ପଶ୍ଚିମ ଓଡ଼ିଶାର ନୃସିଂହନାଥ ପର୍ଯ୍ୟଟନ ସ୍ଥଳୀଠାରେ ପାଞ୍ଚ ଦିନ ଧରି ଚାଲିଥିବା ବୈଶାଖ ମେଳାର ଆଜି ହେଉଛି ଶେଷ ଦିନ। ପାଞ୍ଚ ଦିନ ଧରି ବିଶ୍ବ ଶାନ୍ତି ମହାଯଜ୍ଞ ଅନୁଷ୍ଠିତ ହେଉଛି ।ଚତୁର୍ଦଶୀ ତିଥିରେ ନୃସିଂହନାଥ ମହାପ୍ରଭୁ ମାର୍ଜାରକେଶରୀଙ୍କ ଜନ୍ମ ଉତ୍ସବ ପାଳନ ହୋଇଯାଇଛି । ଜନ୍ମ ଉତ୍ସବ ସହ ପ୍ରାଚୀନ ପରମ୍ପରା ଅନୁସାରେ କନ୍ଧ ସମ୍ପ୍ରଦାୟର ଦାୟାଦଙ୍କ ଦ୍ବାରା ମାର୍ଜାରକେଶରୀଙ୍କୁ କନ୍ଦା ଭୋଗ ଅର୍ପଣ କରାଯାଇଛି ଯାହା ନୃସିଂହନାଥ ପୀଠର ପ୍ରାଚୀନ ପରମ୍ପରା। ଏହାସହ ମୁଖ୍ୟ ମନ୍ଦିରରେ ଧ୍ଵଜା ବନ୍ଧନ ପ୍ରଭୃତି କାର୍ଯ୍ୟକ୍ରମ ସହ ମନୋରଞ୍ଜନ କାର୍ୟ୍ୟକ୍ରମ ଅନୁଷ୍ଠିତ ହେଉଛି। ଓଡ଼ିଶା ରାଜ୍ୟ ତଥା ଛତିଶଗଡ଼ର ପ୍ରବଳ ଶ୍ରଦ୍ଧାଳୁଙ୍କ ଭିଡ ଜମିଛି। ଭକ୍ତ ଙ୍କ ସମାଗମ ପାଇଁ ମନ୍ଦିର ପ୍ରଶାସନ ଓ ବୈଶାଖ ମେଳା କମିଟି ତରଫରୁ ମାଗଣା ଭୋଜନ, ଥଣ୍ଡା ଦହି ସରବତ ଲେମ୍ବୁପାଣି ବଣ୍ଟନ କରାଯାଉଛି। ଗନ୍ଧମାର୍ଦ୍ଦନ ପର୍ବତମାଳାର ପ୍ରାକୃତିକ ଶୋଭାରାଜି ରେ ଭରପୁର ଥିବା ଏହି ପୀଠ ପ୍ରାଚୀନ ପୀଠ ଓ ଏଥିରେ ଅନେକ ପରମ୍ପରା, କିମ୍ବଦନ୍ତୀ, ସଂସ୍କୃତି କିର୍ତୀରାଜି ଭରିରହିଛି।ଏହି ନୃସିଂହନାଥ ତିର୍ଥ କ୍ଷେତ୍ରରେ ମାର୍ଜାରକେରୀ ପୂଜା ପାଇଥାନ୍ତି। ପ୍ରାଚୀନ ଲୋକକଥା ଓ କିମ୍ବଦନ୍ତୀ ଅନୁସାରେ କନ୍ଧ ସମ୍ପ୍ରଦାୟର ଜମୁନା ଓ ହରି ନାମକ ଏକ କନ୍ଧ ଦମ୍ପତ୍ତି ଗନ୍ଧମାର୍ଦନ ପର୍ବତମାଳା ର ଘୋର ଅରଣ୍ୟ ମଧ୍ୟରେ କନ୍ଦମୂଳ ଖୋଳୁଥିବା ବେଳେ ମାଟିତଳୁ ନୃସିଂହନାଥ ମହାପ୍ରଭୁ ମାର୍ଜାରକେଶରୀ ଙ୍କୁ ପାଇଥିଲେ ।
