ଶ୍ରୀକ୍ଷେତ୍ର ପୁରୀରେ ଗୁଳିକାଣ୍ଡ | ଶ୍ରୀମନ୍ଦିର ସେବାୟତଙ୍କୁ ଗୁଳି କରି ହତ୍ୟା । ଗୁଳି ମାଡରେ ସୁଆର ମହାସୁଆର ନିଯୋଗର ସମ୍ପାଦକ କୃଷ୍ଣଚନ୍ଦ୍ର ପ୍ରତିହାରୀଙ୍କ ହୋଇଛି ମୃତ୍ୟୁ । ଆଜି ପୁରୀ ବାରବାଟୀ ନିକଟରେ କୃଷ୍ଣଚନ୍ଦ୍ରଙ୍କ ମୁଣ୍ଡକୁ ଗୁଳିମାଡ଼ କରିଥିଲେ କିଛି ଦୁର୍ବୃତ୍ତ । ଘଟଣାସ୍ଥଳରେ ଟଳି ପଡ଼ିଥିଲେ କୃଷ୍ଣଚନ୍ଦ୍ର। ରକ୍ତ ଜୁଡୁବୁଡୁ ଅବସ୍ଥାରେ ତାଙ୍କୁ ପୁରୀ ସଦର ଚିକିତ୍ସାଳୟରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ କୃଷ୍ଣଚନ୍ଦ୍ରଙ୍କୁ ମୃତ ଘୋଷଣା କରିଥିଲେ ଡାକ୍ତର । ହତ୍ୟାକାଣ୍ଡ ପରେ ପୋଲିସ ଘଟଣାସ୍ଥଳରେ ପହଞ୍ଚି ଆରମ୍ଭ କରିଛି ତଦନ୍ତ ।
ଟାଉନ ଥାନା ଅଞ୍ଚଳର ବାରବାଟୀ ନିକଟରେ ଆଜି ଉନ୍ନୟନମୂଳକ କାମର ତଦାରଖ କରୁଥିଲେ କୃଷ୍ଣଚନ୍ଦ୍ର ପ୍ରତିହାରୀ | ଏହି ସମୟରେ ୨ ଦୁର୍ବୃତ୍ତ ଏକ ବାଇକ୍ରେ ଆସି ପହଞ୍ଚି ଥିଲେ। ପରେ କୃଷ୍ଣଚନ୍ଦ୍ରଙ୍କ ଉପରକୁ ଗୁଳିମାଡ କରି ଫେରାର ହୋଇଯାଇଥିଲେ | ତେବେ କେଉଁ କାରଣରୁ ସେବାୟତ ଜଣକୁ ହତ୍ୟା କରାଯାଇଛି ତାହା ସ୍ପଷ୍ଟ ହୋଇନାହିଁ | ଘଟଣାର ତଦନ୍ତ କରୁଛି ପୋଲିସ । ପୂର୍ବ ଶତ୍ରୁତା କିମ୍ବା ଅନ୍ୟ କେଉଁ କାରଣ ରହିଛି ତାହା ତଦନ୍ତ ପରେ ଜଣାପଡିବ ବୋଲି କହିଛି ପୋଲିସ | ଏହି ଘଟଣା ପରେ ମେଡିକାଲ ପରିସରରେ ଉତ୍ତେଜନା ପ୍ରକାଶ ପାଇଛି।
