ମର୍ମନ୍ତୁଦ ସଡ଼କ ଦୁର୍ଘଟଣା । ଦୁର୍ଘଟଣାରେ ଚାଲିଗଲା ୪ ଜଣଙ୍କ ଜୀବନ | ଏକ ବାଇକ୍ ଉପରେ ପିକ୍ଅପ୍ ଭ୍ୟାନ୍ ମାଡ଼ିଯିବାରୁ ଚାଲିଗଲା ବାପା, ଦୁଇ ଝିଅ ଓ ନାତିର ଜୀବନ | ଏଭଳି ହୃଦୟବିଦାରକ ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଗାଙ୍ଗପୁର ଥାନା ଇନ୍ଦନପୁରରେ |
ଗାଙ୍ଗପୁରରୁ କାମ ସାରି ମୁନିଗାଡି ଫେରୁଥିବା ବେଳେ ଘଟିଛି ଏହି ଦୁର୍ଘଟଣା । ଏକ ବାଇକକୁ ପିକଅପ୍ ଭ୍ୟାନ୍ ପଛରୁ ପିଟିବାରୁ ୪ ଜଣଙ୍କ ମୃତ୍ୟୁ ଘଟିଛି । ମୃତକ ହେଲେ ବାପା ଜୟରାମ ପାତ୍ର ଓ ଦୁଇ ଝିଅ ଲଷ୍ମୀ ପାତ୍ର ଓ ରିଙ୍କି ନାୟକ ଏବଂ ୩ବର୍ଷର ନାତି ବିଶ୍ୱଜିତ ପାତ୍ର । ବାଇକରେ ଦୁଇ ଝିଅ ଓ ନାତିକୁ ନେଇ ମୁନିଗାଡି ଗାଁରୁ ସମସ୍ତେ ଭଞ୍ଜନଗର ଯାଉଥିବାବେଳେ ଇନ୍ଦନପୁର ଛକରେ ସମ୍ବଲପୁର ଅଭିମୁଖେ ଯାଉଥିବା ଏକ ଭ୍ୟାନ ସେମାନଙ୍କୁ ଧକ୍କା ଦେଇଥିଲା । ଜୟରାମଙ୍କୁ ପିକ୍ଅପ୍ ଭ୍ୟାନ୍ଟି ଚାପି ଦେଇଥିଲା। ତାଙ୍କ ଦୁଇ ଝିଅ ଓ ନାତି ଛିଟିକି ପଡ଼ିଥିଲେ। ଜୟରାମ ଓ ତାଙ୍କ ଦୁଇ ଝିଅଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ତାଙ୍କ ନାତି ବିଶ୍ୱଜିତ ପାତ୍ରଙ୍କୁ ଆସିକା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ | ଏହି ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ମୃତକଙ୍କ ପରିବାରକୁ କ୍ଷତିପୂରଣ ପ୍ରଦାନ ଦାବିରେ ସ୍ଥାନୀୟ ଲୋକେ ରାସ୍ତା ଅବରୋଧ କରିଥିଲେ।
