ତାରାଙ୍କ ମୁହଁରେ ନବୀନଙ୍କ ପ୍ରଶଂସାକୁ ନେଇ ଚର୍ଚ୍ଚା ଜୋର୍‌

ଏନଏନ ଏସ ଓଡ଼ିଆ (୦୪.୦୨): କଂଗ୍ରେସର ଟାଣୁଆ ନେତା ତଥା ବିଧାୟକ ତାରା ବାହିନୀ ପତିଙ୍କ ମୁହଁରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରଶଂସାକୁ ନେଇ ଚାଲିଛି ଜୋର୍‌ଦାର୍ ଚର୍ଚ୍ଚା । ଗତକାଲି ଜୟପୁର ବିକ୍ରମ ଦେବ କଲେଜର ପ୍ଲାଟିନମ୍ ଜୁବୁଲି ଉତ୍ସବ କୁ ଅତିଥି ହୋଇ ଆସିଥିଲେ ତାରା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଅତିଥି ଭାବେ ଯୋଗ ଦେଇଥିଲେ । ଏହା ସହିତ ୫ଟି ସଚିବ ପାଣ୍ଡିଆନ୍‌, ବିଜେଡିର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ମଧ୍ୟ ଯୋଗ ଦେଇଥିଲେ ଏହି ସମାରୋହରେ । କଂଗ୍ରେସ ବିଧାୟକ ତାରାବାହିନୀ ପତି ଏହି ମଂଚରେ ଯେତେବେଳେ ଭାଷଣ ଦେବାକୁ ଆରମ୍ଭ କଲେ ତାଙ୍କ ମୁହଁରେ ଖାଲି ମୁଖ୍ୟମନ୍ତ୍ରୀ ନବୀନଙ୍କର ଭୁରି ଭୁରି ପ୍ରଶଂସା ଶୁଣିବାକୁ ମିଳିଥିଲା । କେବଳ ମୁଖ୍ୟମନ୍ତ୍ରୀଙ୍କର ପ୍ରଶଂସା ସେ କରିଥିଲେ ତାହାନୁହେଁ, ୫ଟି ସଚିବ ପାଣ୍ଡିଆନ୍ ଓ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ବି ତାରା ଯେମିତି ପ୍ରଶଂସା ତ୍କଲେ ଲାଗୁଥିଲା ତାଙ୍କର ଏହି ପ୍ରଶଂସା ମୂଳରେ କିଛି ରାଜନୈତିକ ଅଭିସନ୍ଧି ଲୁଚି ରହିନି ତ । କାରଣ ଯେଉଁଁଲୋକ ମୁଖ୍ୟମନ୍ତ୍ରୀଙ୍କୁ ଗୃହ ବାହାରେ ଓ ଭିତରେ ସିଧା ନିଶାନା କରିଥାନ୍ତି ତାଙ୍କର ଏହି ପଲଟମାର୍ ପଲିଟିକ୍ସ ସମସ୍ତଙ୍କୁ ଆଶ୍ଚର୍ଯ୍ୟ କରିପକାଇଥିଲା ଓ ସନ୍ଦେହ ଘେରକୁ ନେଇ ଆସିଛି ।