ସିଗାରେଟ୍ ନଦେବାରୁ ଦୋକାନୀଙ୍କୁ ଗୁଳିମାଡ଼ | ନିଶାସକ୍ତ ଅବସ୍ଥାରେ ଥିବା ଦୁଇ ଜଣ ଯୁବକ ଜଣେ ଦୋକାନୀଙ୍କ ଉପରକୁ ଗୁଳିମାଡ କରିଛନ୍ତି | କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଖଡିବାହାଲି ଛକରେ ହୋଇଛି ଗୁଳିକାଣ୍ଡ | ଦୋକାନୀ ଜଗବନ୍ଧୁ ମହାପାତ୍ର (୫୫)ଙ୍କ ଗୁରୁତର ଆହତ ହୋଇଛନ୍ତି | ତାଙ୍କୁ ପ୍ରଥମେ ହରିଚନ୍ଦନପୁର ଓ ପରେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି |
ସୂଚନା ଅନୁସାରେ ଗତକାଲି ରାତି ପ୍ରାୟ ସାଢେ ୯ ଟା ସମୟରେ ଦୁଇ ଜଣ ଯୁବକ ନିଶାସକ୍ତ ଅବସ୍ଥାରେ ଆସି ଜଗବନ୍ଧୁଙ୍କୁ ସିଗାରେଟ୍ ମାଗିଥିଲେ। ତେବେ ଦୋକାନ ବନ୍ଦ ହୋଇଯାଇଥିବାରୁ ସେ ସିଗାରେଟ୍ ଦେବାକୁ ମନା କରିଦେଇଥିଲେ। ଏହାକୁ କେନ୍ଦ୍ର କରି ଜଗବନ୍ଧୁଙ୍କ ସହିତ ତାଙ୍କର ବଚସା ହୋଇଥିଲା। ପରେ ଜଣେ ଯୁବକ ଜଗବନ୍ଧୁଙ୍କ ଉପରକୁ ଗୁଳିମାଡ଼ କରି ସେଠାରୁ ଫେରାର୍ ହୋଇଯାଇଥିଲେ। ଖବରପାଇ ଘସିପୁରା ଦୈତାରୀ ଓ ହରିଚନ୍ଦନପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଛାନଭିନ ଚଳାଇଛନ୍ତି। ଗୁଳି ମାରିଥିବା ଯୁବକ ଘସିପୁରା ଥାନା ଅନ୍ତର୍ଗତ ବରୀପାଲ ଗ୍ରାମର ସିପୁ ପାତ୍ର ବୋଲି ଜଗବନ୍ଧୁଙ୍କ ପୁଅ ପିଣ୍ଟୁ ଅଭିଯୋଗ କରିଛନ୍ତି।
