କୁନି କୁନି ପିଲାଙ୍କୁ ପାଠ ପଢାଇଲେ ଜିଲ୍ଲାପାଳ | ସ୍ୱାଭିମାନ ଅଞ୍ଚଳର ସ୍କୁଲ ଓ ଅଙ୍ଗନବାଡ଼ି କେନ୍ଦ୍ରକୁ ଜିଲ୍ଲାପାଳ ଯାଇ ପିଲାଙ୍କ ପାଠପଢା ବିଷୟରେ ପଚାରି ବୁଝିଥିଲେ | ମାଲକାନଗିରି ଜିଲ୍ଲାପାଳ ବିଶାଲ ସିଂହ ଆଜି ସକାଳୁ ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ସ୍ୱାଭିମାନ ଅଞ୍ଚଳକୁ ଯାଇ ବିଭିନ୍ନ କାର୍ଯ୍ୟର ତଦାରଖ କରିଥିଲେ |
ଜିଲ୍ଲାପାଳ ବିଶାଲ ସିଂହ ଦୁର୍ଗମ ତଥା ନକ୍ସଲ ପ୍ରବଣ ଅଞ୍ଚଳ ଯନ୍ତାପାଇ , ଟୋଟାଗୁଡା, ବିଦାରପାଖନା ଓ ହନ୍ତାଳଗୁଡାର ସମସ୍ତ ଅଙ୍ଗନବାଡ଼ି କେନ୍ଦ୍ର ଓ ସ୍କୁଲ ପରିଦର୍ଶନ କରି ସମ୍ପୃକ୍ତ ସ୍କୁଲର ଶିକ୍ଷକ ଶିକ୍ଷୟିତ୍ରୀଙ୍କ ସହ ବିଭିନ୍ନ ଅସୁବିଧା ଉପରେ ଆଲୋଚନା କରିଥିଲେ | ଅଙ୍ଗନବାଡ଼ି କେନ୍ଦ୍ରରେ ପିଲାମାନଙ୍କୁ ପୁଷ୍ଟିକର ଖାଦ୍ୟ ଖାଇବାକୁ ଦିଆଯାଉଛି ନା ନାହିଁ, ସ୍କୁଲରେ ପିଲାମାନଙ୍କୁ କିଭଳି ପାଠ ପଢ଼ାଯାଉଛି ସେ ସବୁକୁ ଅନୁଧ୍ୟାନ କରିଥିଲେ। କିଛି ସ୍ଥାନରେ ନିଜେ ପିଲାଙ୍କୁ ପାଠ ପଢ଼ାଇଥିବା ମଧ୍ୟ ଦେଖାଯାଇଥିଲା | ଜିଲ୍ଲାପାଳଙ୍କ ଏଭଳି ପଦକ୍ଷେପକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
