ଶିମିଳିପାଳରେ  ହୁତୁ ହୁତୁ ହୋଇ ଜଳୁଛି ନିଆଁ

ଭୁବନେଶ୍ବର,(ଏନଏନଏସ ଓଡ଼ିଆ /୧୫.୦୨): ଖରା ଦିନ ଆରମ୍ଭ ନହେଉଣୁ  ଶିମିଳିପାଳ ଜଙ୍ଗଲରେ  ହୁତୁ ହୁତୁ ହୋଇ ଜଳୁଛି ନିଆଁ । ଶିମିଳିପାଳ ଉପରମୁଣ୍ଡ ମାଣିକପୁର ଅଞ୍ଚଳରେ କିଛି ଦିନ ହେଲା ନିଆଁ ଲାଗିଥିବା ବେଳେ ଏପର୍ଯନ୍ତ ନିଆଁକୁ ଆୟତ କରାଯାଇନି । ନିଆଁଲାଗି ବିଭିନ୍ନ ଔଷଧୀୟ ଗୁଳ୍ମରୁ ନେଇ ବଡ ବଡ ଗଛ ସବୁ ପୋଡି ନଷ୍ଟ ହେବାରେ ଲାଗିଛି । ପୂର୍ବରୁ ଶିମିଳିପାଳରେ ନିଆଁ ଲାଗିବା ଘଟଣା ନେଇ ବହୁ ଚର୍ଚ୍ଚା ପାଲଟିଥିବା ବେଳେ ଏବେ ପୁଣି ଜଳୁଛି ଶିମିଳିପାଳ ଜଙ୍ଗଲ । ଏମିତିକି ନିଆଁ ବଢି ବଢି ଚାଲିଥିବା ବେଳେ ଲିଭିବାର ନାଁ ନେଉନି । ଏବେଠାରୁ ନିଆଁକୁ ଆୟତ କରାନଗଲେ ଜଙ୍ଗଲରୁ ବହୁ ଗଛ ପୋଡି ନଷ୍ଟ ହୋଇଯିବ । ପ୍ରତିବର୍ଷ ଏହିଭଳି ଜଙ୍ଗଲରେ ନିଆଁ ଲାଗି ବହୁ ଗଛ ପୋଡି ନଷ୍ଟ ହେଉଛି । ଚଳିତବର୍ଷ ମଧ୍ୟ ନିଆଁ ଲାଗି ବ୍ୟାପିବାରେ ଲାଗିଲାଣି । ହେଲେ ଏଥିପ୍ରତି କାହାର ଯେମିତି ନିଘା ନାହିଁ । ଏଠି ପ୍ରଶ୍ନ ଉଠୁଛି ଜଙ୍ଗଲରେ କେମିତି ଲାଗୁଛି ନିଆଁ ? କିଏ ଲଗାଉଛି  ନା ଆପେ ଲାଗୁଛି ନିଆଁ । ଘଟଣାକୁ ନେଇ ବନ ବିଭାଗ ମଧ୍ୟ ପଡିଛି ଚିନ୍ତାରେ ।