ଫୁଲ ତୋଳିବାକୁ ଆସି ଲୁଟର ଶିକାର ହେଲେ ମହିଳା

ଭୁବନେଶ୍ବର,(ଏନଏନଏସ ଓଡ଼ିଆ /୨୧.୦୩): ରାଜଧାନୀରେ ମାତିଛନ୍ତି ଲୁଟେରା । ଆପଣ ଯଦି ରାତିରୁ ଉଠି ଫୁଲ ତୋଳୁଥାନ୍ତି ତାହାଲେ ସାବଧାନ। କାରଣ ଫୁଲ ତୋଳିବାକୁ ଆସିଥିବା ଆଉ ଜଣେ ମହିଳାଙ୍କ ଉପରେ ଆକ୍ରମଣ କରି ଲୁଟିନେଛନ୍ତି ସୁନା ଚେନ । କିଛିଦିନ ତଳେ ନିଳାଦ୍ରୀ ବିହାରରେ ଏଭଳି ଏକ ଘଟଣା ସାମ୍ନାକୁ ଆସିଥିବା ବେଳେ ମଙ୍ଗଳବାର ଭୋରୁ ଲକ୍ଷ୍ମୀସାଗର ଥାନା ଅଧୀନ ଓସ୍କାର ସିଟି ଅଞ୍ଚଳରେ ଘଟିଛି ଏଭଳି ଘଟଣା । ଘଟଣା ଅନୁସାରେ ରାତି ସାଢେ ୩ ଟା ସମୟରେ ଜଣେ ମହିଳା ଫୁଲ ତୋଳିବାକୁ ଆସିଥିବା ବେଳେ ଲୁଟର ଶିକାର ହୋଇଛନ୍ତି । ସମ୍ପୂର୍ଣ୍ଣ ଚିତ୍ର ସିସିଟିଭିରେ କଏଦ ହୋଇଛି । କଏଦ ଭିଡ଼ିଓରେ ରାତି ପ୍ରାୟ ୩ଟା ୨୦ମିନିଟ ଜଣେ ମହିଳା ଫୁଲ ତୋଳିବାକୁ ଯାଉଛନ୍ତି । ଏହି ସମୟରେ ଜଣେ ଦୃବୁର୍ତ୍ତ ତାଙ୍କୁ ଗୋଡ଼େଇଥିଲେ । ଲୁଟେରାଙ୍କ କବଳରୁ ରକ୍ଷା ପାଇବା ପାଇଁ ମହିଳା ଜଣଙ୍କ ଦୌଡ଼ି ପଳାଇବାକୁ ଚେଷ୍ଟା କରୁଥିବା ବେଳେ ପଡିଯାଇଥିଲେ । ମହିଳାଙ୍କୁ ମାଡିବସି ତାଙ୍କଠାରୁ ସୁନା ଚେନ ଲୁଟିନେଇ ଛୁ ମାରିଥିଲେ । ଏନେଇ ମହିଳା ଜଣଙ୍କ ଲଷ୍ମୀସାଗର ଥାନାରେ ଅଭିଯୋଗ କରିବା ପରେ ପୋଲିସ ସିସିଟିଭି ଆଧାରରେ ତଦନ୍ତ ଆରମ୍ଭ କରିଛି ।