ନୂଆଫିଲ୍ମର ସମ୍ଭାର ନେଇ ଜମିବ ଦଶହରା । ଦୁର୍ଗାପୂଜା ଯେତେ ପାଖେଇ ଆସୁଛି ଦର୍ଶକଙ୍କ ମନରେ ଉକôଣ୍ଠା ସେତେ ବଢି ବଢି ଚାଲିଛି । ପୂଜା ମାର୍କେଟରେ ଧମାଲ କରିବେ ବଲିଉଡ ଓ ସାଉଥର ଷ୍ଟାର ମାନେ । ଏଥର ଦଶହରାରେ ମୁକ୍ତିଲାଭ ଅପେକ୍ଷାରେ ବହୁ ଫିଲ୍ମ ଲାଇନରେ ରହିଛି । ବଡ ବଡ ଥିଏଟର ଏବେ ଠାରୁ ବୁକିଂ ହୋଇସାରିଲାଣି । ଆସନ୍ତୁ ଜାଣିବା ଏଥର ଦଶହରାରେ କେଉଁ କଳାକାରଙ୍କ ଫିଲ୍ମ ସବୁ ରିଲିଜ ହେବାକୁ ଯାଉଛି ।
ଲିିୟୋ- ଥଲପତି ବିଜୟଙ୍କ ‘ଲିୟୋ’ଦଶହରାରେ ମୁକ୍ତିଲାଭ କରିବାକୁ ଯାଉଛି । ସର୍ବଭାରତୀୟ ସ୍ତରରେ ଏହା ମୁକ୍ତିଲାଭ କରିବ । ତାମିଲ, ତେଲୁଗୁ ସହ ଏହା ହିନ୍ଦୀ ଭାଷାରେ ରିଲିଜ ହେବ । ଓଟିଟି ନିୟମ ଅନୁସାରେ ଏହାର ହିନ୍ଦୀ ଭର୍ସନ ମଲ୍ଟିପ୍ଲେକ୍ସ ମାନଙ୍କରେ ରିଲିଜ ନହେଇ ସିଙ୍ଗଲ ସ୍କ୍ରିନ ମାନଙ୍କରେ ଉପଲବ୍ଧ ହେବ । ଏହି ଫିଲ୍ମକୁ ନେଇ ଦର୍ଶକ ମାନଙ୍କ ମଧ୍ୟରେ ନାହିଁ ନଥିବା ଉତ୍ସାହ ଦେଖିବାକୁ ମିଳିଛି । ବିଜୟଙ୍କ ସହିତ ଏହି ଫିଲ୍ମରେ ସଞ୍ଜୟ ଦତ୍ତ ଏବଂ ତ୍ରିଷା ଅଭିନୟ କରିଛନ୍ତି । ଲିୟୋ ୧୯ ଅକ୍ଟୋବରରେ ରିଲିଜ ହେବ ।
ଗଣପତ- ଟାଇଗର ଶ୍ରଫଙ୍କ ଆକ୍ସନ ଏଣ୍ଟରଟେନର ‘ଗଣପତ’ ୨୦ ଅକ୍ଟୋବରରେ ରିଲିଜ ହେବାକୁ ଯାଉଛି । ଏଥିରେ ଟାଇଗର ଶ୍ରଫଙ୍କ ସହ କ୍ରିତି ସାନନ୍ ଏବଂ ଅମିତାଭ ବଚ୍ଚନ ମଧ୍ୟ ଅଭିନୟ କରିଛନ୍ତି । ଦମଦାର ଷ୍ଟଣ୍ଟ ସହ ଫିଲ୍ମରେ ଆକ୍ସନ ସିନ ଦେଖିବାକୁ ମିଳିବ । ହିନ୍ଦୀ ସହ ତାମିଲ, ତେଲୁଗୁ, କନ୍ନଡ ଏବଂ ମଲୟାଲମ ଭାଷାରେ ‘ଗଣପତ’ ମୁକ୍ତିଲାଭ କରିବ ।
ୟାରିୟାଂ୨- ହିମାଂଶ କୋହଲି, ରକୁଲପ୍ରୀତ ସିଂହ ଏବଂ ଏବଲୀନ ଶର୍ମାଙ୍କ ୟାରିୟାଂ ଏକ ଜବରଦସ୍ତ ହିଟ ଫିଲ୍ମ ଥିଲା । ଏହି ଫିଲମକୁ ଦିବ୍ୟା ଖୋସଲା କୁମାର ନିର୍ଦ୍ଦେଶନା ଦେଇଥିଲେ । ଏବେ ଏହାର ଦ୍ଵିତୀୟ ଭାଗ ପରଦାକୁ ଆସିବାକୁ ଯାଉଛି । ଯେଉଁଥିରେ ଦିବ୍ୟା ନିଜେ ଲିଡ୍ ରୋଲରେ ଅଛନ୍ତି । ତାଙ୍କ ସହ ମିଜାନ ଜାଫରି, ୟଶ ଦାସଗୁପ୍ତା ଅଛନ୍ତି । ତିନି ଜଣ ସମ୍ପର୍କୀୟଙ୍କ ଉପରେ ଆଧାରିତ ଏହି ଫିଲ୍ମ । ଏହି ଫିଲ୍ମର ଗୀତ ସବୁ ଖୁବ ଲୋକପ୍ରିୟ ହେଇସାରିଛି । ଟ୍ରେଲରକୁ ମଧ୍ୟ ଠିକଠାକ ରେସପନ୍ସ ମିଳିଛି । ଏହି ରେସପନ୍ସ ଫିଲ୍ମକୁ ହିଟ କରେଇପାରିବ କି ନାହିଁ ତାହା ୨୦ ଅକ୍ଟୋବରରେ ଜଣାପଡ଼ିବ ।
ଘୋଷ୍ଟ- କନ୍ନଡ ଫିଲ୍ମ ଜଗତର ଆଇକନ ଶିବା ରାଜକୁମାରଙ୍କ ଫିଲ୍ମ ଘୋଷ୍ଟ ପ୍ରଥମଥର ପାଇଁ ସର୍ବଭାରତୀୟ ସ୍ତରରେ ମୁକ୍ତିଲାଭ କରିବାକୁ ଯାଉଛି । ଜଣେ ଗ୍ୟାଙ୍ଗଷ୍ଟାର ଉପରେ ଆଧାରିତ ଏହି ଫିଲ୍ମରେ ଲୋମଟାଙ୍କୁରା ଆକ୍ସନ ଭରି ହେଇ ରହିଛି । ‘ଘୋଷ୍ଟ’ର ଟ୍ରେଲରକୁ ଦର୍ଶକ ଖୁବ ପସନ୍ଦ କରିଛନ୍ତି । ଫିଲ୍ମର ହିନ୍ଦୀ ଟ୍ରେଲରକୁ ମଧ୍ୟ ଭଲ ରେସପନ୍ସ ମିଳିଛି । ଏହି ଫିଲ୍ମରେ ଅଭିନେତା ଅନୁପମ ଖେର ମଧ୍ୟ ଅଭିନୟ କରିଛନ୍ତି । ଜଣେ ଗ୍ୟାଙ୍ଗଷ୍ଟାର ନିଜ ଦଳ ସହିତ ଏକ ଜେଲକୁ ହାଇଜାକ କରିନେଇଥିବା ପ୍ଳଟ ଉପରେ ଫିଲ୍ମଟି ପର୍ୟ୍ୟବସିତ । ‘ଘୋଷ୍ଟ’୧୯ ଅକ୍ଟୋବରରେ ରିଲିଜ ହେବାର ଅଛି ।
ଭଗବନ୍ତ କେଶରୀ- ଦଶହରାରେ ଧୂମ ମଚେଇବାକୁ ଯାଉଛି ତେଲଗୁ ଚଳଚ୍ଚିତ୍ର ‘ଭଗବନ୍ତ କେଶରୀ’ । ‘ଭଗବନ୍ତ କେଶରୀ’ ଏମିତି ଏକ ବାପର କାହାଣୀ ଯିଏ ନିଜ ଝିଅ ପାଇଁ ସାରା ଦୁନିଆ ସହ ଲଢିବାକୁ ପ୍ରସ୍ତୁତ । ଫିଲ୍ମରେ ଅର୍ଜୁନ ରାମପାଲଙ୍କୁ ଭିଲେନ ଭୂମିକାରେ ଦେଖିବାକୁ ମିଳିବ । ଏହି ଫିଲ୍ମଟି ମଧ୍ୟ ଦଶହରାକୁ ରିଲିଜ ହେବ ।
