ନୂଆଦିଲ୍ଲୀ : ଜମ୍ମୁ-କଶ୍ମୀରର ରାଜନୈତିକ ସ୍ଥିତାବସ୍ଥା ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଜମ୍ମୁ-କଶ୍ମୀରର ବିଭିନ୍ନ ରାଜନୈତିକ ଦଳର ନେତାଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଏଥିପାଇଁ କେନ୍ଦ୍ର ସରକାରଙ୍କ ପକ୍ଷରୁ ୧୪ଟି ଦଳର ନେତାଙ୍କୁ ଆମନ୍ତ୍ରଣ କରାଯାଇଥିବା ଜଣାପଡିଛି । ତେବେ ମୋଦୀଙ୍କ ସହ ଆଲୋଚନା କାଳରେ ଜମ୍ମୁ-କଶ୍ମୀରରେ ପୁଣି ସମ୍ବିଧାନର ଧାରା ୩୭୦ ଲାଗୁ କରିବା ସହ ପୂର୍ଣ୍ଣ ରାଜ୍ୟପାହ୍ୟା ଫେରାଇ ଆଣିବାକୁ ତାଙ୍କ ଦଳ ଦାବି ଉପସ୍ଥାପନ କରିବ ବୋଲି ପିଡିପି ନେତ୍ରୀ ତଥା ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫ୍ତି କହିଛନ୍ତି । ମେହବୁବା ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ସଭାପତି ଥିବାବେଳେ ଜମ୍ମୁ-କଶ୍ମୀରରେ ଗଠିତ ଗୁପ୍କାର ମେଣ୍ଟର ମଧ୍ୟ ଉପସଭାପତି ଦାୟିତ୍ୱ ତୁଲାଉଛନ୍ତି ।
୨୦୧୯ ଅଗଷ୍ଟରେ କେନ୍ଦ୍ର ସରକାର ଜମ୍ମୁ-କଶ୍ମୀରରୁ ୩୭୦ ଧାରା ଉଚ୍ଛେଦ କରିବା ସହ ଏହାକୁ ଦୁଇଟି କେନ୍ଦ୍ରଶାସିତ ଅଞ୍ଚଳ (ଜମ୍ମୁ-କଶ୍ମୀର ଓ ଲଦାଖ)ରେ ବିଭକ୍ତ କରିଥିଲେ । ଭାରତୀୟ ସମ୍ବିଧାନକୁ ଅବଜ୍ଞା କରାଯାଇ କେନ୍ଦ୍ର ସରକାରଙ୍କ ପକ୍ଷରୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ଏବଂ ଆଲୋଚନାରେ ଏହି ଦାବି ଉପସ୍ଥାପନ କରାଯିବ ବୋଲି ମେହବୁବା କହିଛନ୍ତି । ଭାରତୀୟ ସମ୍ବିଧାନ ହିଁ ଜମ୍ମୁ-କଶ୍ମୀରକୁ ସ୍ୱତନ୍ତ୍ର ରାଜ୍ୟପାହ୍ୟା ସହ ୩୭୦ ଧାରା ପ୍ରଦାନ କରିଛି, ତେଣୁ ଏହା ଫେରାଇ ଆଣିବା କେନ୍ଦ୍ର ସରକାରଙ୍କ ପାଇଁ ପ୍ରଥମ କର୍ତ୍ତବ୍ୟ ହେବ ବୋଲି ମେହବୁବା କହିଛନ୍ତି । ସୂଚନାଯୋଗ୍ୟ ଜମ୍ମୁ-କଶ୍ମୀରକୁ ପୁଣି ରାଜ୍ୟପାହ୍ୟା ପ୍ରଦାନ ପ୍ରସଙ୍ଗରେ ବିଚାର କରିବାକୁ କେନ୍ଦ୍ର ସରକାର ରାଜି ଥିଲେ ସୁଦ୍ଧା କୌଣସି ପରିସ୍ଥିତିରେ ୩୭୦ ଧାରା ପୁନଃ ପ୍ରଚଳନର ପ୍ରଶ୍ନ ଉଠୁନାହିଁ ବୋଲି କୁହାଯାଇଛି ।
