ଗୋଟିଏ ପଟେ ମୃତୁ୍ୟର ଦୃଶ୍ୟ । ଅନ୍ୟ ପଟେ ଏକ ମା ର ମମତା । ହାତରେ ରହିଛି ଲାଠି, କୋଳରେ ରହିଛି ଛୁଆ ଏମିତି ମା କୁ ଆମର ସଲାମ । ନୂଆଦିଲ୍ଲୀ ରେଳ ଷ୍ଟେସନର ଅସମ୍ଭାଳ ଭିଡ ଭିତରେ କିଛି ଏମିତି ହୃଦୟସ୍ପର୍ଶୀ ଦୃଶ୍ୟ ନଜର ଆସିଛି । ମା, ପୋଲିସ ଆଉ ସୁରକ୍ଷା ୩ଟି କଥା ଏକା ସହ ଦେଖିବାକୁ ମିଳିଛି । ଆଉ ଏହି ଦୃଶ୍ୟ ଦେଖି ନ କହି ରହି ହେଉନି ମା ତୁଝେ ସଲାମ..
ଗୋଟିଏ ହାତରେ ଛାତିରେ ନବଜାତ ଶିଶୁ କୁ ଜାବୁଡି ଧରିଛନ୍ତି। ଆଉ ଗୋଟିଏ ହାତରେ ଲାଠି ଧରି ଭୟଙ୍କର ଭିଡ କୁ ନିୟନ୍ତ୍ରଣ କରୁଛନ୍ତି। ଗୋଟିଏ ପଟେ ଦେଶକୁ ଦେଇଥିବା ପ୍ରତିଶ୍ରୁତି ଓ ଅନ୍ୟପଟେ ଛୁଆକୁ ଦେଇଥିବା ପ୍ରତିଶ୍ରୁତି କୁ ଏକା ସାଙ୍ଗେ ନିଖୁଣ ଭାବରେ ତୁଲାଉଥିଲେ rpf ରୀନା । ସବୁ ପଛ କରି ଭିଡରୁ ଶହ ଶହ ଜୀବନ ବଞ୍ଚାଇବା ରୀନରଙ୍କ ପ୍ରଥମ କର୍ତ୍ତବ ପାଳଟିଛି ।
ନାରୀ ଟିଏ ପ୍ରତ୍ୟେକ ପରିସ୍ଥିତିକୁ ସାମ୍ନା କରିବାକୁ ସବୁବେଳେ ପ୍ରସ୍ତୁତ ଥାଏ । ସେଥିପାଇଁ ତ ନାରୀ ସବୁବେଳେ ବନ୍ଦନୀୟ, ପୂଜନୀୟ । ଯାହାର ଜ୍ବଳନ୍ତ ଉଦାହରଣ ସାଜିଛନ୍ତି ଆରପିଏଫ ରୀନା । ରୀନାଙ୍କ ର ଏହି ଫଟୋ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଆଉ ଯିଏ ଦେଖୁଛି ସିଏ କହୁଛି ଏ ମହିଳା ହେଉଛନ୍ତି ନାରୀ ଶକ୍ତିର ଅଦ୍ଭୁତ ଉଦାହରଣ। କର୍ତ୍ତବ୍ୟ ଏବଂ ମା ହେବାର ଦୁଇଟି ଦାୟିତ୍ବକୁ ଏକା ସାଙ୍ଗେ ବହୁତ ଭଲ ଭାବେ ତୁଲାଇପାରିଛନ୍ତି । ରୀନାଙ୍କ ସାହସ ଏବଂ ସମର୍ପଣକୁ ଲୋକେ ପ୍ରଶଂସା କରୁଛନ୍ତି ।
ତେବେ ଗତ ଶନିବାର ନୂଆଦିଲ୍ଲୀ ରେଳ ଷ୍ଟେସନରେ ଖଚାଖଚ ଭିଡ ହୋଇଥିଲା । ସମସ୍ତଙ୍କର ଗନ୍ତବ୍ୟସ୍ଥଳ ହେଉଛି ମହାକୁମ୍ଭ । ହଠାତ ଏକ ଘୋଷଣା ହେଲା କୁମ୍ଭ ଯାଉଥିବା ଟ୍ରେନର ପ୍ଲାଟଫର୍ମ ପରିବର୍ତ୍ତନ ହୋଇଛି । ଶବ୍ଦଟି ଯେତେବେଳେ ସମସ୍ତଙ୍କ କାନରେ ପଡିଲା ସିଡ଼ିରୁ ପ୍ଲାଟଫର୍ମ ପର୍ୟ୍ୟନ୍ତ ଭିଡ଼ ଭିତରେ ଆରମ୍ଭ ହୋଇଯାଇଥିଲା ପ୍ରତିଯୋଗିତା । ଲୋକମାନେ ଟ୍ରେନ ଛୁଟିବା ଭୟରେ ଟ୍ରେନ୍ ଧରିବା ପାଇଁ ଦୌଡ଼ିବାକୁ ଲାଗିଲେ। କିଛି ସମୟ ମଧ୍ୟରେ, ବିଶୃଙ୍ଖଳା ଏତେ ତୀବ୍ର ହୋଇଗଲା ଯେ ଏହା ଦଳାଚକଟାର ରୂପ ନେଇଗଲା ଆଖି ପିଛୁଳାକେ । ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ଆରମ୍ଭ ହୋଇଗଲା । ରେଳବାଇ ପ୍ରଶାସନ ଦଳାଚକଟାକୁ ରୋକିବା ପାଇଁ ଚେଷ୍ଟା କରିବାରେ ବ୍ୟସ୍ତ ଥିଲେ। ସେତେବେଳକୁ ବହୁତ ଡେରି ହୋଇଯାଇଥିଲା। ୧୮ ଜଣ ଲୋକ ପ୍ରାଣ ହରାଇସାରିଥିଲେ । ଏହି ଘଟଣା ପରେ, ରେଳବାଇ ସତର୍କ ହୋଇଥିଲା ଏବଂ RPF ନିୟୋଜିତ ବୃଦ୍ଧି କରାଯାଇଥିଲା । ଆଉ ଏହାରି ମଧ୍ୟରେ ରୀନାଙ୍କର ଡବଲ ଡ୍ୟୁଟି ସମସ୍ତିଙ୍କର ଦୃଷ୍ଟି ଆକର୍ଷଣ କରିଥିଲା ।
