ଭୁବନେଶ୍ୱର,୦୪.୦୪.୨୦୨୩ (ଏନଏନଏସ ଓଡ଼ିଆ) : ରାଜଧାନୀରେ ଅଭାବନୀୟ ଘଟଣା । 6 ବୁଲା କୁକୁରଙ୍କୁ ବିଷ ଦେଇ ହତ୍ୟା କରିଛି କେହି ଦୁର୍ବୃତ୍ତ । କୁହାଯାଏ କୁକୁର ହେଉଛି ସବୁଠୁ ବିଶ୍ୱସ୍ତ ଜୀବ । ଗଣ୍ଡେ ଖାଇବାକୁ ଦେଇଦେଲେ ସେ ଆପଣାର ହେଇଯାଏ । ହେଲେ କୁକୁର ବିଶ୍ୱାସରେ ବିଷ ଦେଇଛି ମଣିଷ । ଗୋଟିଏ ରାତିରେ ୬ଟି କୁକୁର କୁ ହତ୍ୟା କରାଯାଇଥିବା ଅଭିଯୋଗ ଆସିଛି । ଖାଦ୍ୟରେ ବିଷ ଦେଇ କୁକୁରଙ୍କୁ ମାରିଥିବା ନେଇ ଥାନାରେ ଅଭିଯୋଗ ହୋଇଛି।
ରାସ୍ତା ଉପରେ ଏକାଠି ପଡି ରହିଛି ୬ଟି କୁକୁରଙ୍କ ମୃତଦେହ । ସମସ୍ତଙ୍କ ପାଟିରୁ ବାହାରୁଛି ଫେଣ । ଏମିତି ହୃଦୟ ବିଦାରକ ଚିତ୍ର ଦେଖିବାକୁ ମିଳିଛି ଭୁବନେଶ୍ୱରର ମୈତ୍ରୀବିହାର ଥାନା ଅଧିନ ଶ୍ରୀଅନ ବସ୍ତିରେ । ରବିବାର ରାତିରେ ଏହି କୁକୁରଙ୍କୁ କେହି ଖାଦ୍ୟରେ ବିଷ ଦେଇ ହତ୍ୟା କରିଛି । ବସ୍ତି ବାସିନ୍ଦା କହିବା ଅନୁସାରେ , କୁକୁର ଗୁଡ଼ିକ ପରିବାର ସଦସ୍ୟ ଭଳି ବସ୍ତିରେ ରହୁଥିଲେ । ସୁରକ୍ଷାକର୍ମୀ ଭଳି ବସ୍ତିକୁ ଜଗିଥାନ୍ତି । ହେଲେ ରାତିରେ ହଠାତ କୁକୁରମାନେ ବିକଳ ଚିତ୍କାର କରିଥିଲେ। ସକାଳେ ଦେଖିଲା ବେଳକୁ ୬ଟି କୁକୁର ମରି ପଡ଼ିଛନ୍ତି ।
ଖବର ପାଇବା ପରେ ପିପୁଲ ଫର୍ ଆନିମଲ ଟିମର ସଦସ୍ୟ ଘଟଣାସ୍ଥଳରେ ପହଞ୍ଚିଥିଲେ । ଗୁରୁତର ଥିବା ଆଉ ୩ଟି କୁକୁରକୁ ପଶୁ ଡାକ୍ତରଖାନାକୁ ଚିକିତ୍ସା ପାଇଁ ପଠାଯାଇଛି । ତେବେ କୁକୁରଙ୍କୁ କିଏ ମାରିଲା, ସେନେଇ ପିପୁଲ ଫର ଆନିମଲ ପକ୍ଷରୁ ମୈତ୍ରୀବିହାର ଥାନାରେ ଲିଖିତ ଅଭିଯୋଗ କରାଯାଇଛି । ସେପଟେ ଅଭିଯୋଗ ପରେ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।
ପ୍ରଶ୍ନ ଉଠୁଛି କିଏ ଓ କାହିଁକି ଏ ବୁଲା କୁକୁରଙ୍କୁ ହତ୍ୟା କରିଛି ? କୁକୁର ମାରିବା ପଛର ଉଦ୍ଦେଶ୍ୟ କ’ଣ ? ଖାଦ୍ୟରେ ବିଷ ଦେଇଛନ୍ତି ନା ଆଉ କିଛି କାରଣ ରହିଛି। କାରଣ ଜାଣିବା ପାଇଁ ମୃତ କୁକୁରଙ୍କର ଶବ ବ୍ୟବଛେଦ ପାଇଁ ଓୟୁଏଟି ପଠାଯାଇଛି । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ରିପୋର୍ଟ ଆଧାରରେ ତଦନ୍ତକୁ ଆଗକୁ ବଢାଇବ ପୋଲିସ ।
