ପୁରୀରେ ପୁଣି ଥରେ ବୋମାମାଡ

ପୁରୀ,୨୩/୦୪/୨୪: ଆଜି ପୁଣିଥରେ ପୁରୀ ଚନ୍ଦନପୁର ବଜାର ନିକଟରେ ବୋମାମାଡ ହୋଇଥିବା ସୂଚନା ମିଳିଛି । ସୂଚନା ଅନୁଯାୟୀ, ସିମେଣ୍ଟ ବ୍ୟବସାୟୀ ନିରଞ୍ଜନ ସାହୁଙ୍କ ଗୋଦାମ ଉପରକୁ ହୋଇଛି ବୋମାମାଡ । ଦୃର୍ବୁତ୍ତମାନେ ବୋମାମାଡ କରି ଏକ ବାଇକରେ ଖସି ପଳାଇ ଯାଉଥିବାର ଦେଖିବାକୁ ମିଳିଥିଲା । ହେଲେ ସେମାନଙ୍କୁ ସ୍ଥାନୀୟ ଲୋକେ କାବୁ କରି ପୋଲିସ ପ୍ରଶାସନକୁ ହସ୍ତାନ୍ତର କରିଥିଲେ । ତେବେ ଦୃର୍ବୁତ୍ତମାନେ ଖସି ପଳେଇଯାଉଥିବା ସମୟରେ ବାଇକରୁ ପଡି ଆହତ ହୋଇଥିଲେ । ବୋମାମାଡ କରିଥିବା ଅଭିଯୁକ୍ତକାରୀଙ୍କୁ ପୋଲିସ ଗିରଫ କରି ଚିକିତ୍ସା ନିମନ୍ତେ ପୁରୀ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । ତେବେ ଏନେଇ ପୁରୀ ପୋଲିସ ତଦନ୍ତ ଆରମ୍ଭ କରିଦେଇଛି । ପୂର୍ବ ଶତ୍ରୁତାକୁ କେନ୍ଦ୍ର କରି ବୋମାମାଡ ହୋଇଛି ନା ଦାଦାବଟି ମାଗିବାକୁ ନେଇ ବୋମାମାଡ ହୋଇଛି ସେ ନେଇ ପୋଲିସ ତଦନ୍ତ କରୁଛି । ତେବେ ଗତ କିଛିଦିନ ହେବ ଚନ୍ଦନପୁର ଅଞ୍ଚଳରେ କେତେକ ଦୃର୍ବୁତ୍ତଙ୍କ ଆତଙ୍କରାଜ ବଢିବାରେ ଲାଗିଛି । ପୂବ୍ର ଶତୁ୍ରତା, ଦାଦାବଟିକୁ ନେଇ ଦୃର୍ବୁତ୍ତମାନେ ଅନେକ ସମୟରେ ବୋମାମାଡ କରି ଲୋକଙ୍କୁ ଭୟଭୀତ କରାଉଥିବା ଅଭିଯୋଗ ହୋଇଛି । ଏଭଳି ସ୍ଥିତିକୁ ନେଇ ବୁଦ୍ଧିଜୀବୀଙ୍କ ମହଲରେ ଅସନ୍ତୋଷ ଦେଖାଦେଇଛି । ଆଗକୁ ସାଧାରଣ ନିର୍ବାଚନ ଥିବାବେଳେ ଏହି ଅଞ୍ଚଳରେ ଅପରାଧୀମାନେ ଖୁଲମଖୁଲା ତାଙ୍କର ଆତଙ୍କ ଜାରି ରଖିଛନ୍ତି ଯାହାକି ସାଧାରଣ ଲୋକଙ୍କ ପାଇଁ ଚିନ୍ତା ବଢାଇଦେଇଛି । ତେବେ ପୋଲିସ ପ୍ରଶାସନ ତୁରନ୍ତ ଏ ଦିଗରେ ଅପରାଧୀଙ୍କୁ ଦୃଢହସ୍ତରେ ଦମନ କରି ପୁରୀ ସହର ଓ ଜିଲ୍ଲାରେ ଶାନ୍ତି ଶୃଙ୍ଖଳା ରକ୍ଷା କରିବା ଦିଗରେ ସ୍ୱତନ୍ତ୍ର ଦୃଷ୍ଟି ଦେବାକୁ ଦାବି କରାଯାଇଛି ।