ରାଗ ଗୁରୁ ଚଣ୍ଡାଳ | କ୍ରୋଧର ବଶବର୍ତ୍ତୀ ହେଲେ ମଣିଷ ହରାଏ ତାର ବୁଦ୍ଧି ବିବେକ | ସେହିଭଳି ଭାବେ ଜଣେ ବଡ ଭାଇ ରାଗର ବଶବର୍ତ୍ତୀ ହୋଇ ହତ୍ୟା କରିଛି ତାର ସାନଭାଇକୁ | ସାନଭାଇର ମୁଣ୍ଡକୁ ଏକ ଧାରୁଆ ଅସ୍ତ୍ର ସାହାଯ୍ୟରେ ଆକ୍ରମଣ କରିବାରୁ ତାଙ୍କର ହୋଇଛି ମୃତ୍ୟୁ | ଯାଜପୁର ଜିଲ୍ଲା କାଳିଆପାଣି ଥାନା ଅଂଚଳରେ ଘଟିଛି ଏହି ହତ୍ୟାକାଣ୍ଡ | ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି |
କାଳିଆପାଣି ଥାନା ଅନ୍ତର୍ଗତ ଗୁରୁଜଙ୍ଗ ଗ୍ରାମରେ ବୁଧବାର ବିଳମ୍ବିତ ରାତିରେ ଘରୋଇ ବିବାଦକୁ ନେଇ ଦୁଇ ଭାଇ ମଧ୍ୟରେ ହୋଇଥିଲା ଗଣ୍ଡଗୋଳ | ଫଳରେ ବଡଭାଇ ମାଧ ମୁଣ୍ଡା ଉତ୍ୟକ୍ତ ହୋଇ ସାନ ଭାଇ ଜମାଦାର ମୁଣ୍ଡାଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ | ପରିବାର ଲୋକେ ସାନଭାଇ ଜମାଦାର ମୁଣ୍ଡାଙ୍କୁ ଗୁରୁତର ଅବସ୍ଥାରେ ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ହେଲେ ସେଠାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର | କାଳିଆପାଣି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି|
