ହାତରେ ବନ୍ଧୁକ, କାନ୍ଧରେ ଖଟିଆ | ଗର୍ଭବତୀଙ୍କୁ ଖଟିଆରେ ବୋହିକି ନେଲେ ଯବାନ | ପ୍ରସବ ଯନ୍ତ୍ରଣା ଭୋଗୁଥିବା ଜଣେ ଗର୍ଭବତୀ ମହିଳାଙ୍କୁ ଯବାନ ଖଟିଆରେ ବୋହି ଡାକ୍ତରଖାନାକୁ ନେଇଥିଲେ। ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରଲ ହେବାରେ ଲାଗିଛି |
ନକ୍ସଲ ପ୍ରଭାବିତ ଛତିଶଗଡରେ ଜିଲ୍ଲା ରିଜର୍ଭ ଗାର୍ଡ ଫୋର୍ସର ଯବାନମାନେ ମାନବିକତାର ଏକ ଉଦାହରଣ ସୃଷ୍ଟି କରିଛନ୍ତି। ଦାନ୍ତେୱାଡାରେ ସର୍ଚ୍ଚ ଅପରେସନ୍ ସମୟରେ ଗର୍ଭବତୀ ମହିଳାଙ୍କୁ ଯବାନ ଖଟିଆରେ ବୋହି ଡାକ୍ତରଖାନାକୁ ନେବା ଚର୍ଚ୍ଚାର ବିଷୟ ପାଲଟିଛି | ଯବାନଙ୍କ ଏହି ମହାନତା ପାଇଁ ଏବେ ଚାରିଆଡୁ ତାଙ୍କୁ ପ୍ରସଂଶାର ସୁଅ ଛୁଟୁଛି |
ଦାନ୍ତେୱାଡାର ମାଓ ପ୍ରବଣ ଅଂଚଳ ରେୱାଲି ଗ୍ରାମ ରାସ୍ତାର ଅନେକ ସ୍ଥାନକୁ ନକ୍ସଲମାନେ କାଟି ଦେଇଛନ୍ତି | ଏହି ସମୟରେ ଜଣେ ଗର୍ଭବତୀ ମହିଳାଙ୍କ ପ୍ରସବ ଯନ୍ତ୍ରଣା ଆରମ୍ଭ ହୋଇଯାଇଥିଲା | ତାଙ୍କ ସ୍ୱାମୀ ଯେତେବେଳେ ଆମ୍ବୁଲାନ୍ସକୁ ଫୋନ କଲେ ଗାଁ ରାସ୍ତା କଟା ଯାଇଥିବାରୁ ସେମାନେ ଆସିବାକୁ ମନା କରିଦେଇଥିଲେ | ତେବେ ଯବାନମାନେ ଏକ ଖଟିଆକୁ ଷ୍ଟ୍ରେଚର୍ କରି ମହିଳାଙ୍କୁ ପ୍ରାୟ ୩ କିଲୋମିଟର ପର୍ଯ୍ୟନ୍ତ ନେଇଥିଲେ | ସେଠାରୁ ପାଟ୍ରୋଲିଂ ଗାଡିରେ ତାଙ୍କୁ ୯୦ କିଲୋମିଟର ଦୂରରେ ଥିବା ପାଲନାର ହସ୍ପିଟାଲକୁ ନିଆଯାଇଥିଲା | ତେବେ ଉଭୟ ଶିଶୁ ଏବଂ ମା ଏବେ ସୁସ୍ଥ ଥିବା ଜଣାପଡିଛି |
