ଧଳା ଜହର ର ସର୍ଦ୍ଦାର ପାଲଟିଛନ୍ତି ମହିଳା | ଡନ ଭଳି ଲୁଚି ରହି କରୁଥିଲେ ନିଶା କାରବାର
ପୋଲିସ ଆଖିରେ ଧୂଳି ଦେଇ ବିକ୍ରି କରୁଥିଲେ ଲକ୍ଷ ଲକ୍ଷ ଟଙ୍କାର ବ୍ରାଉନ ସୁଗାର | ବାରମ୍ବାର ପୋଲିସ ମହିଳାଙ୍କୁ ଧରିବାକୁ ଚେଷ୍ଟା କରିଲେ ସୁଦ୍ଧା ଧରିପାରୁନଥିଲେ | କଥାରେ ଅଛି ଯେ ଚୋର ଘର ସବୁବେଳେ ଅନ୍ଧାର ନଥାଏ ଦିନେ ନା ଦିନେ ଆଲୁଅ ନିଶ୍ଚୟ ପଡେ… ସେହିଭଳି ମହିଳା ଜଣକ ପୋଲିସକୁ ସବୁବେଳେ ଚକମା ଦେଉଥିବା ବେଳେ ଆଜି କିନ୍ତୁ ପୋଲିସ ହାତରେ ଧରା ପଡିଯାଇଛନ୍ତି | ତାଙ୍କର ସବୁ ପ୍ଲାନ ଭଣ୍ଡୁର ହୋଇଯାଇଛି ।
ଅନୁଗୁଳ ଅବକାରୀ ବିଭାଗ ପକ୍ଷରୁ ଆଜି ଗିରାଙ୍ଗ ଗାଁରେ ଚଢ଼ାଉ କରାଯାଇ ୫୦ଗ୍ରାମ ଓଜନର ବ୍ରାଉନସୁଗାର ଜବତ କରାଯାଇଛି। ନାଲ୍କୋ ଥାନା ଅଞ୍ଚଳ ଗିରାଙ୍ଗ ଗାଁର ନିରୁପମା ବେହେରା ବ୍ରାଉନସୁଗାର ବିକ୍ରି କରୁଥିବା ସୂଚନା ପାଇ ସଦର ରେଞ୍ଜ ଅବକାରୀ ବିଭାଗ କର୍ମଚାରୀମାନେ ଚଢ଼ାଉ କରିଥିଲେ। ତେବେ ତାଙ୍କ ନିକଟରୁ ୫୦ ଗ୍ରାମର ବ୍ରାଉନସୁଗାର ଜବତ ହୋଇଥିବା ବେଳେ ନିରୁପମାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଜବତ ବ୍ରାଉନସୁଗାର ମୂଲ୍ୟ ୫ଲକ୍ଷ ଟଙ୍କା ହେବ ବୋଲି ବିଭାଗ ପକ୍ଷରୁ କୁହାଯାଇଛି।
