ପୁଣି ଭାଇଚାରା ଉଦାହରଣ ସୃଷ୍ଟି କଲା କେନ୍ଦ୍ରାପଡ଼ା। ବିଭିନ୍ନ ସ୍ଥାନରେ ଦୁଇ ସମ୍ପ୍ରଦାୟ ମଧ୍ୟରେ ତିକ୍ତତା ଦେଖାଯାଉଥିବା ବେଳେ ଆଜି ଇଫତାର ପାର୍ଟିରେ ଏକାଠି ହୋଇଛନ୍ତି ସବୁ ଦଳର ନେତା | ରାଜନୈତିକ ଶତୃତାକୁ ଭୁଲି ଗୋଟିଏ ମଞ୍ଚରେ ଏକାଠି ହୋଇଛନ୍ତି ବିଜେଡି, ବିଜେପି ଓ କଂଗ୍ରେସ ନେତା | ଯାହାକି ଆଗାମୀ ପିଢ଼ି ପାଇଁ ଏକ ଶୁଭ ସୂଚନା ବୋଲି କୁହାଯାଉଛି ।
କେନ୍ଦ୍ରାପଡା ପୌର ଟାଉନ ହଲରେ ଆଜି ସର୍ବଦଳୀୟ ଇଫତାର ପାର୍ଟି ଆୟୋଜିତ ହୋଇଛି । ମୁସଲମାନମାନଙ୍କ ଓଷା ପରିପ୍ରେକ୍ଷୀରେ ଏହି ଇଫତାର ପାର୍ଟିର ଆୟୋଜନ କରିଥିଲେ କେନ୍ଦ୍ରାପଡା ପୌରାଧ୍ୟକ୍ଷା ସରିତା ସାହୁ । ହିନ୍ଦୁ ମୁସଲମାନମାନଙ୍କ ମଧ୍ୟରେ ଭାଇଚାରାର ସମ୍ପର୍କକୁ ସୁଦୃଢ କରିବାକୁ ଏଠାରେ ହିନ୍ଦୁ ମୁସଲମାନମାନେ ଏକାଠି ହୋଇ ଇଫତାର ପାର୍ଟିରେ ଯୋଗ ଦେଇଥିଲେ । ସବୁଠାରୁ ଚର୍ଚ୍ଚାରେ ରହିଥିଲା ଗୋଟିଏ ସ୍ଥାନରେ କଂଗ୍ରେସ, ବିଜେପି ଓ ବିଜେଡି ନେତାମାନେ ଏକାଠି ହୋଇ ଇଫତାର ଭୋଜିର ମଜା ନେଇଥିଲେ | ନିକଟରେ ପୌର ନିର୍ବାଚନ ଲଢେଇ ସମାପ୍ତ ହୋଇଥିବା ବେଳେ ରାଜନେତାମାନେ ପରସ୍ପର ମଧ୍ୟରେ ଥିବା ରାଜନୈତିକ ଶତୃତାକୁ ଭୁଲି ଗୋଟିଏ ମଞ୍ଚରେ ଏକାଠି ହୋଇଥିଲେ | କେନ୍ଦ୍ରାପଡା ବିଧାୟକ ଶଶୀଭୂଷଣ ବେହେରା ମଧ୍ୟ ଏହି ଇଫତାର ପାର୍ଟିରେ ଯୋଗଦେଇ ମୁସଲମାନଙ୍କ ଟୋପି ଆଉ ଚଦର ବ୍ୟବହାର କରିବାକୁ ଭୁଲିନଥିଲେ ।
