ପୁଣି ଟେଲିଭିଜନ ଜଗତରେ ଦୁଃଖଦ ଖବର । ଆରପାରିରେ ପ୍ରସିଦ୍ଧ କଳାକାର ନିତେଶ ପାଣ୍ଡେ । ଖବର ଅନୁଯାୟୀ ହୃଦଘାତ କାରଣରୁ ୫୧ ବର୍ଷ ବୟସରେ ନିତେଶ ପାଣ୍ଡେଙ୍କର ମୃତ୍ୟୁ ହୋଇଛି । ନିତେଶ ପାଣ୍ଡେ ଗତ ୨୫ ବର୍ଷ ହେବ ସେ ଟେଲିଭିଜନ ଦୁନିଆରେ କାମ କରିବା ସହ ଧାରାବାହିକ “ଅନୁପମା”ରେ ଅଭିନୟ କରି ଦର୍ଶକଙ୍କ ମନ କିଣିପାରିଥିଲେ ।
ମୃତ୍ୟୁର କିଛି ସମୟ ପୂର୍ବରୁ ସେ ଛୁଟି ମନାଉଥିବାର ଏକ ଭିଡିଓ ମଧ୍ୟ ସୋସିଆଲ ମିଡ଼ିଆରେ ପୋଷ୍ଟ କରିଥିଲେ । ହେଲେ ମାତ୍ର କେଇଘଣ୍ଟା ପରେ ମୁମ୍ବାଇ ନିକଟବର୍ତ୍ତୀ ଇଗତପୁରୀ ଠାରେ ତାଙ୍କର ମୃତ୍ୟୁ ହୋଇଛି । ନିତେଶ ପାଣ୍ଡେଙ୍କ ମୃତ୍ୟୁ ଟେଲିଭିଜନ ତାରକାଙ୍କ ମଧ୍ୟରେ ଶୋକର ଛାୟା ଖେଳାଇଦେଇଛି ।
୧୯୯୦ ମସିହାରେ ଥିଏଟରରୁ ନିଜର ଅଭିନୟ ଜୀବନ ଆରମ୍ଭ କରିଥିଲେ ନିତେଶ ପାଣ୍ଡେ । କେବଳ ଟେଲିଭିଜନ ନୁହେଁ ସେ କିଛି ହିନ୍ଦୀ ସିନେମାରେ ମଧ୍ୟ ସେ ଅଭିନୟ କରିଛନ୍ତି । ହିନ୍ଦୀ ସିନେମା ‘ଓମ୍ ଶାନ୍ତି ଓମ’ରେ ସେ ଶାହାରୁଖ ଖାନଙ୍କ ସହ ଅଭିନୟ କରିବାର ସୁଯୋଗ ପାଇଥିଲେ । ଏଥିସହ ଫିଲ୍ମ ‘ବଧାଇ ଦୋ’, ‘ହଣ୍ଟର’, ‘ଦବଙ୍ଗ-୨’, ‘ବାଜି’, ‘ମେରେ ୟାର କି ସାଦି ହେ’ ରେ ଅଭିନୟ କରିଥିଲେ । କେବଳ ଅଭିନୟ ନୁହେଁ ନିଜର ସୁନ୍ଦର କଣ୍ଠ ପାଇଁ ମଧ୍ୟ ବେଶ୍ ପରିଚିତ ଥିଲେ ନିତେଶ ।
