ଦେଶର ସମ୍ବିଧାନ ତିନୋଟି ମୁଖ୍ୟ ସ୍ତମ୍ଭ ମଧ୍ୟରେ କ୍ଷମତାର ପୃଥକୀକରଣ କରିଛି । ତେଣୁ ଆମେ ଦାୟିତ୍ୱ ନିର୍ବାହ କରିବା ସମୟରେ ଧାର୍ଯ୍ୟ ‘ଲକ୍ଷ୍ମଣରେଖା’ ପ୍ରତି ଦୃଷ୍ଟି ଦେବା ଉଚିତ | ଯଦି ଏହା ଆଇନ ଅନୁଯାୟୀ ହୁଏ ତେବେ ନ୍ୟାୟପାଳିକା ଶାସନ ପଥରେ କେବେ ବି ଆସିବ ନାହିଁ। ଉଭୟ ମୁଖ୍ୟମନ୍ତ୍ରୀ ଏବଂ ହାଇକୋର୍ଟ ପ୍ରଧାନ ବିଚାରପତିଙ୍କ ଯୁଗ୍ମ ସମ୍ମିଳନୀକୁ ଉଦ୍ବୋଧନ ଦେଇ ଏହା କହିଛନ୍ତି ସୁପ୍ରିମକୋର୍ଟ ପ୍ରଧାନ ବିଚାରପତି ଏନ. ଭି ରମଣ।
ଦିଲ୍ଲୀରେ ଆୟୋଜିତ ଏହି କାର୍ଯ୍ୟକ୍ରମକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ଘାଟନ କରିଥିଲେ। ଏଥିରେ ଦେଶର ସମସ୍ତ ହାଇକୋର୍ଟର ପ୍ରଧାନ ବିଚାରପତି ତଥା ସବୁ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ | ପ୍ରଧାନ ବିଚାରପତି ଏନ.ଭି ରମଣ, ଦେଶରେ ବିଚାରାଧୀନ ମାମଲା ସମେତ ଆହୁରି ଅନେକ ପ୍ରସଙ୍ଗରେ ନିଜର ମତ ଦେଇଛନ୍ତି।
ସେ କହିଛନ୍ତି ଯେ, କୋର୍ଟର ନିଷ୍ପତ୍ତି ପରେ ମଧ୍ୟ ଅନେକ ଥର ସରକାର ଜାଣିଶୁଣି କାର୍ଯ୍ୟକାରୀ କରନ୍ତି ନାହିଁ, ଏହା ଗଣତନ୍ତ୍ର ପାଇଁ ଶୁଭ ସଂକେତ ନୁହେଁ। ଦେଶର ତିନୋଟି ମୁଖ୍ୟ ଅଙ୍ଗ ମଧ୍ୟରେ ଉଚିତ ସମନ୍ୱୟ ରହିଲେ ହିଁ ଗଣତନ୍ତ୍ର ସୁଦୃଢ ହେବ ବୋଲି କହିଛନ୍ତି ପ୍ରଧାନ ବିଚାରପତି । ପ୍ରଧାନମନ୍ତ୍ରୀ ମୋଦୀଙ୍କ ସାମ୍ନାରେ ପ୍ରଧାନ ବିଚାରପତି ସରକାରଙ୍କ ମନୋଭାବକୁ ନେଇ ଚିନ୍ତା ପ୍ରକଟ କରିଥିଲେ।
