କର୍ଲାପାଟ ପ୍ରାଣୀଧନ ନୀରିକ୍ଷକ ଗଣେଶ ପୂଜାରୀ ନିଲମ୍ବିତ

କଳାହାଣ୍ଡି : କର୍ଲାପାଟ ପ୍ରାଣୀଧନ ନୀରିକ୍ଷକ ନିଲମ୍ବିତ ।  ଗତ ୨୦ ଦିନ ମଧ୍ୟରେ କର୍ଲାପାଟ ଅଭୟାରଣ୍ୟରେ ୭ ହାତୀଙ୍କ ମୃତ୍ୟୁ ହୋଇ ସାରିଲାଣି। କେନ୍ଦ୍ରୀୟ ଟିମ୍ ଆସି ଘଟଣାର ତଦନ୍ତ କରିଥିବା ବେଳେ କର୍ତ୍ତବ୍ୟରେ ଅବହେଳା ପାଇଁ କର୍ଲାପାଟ ପ୍ରାଣୀଧନ ନିରୀକ୍ଷକ ଗଣେଶ ପୂଜାରୀଙ୍କୁ ନିଲମ୍ବନ କରାଯାଇଛି। ସବୁ ହାତୀ ମୃତ୍ୟୁର କାରଣ ହାମରେଜିକ୍ ସେପଟିସେମିଆ ବୋଲି ସ୍ପଷ୍ଟ କରିଛନ୍ତି କେନ୍ଦ୍ରୀୟ ଟିମ୍ । ତେବେ ଅଭୟାରଣ୍ୟ ଭିତରେ ଏହି ରୋଗ କିପରି ହାତୀକୁ ସଂକ୍ରମିତ ହେଲା ତାକୁ ନେଇ ଅଧିକ ଅନୁଧ୍ୟାନ କରାଯିବ ବୋଲି ବିଶେଷଜ୍ଞ କହିଛନ୍ତି। ଗର୍ଭବତୀ ଥିବା ଗୋଟିଏ ହାତୀକୁ ପ୍ରଥମେ ସଂକ୍ରମଣ ହେବା ପରେ ଏହା ଅନ୍ୟ ଗର୍ଭିଣୀ ହାତୀଙ୍କୁ ବ୍ୟାପିଥାଇପାରେ ବୋଲି ସନ୍ଦେହ କରାଯାଉଛି। ଯେହେତୁ ହାତୀମାନେ ଗର୍ଭବତୀ ଥିଲେ ସେହି ସମୟରେ ସଂକ୍ରମଣ ସହଜରେ ବ୍ୟାପିଥାଇପାରେ ବୋଲି ପ୍ରାଣୀ ସମ୍ପଦ ବିଭାଗ ଅତିରିକ୍ତ ନିର୍ଦ୍ଦେଶକ କହିଛନ୍ତି। କର୍ତ୍ତବ୍ୟରେ ଅବହେଳା ପାଇଁ ଗଣେଶ ପୂଜାରୀଙ୍କୁ ନିଲମ୍ବନ କରିଛନ୍ତି ଜିଲ୍ଲା ମୁଖ୍ୟ ପ୍ରାଣୀଧନ ଚିକିତ୍ସା ଅଧିକାରୀ । ଅପରପକ୍ଷେ ହାତୀ ମୃତ୍ୟୁର ତଦନ୍ତ ପାଇଁ ଆସିଥିବା କେନ୍ଦ୍ରୀୟ ଟିମ୍ ମଧ୍ୟ ଅଭୟାରଣ୍ୟରେ ଘଟଣାର ଅନୁଧ୍ୟାନ କରି ଫେରିଛନ୍ତି । କର୍ଲାପାଟ ଅଭୟାରଣ୍ୟରେ ପୂର୍ବରୁ ୧୭ଟି ହାତୀ ଠାବ ହୋଇଥିଲା । ଏହି ହାତୀମାନେ ୨ଟି ଗୋଷ୍ଠୀରେ ରହୁଥିଲେ । ଗୋଟିଏ ଗୋଠରେ ୮ଟି ଓ ଅନ୍ୟ ଗୋଠରେ ୯ଟି ହାତୀ ରହୁଥିଲେ । ୮ଟି ଗୋଠ ମଧ୍ୟରୁ ୭ଟି ହାତୀଙ୍କ ମୃତ୍ୟୁ ହୋଇଛି ।