ନୂଆଦିଲ୍ଲୀ,(ଏନଏନଏସ ଓଡ଼ିଆ /୧୫.୦୩): ବିଶ୍ବର ସର୍ବାଧିକ ପ୍ରଦୂଷିତ ରାଷ୍ଟ୍ର ତାଲିକାରେ ଅଷ୍ଟମ ସ୍ଥାନ ହାସଲ କରିଛି ଭାରତ । ବିଶ୍ବର ପ୍ରାୟ ୭ ହଜାର ୩୦୦ ସହର ମଧ୍ୟରୁ ଭାରତର ସହରଗୁଡିକ ଅଧିକ ପ୍ରଦୂଷିତ ଥିବା ଜଣାଯାଇଛି । ସର୍ବାଧିକ ପ୍ରଦୂଷିତ ରାଷ୍ଟ୍ର ତାଲିକାରେ ପ୍ରଥମରେ ରହିଛି ଚାଦ୍ । ଦ୍ବିତୀୟରେ ଇରାକ, ତୃତୀୟରେ ପାକିସ୍ତାନ, ଚତୁର୍ଥରେ ବାହାରିନ, ପଞ୍ଚମରେ ବାଂଲାଦେଶ, ଅଷ୍ଟମରେ ଭାରତ ଓ ଦଶମରେ ତାଜିକସ୍ତାନ ରହିଛି । ସହର ମଧ୍ୟରେ ପାକିସ୍ତାନର ଲାହୋର ପ୍ରଥମ ସ୍ଥାନରେ ଥିବାବେଳେ ଚୀନର ହୋତାନ ସହର ଦ୍ବିତୀୟ ସ୍ଥାନରେ ରହିଛି । ରାଜସ୍ଥାନର ଭିଓ୍ବାଣ୍ଡି ତୃତୀୟ ସ୍ଥାନରେ ଓ ଦିଲ୍ଲୀ ଚତୁର୍ଥ ସ୍ଥାନରେ ରହିଛନ୍ତି । ସେହିପରି ପାକିସ୍ତାନର ପେଶଓ୍ବାର ପଞ୍ଚମ, ବିହାରର ଦରଭଙ୍ଗା ଷଷ୍ଠ, ବିହାରର ପାଟନା ଦଶମ, ଉତ୍ତରପ୍ରଦେଶର ଗାଜିଆବାଦ ଏକାଦଶ ସ୍ଥାନରେ ରହିଛି ।
ବଡ଼କଥା ହେଉଛି ବିଶ୍ବର ସର୍ବାଧିକ ୧୦ଟି ପ୍ରଦୂଷିତ ସହର ମଧ୍ୟରୁ କେବଳ ଭାରତର ରହିଛି ୬ଟି ସହର । ପ୍ରଥମ ୨୦ଟି ସହର ତାଲିକାରେ ଭାରତର ରହିଛି ୧୪ଟି ସହର । କୋଲକାତାର ସ୍ଥାନ ୯୯ରେ ଥିବାବେଳେ ମୁମ୍ବାଇର ସ୍ଥାନ ୧୩୭, ହାଇଦ୍ରାବାଦର ସ୍ଥାନ ୧୯୯ ରହିଛି । ବେଙ୍ଗାଳୁରୁର ସ୍ଥାନ ୪୪୦ ହୋଇଥିବାବେଳେ ଚେନ୍ନାଇର ସ୍ଥାନ ୬୮୨ ରହିଛି । ସୁଇସ ଫାର୍ମ ଆଇକ୍ୟୁଏୟାର ପକ୍ଷରୁ କରାଯାଇଥିବା ସର୍ଭେରେ ବିଶ୍ବର ୧୩୧ଟି ଦେଶକୁ ବିଚାରକୁ ନିଆଯାଇଥିଲା । ସରକାରୀ ଓ ବେସରକାରୀସ୍ତରରେ ପ୍ରାୟ ୩୦ ହଜାର ଗ୍ରାଉଣ୍ଡବେସଡ ମନିଟରିଂ କରାଯାଇଥିଲା । ବାୟୁ ପ୍ରଦୂଷଣ କାରଣରୁ ଭାରତରେ କ୍ଷତି ପରିମାଣ ୧୫୦ ବିଲିୟନ ଡଲାର ହୋଇଥିବାବେଳେ କେବଳ ପରିବହନ କ୍ଷେତ୍ରର ପ୍ରଦୂଷଣ ୨୦ରୁ ୩୫ ପ୍ରତିଶତ ବୋଲି କୁହାଯାଇଛି । ଶିଳ୍ପ, କୋଇଲା ପ୍ଲାଣ୍ଟ, ଜୈବ ଜାଳେଣି କାରଣରୁ ଭାରତରେ ପ୍ରଦୂଷଣ ବଢ଼ୁଥିବା କୁହାଯାଉଛି ।
