ବଲାଙ୍ଗୀର ଜିଲ୍ଲା ଖପ୍ରାଖୋଲରେ ଦେଖିବାକୁ ମିଳିଛି ହୃଦୟ ବିଦାରକ ଘଟଣା । ନିର୍ମାଣାଧିନ ପାନୀୟ ଜଳ ପ୍ରକଳ୍ପର ଓଭରହେଡ ଟାଙ୍କିରେ ଝୁଲିପଡିଲେ ଶ୍ରମିକ । ଖପ୍ରାଖୋଲ ବ୍ଲକ ଲରମ୍ବା ଥାନା ଅନ୍ତର୍ଗତ ଖୁଲାଗଡ ଗାଁରେ ନିର୍ମାଣାଧିକ ପାନୀୟ ଜଳ ପ୍ରକଳ୍ପର ଓଭରହେଡ ଟାଙ୍କିରେ ଜିଲ୍ଲା ବାହାରର ଜଣେ ଶ୍ରମିକଙ୍କ ଝୁଲନ୍ତା ମୃତଦେହ ଦେଖିବାକୁ ମିଳିଛି । ଏନେଇ ଖବର ପାଇବା ପରେ ଲରମ୍ବା ପୋଲିସ ଥାନା ଅଧିକାରୀ ଭାନୁ ପ୍ରକାଶ ଯାଦବଙ୍କ ନେତୃତ୍ୱରେ ଏକ ଟିମ ପହଂଚି ତଦନ୍ତ ଜାରି ରଖିଛନ୍ତି । ଏହାସହ ଘଟଣାସ୍ଥଳରେ ଉପସ୍ଥିତ ଗ୍ରାମବାସୀ ଏବଂ ଅନ୍ୟ ଶ୍ରମିକମାନଙ୍କୁ ପଚରାଉଚରା କରୁଛନ୍ତି । ଏହାପରେ ପୋଲିସ ମୃତକଜଣକ ନୟାଗଡ ଜିଲ୍ଲା ଜାମୁପାଟଣାର ନିଲୁ ପଲେଇ ବୋଲି ଜାଣିବା ପରେ ତାଙ୍କ ପରିବାରକୁ ଖବର ଦେଇଥିଲେ । ମୃତକଙ୍କ ବାପାଙ୍କ କହିବା ଅନୁଯାୟୀ ସଂପୃକ୍ତ ଠିକାଦାର କାମରେ ଲଗାଇ ତାଙ୍କୁ ପଇସା ଦେଉନଥିଲା । ଯେଉଁ କାରଣରୁ ତାଙ୍କ ପୁଅ ଆତ୍ମହତ୍ୟା କରିଛି ବୋଲି ସେ ଅଭିଯୋଗ କରିଛନ୍ତି । ତେବେ ଲରମ୍ବା ପୋଲିସ ଝୁଲନ୍ତା ମୃତଦେହକୁ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ ପାଟଣାଗଡ ଡାକ୍ତରଖାନାକୁ ପଠାଇଥିବା ଜଣାପଡିଛି ।
