଫେଲ ହୋଇଥିଲେ । କ୍ରିକେଟ ପାଇଁ ସେ ବାପାଙ୍କଠାରୁ ବହୁତ ମାଡ଼ ବି ଖାଇଛନ୍ତି । ମାଡ଼ ଖାଇ ବି ସେ ନିଜ ରୁଚିକୁ ପରିବର୍ତ୍ତନ କରି ନଥିଲେ । କ୍ରିକେଟରେ ସେ ଭଲ ପ୍ରଦର୍ଶନ କରିବାରୁ ବାପାଙ୍କ ମନୋଭାବ ବି ବଦଳିଥିଲା । ରିଙ୍କୁ ଜିତିଥିବା ବାଇକକୁ ନେଇ ବାପା ଗ୍ୟାସ ବିତରଣ କରୁଥିଲେ । ୧୬ ବର୍ଷ ବୟସରେ ରିଙ୍କୁ ଉତ୍ତରପ୍ରଦେଶ ପାଇଁ ଲିଷ୍ଟ- ଏ କ୍ରିକେଟରେ ପଦାର୍ପଣ କରିଥିଲେ । ଏକ ମ୍ୟାଚରେ ସେ ୮୭ ବଲରେ ୮୩ ରନ୍ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ । ଏହା ପରେ ତାଙ୍କୁ ସୟଦ ମୁସ୍ତାକ ଅଲି ଟ୍ରଫି ପାଇଁ ଉତ୍ତରପ୍ରଦେଶ ଦଳରେ ସ୍ଥାନ ମିଳିଥିଲା । ୨୦୧୬-୧୭ ସିଜିନରେ ସେ ରଣଜୀରେ ପଦାର୍ପଣ କରିଥିଲେ । ଏହା ପରେ ରିଙ୍କୁ ଆଗକୁ ଆଗକୁ ବଢି ଚାଲିଛନ୍ତି ।
୨୦୧୭ରେ ରିଙ୍କୁ ପଞ୍ଜାବ ପାଇଁ ଖେଳିଥିଲେ । ୨୦୧୮ରେ ତାଙ୍କୁ ୮୦ ଲକ୍ଷ ନିଲାମୀରେ କିଣିଥିଲା କୋଲକାତା । କିନ୍ତୁ ଏଥର ରିଙ୍କୁଙ୍କୁ ୫୫ ଲକ୍ଷ ଟଙ୍କାରେ କିଣାଯାଇଛି ।
