ଯାଜପୁର(ଏନଏନଏସ୍): ମୃତ୍ୟୁ କେତେବେଳେ କାହାର ବାଟ ଜଗିବସିଥିବ ତା କେହି ଜାଣିପାରିବେ ନାହିଁ । ଶବ ଦାହ କରିବାକୁ ଯାଇଥିବା ବେଳେ ଚାଲିଗଲା ଯୁବକଙ୍କ ଜୀବନ । ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଥାନା ବୈତରଣୀ ନଦୀ ଦଶାଶ୍ବମେଧ ଘାଟରେ। ମୃତକ ହେଲେ ଦଶରଥପୁର ବ୍ଲକ ରାମବାଗ ହୀରାପୁର ଅଞ୍ଚଳର ନିଶିକାନ୍ତ ମଲ୍ଲିକ । ନିଶିକାନ୍ତ ସମ୍ପର୍କୀୟଙ୍କ ଶବ ସତ୍କାର କରିବା ପାଇଁ ଯାଜପୁର ଦଶାଶ୍ବମେଧ ଘାଟ ନିକଟସ୍ଥ ବାରୁଣୀ ପଡିଆରେ ଥିବା ମହାଶ୍ମଶାନକୁ ଯାଇଥିଲେ । ଦାହ କାର୍ୟ୍ୟ ଶେଷ ହେବା ପରେ ବୈତରଣୀ ନଦୀର ଦଶାଶ୍ବମେଧ ଘାଟକୁ ଗାଧୋଇବାକୁ ଯାଇଥିଲେ ନିଶିକାନ୍ତ । ଗାଧୋଇବା ବେଳେ ନଦୀରେ ବୁଡିଯାଇଥିଲେ ନିଶିକାନ୍ତ । ଦୀର୍ଘ ସମୟ ଖୋଜାଖୋଜି ପରେ ନିଶିକାନ୍ତଙ୍କୁ ପାଣି ଭିତରୁ ଉଦ୍ଧାର କରଯାଇଥିଲା।
ଖବର ପାଇ ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ମୃତ ଦେହକୁ ଉଦ୍ଧାର କରି ଯାଜପୁର ମୁଖ୍ୟ ଚିକିତ୍ସାଳୟକୁ ନେଇଥିଲେ । କିନ୍ତୁ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ। ଅନ୍ୟପଟେ ମୃତ ଶରୀର ଜବତ କରି ଘଟଣାର ତଦନ୍ତ ଜାରି ରଖିଛି ପୋଲିସ୍ ।
