ବ୍ରାହ୍ମଣୀ ନଦୀରେ ଡଙ୍ଗା ବୁଡି ଘଟଣାରେ ମିଳିଲା ନାଉରିଆଙ୍କ ମୃତଦେହ

କେନ୍ଦ୍ରାପଡା(ଏନଏନଏସ୍): କେନ୍ଦ୍ରାପଡା ଜିଲ୍ଲା ଆଳି ଏକମଣିଆ ଠାରେ ବ୍ରାହ୍ମଣୀ ନଦୀରେ ଡ଼ଙ୍ଗା ବୁଡିବା ଘଟଣାରେ ନିଖୋଜ ନାଉରିଆ ସୁଦର୍ଶନ ସ୍ୱାଇଁଙ୍କ ମୃତଦେହ ଉଦ୍ଧାର କରାଯାଇଛି । ନିଖୋଜ ହେବାର ପ୍ରାୟ ୨୪ ଘଣ୍ଟା ପରେ ଦମକଳ ବାହିନୀ ନାଉରିଆଙ୍କ ମୃତ ଦେହ ଉଦ୍ଧାର କରିଛି । ଗତକାଲି ବ୍ରାହ୍ମଣୀ ନଦୀରେ ଡ଼ଙ୍ଗା ବୁଡି ଦୁଇ ଜଣ ନିଖୋଜ ହୋଇଯାଇଥିଲେ। ସ୍ଥାନୀୟ ଲୋକେ ଓ ଅଗ୍ନିଶମ ବିଭାଗ ପକ୍ଷରୁ ଖୋଜା ଖୋଜି ପରେ ୧୬ ବର୍ଷର ନାବାଳକ ଦେବେନ୍ଦ୍ର ବେହେରା ଙ୍କ ମୃତ ଦେହ ଉଦ୍ଧାର କରାଯାଇଥିଲା । ତେବେ ବହୁ ଖୋଜା ଖୋଜି ପରେ ମଧ୍ୟ ଗତକାଲି ନାଉରିଆଙ୍କୁ ଠାବ କରାଯାଇପାରିନଥିଲା । ଆଜି ସକାଳେ ଘାଟର ପାଞ୍ଚ ଶହ ମିଟର ଦୂରରେ ନାଉରିଆଙ୍କ ମୃତ ଦେହ ଭାସୁଥିବାର ଦେଖିବାକୁ ମିଳିବା ପରେ ଉଦ୍ଧାର କରାଯାଇଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।