ସୁକିନ୍ଦା ଅଞ୍ଚଳରୁ ୫ଶିଶୁ ଶ୍ରମିକ ଉଦ୍ଧାର

ଗୁରୁବାର ଦିନ ଜିଲ୍ଲା ଶିଶୁ ସୁରକ୍ଷା ୟୁନିଟ ପକ୍ଷରୁ ସୁକିନ୍ଦା ଅଞ୍ଚଳର ବିଭିନ୍ନ ସ୍ଥାନରୁ ୫ଜଣ ନାବାଳକଙ୍କୁ ଉଦ୍ଧାର କରିଥିବା ଜଣାପଡିଛି। ଶିଶୁ ସହାୟତା ସେବା ସଂଗଠନ ଯାଜପୁର ଜିଲ୍ଲା ସଂଯୋଜକ ବରେନ୍ଦ୍ର କୃଷ୍ଣ ଦାସ, ରଜତ କୁମାର ସାହୁ ଓ ସ୍ଥାନୀୟ ପୋଲିସର ମିଳିତ ସହଯୋଗରେ ଏହି ଉଦ୍ଧାର କାର୍ଯ୍ୟ ସମ୍ପାଦନ ହୋଇଥିଲା। ୫୩ନଂ ଜାତୀୟ ରାଜପଥ ସୁକିନ୍ଦା ନିକଟ ଦୁଇଟି ସର୍ଭିସ ସେଣ୍ଟରରୁ ୩ଜଣ, ଜଣେ ବ୍ୟକ୍ତିଙ୍କ ଘରେ ରହି ତାଙ୍କ ଛେଳି, ଗାଈ ଚରାଉଥିବ ଜଣେ ଓ ହାତୀବାରିର ଏକ ଦୋକାନରେ କାମ କରୁଥିବା ଜଣେ ନାବାଳକକୁ ମିଶାଇ ମୋଟ ୫ଜଣ ନାବାଳକଙ୍କୁ ଏହି ଟିମ୍ ଉଦ୍ଧାର କରିଥିବା ଜଣାପଡିଛି। ସମସ୍ତ ଶିଶୁଙ୍କ ବୟସ ୧୨-୧୪ ବୟସ ମଧ୍ୟରେ। ଉଦ୍ଧାର ନାବାଳକ ମାନଙ୍କୁ ଯାଜପୁର ସ୍ଥିତ ବାଳାଶ୍ରମରେ ଛଡାଯାଇଛି।ତଦନ୍ତ ପରେ ବେଆଇନ କାର୍ଯ୍ୟ କରାଉଥିବା ବ୍ୟକ୍ତିଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।