କେନ୍ଦ୍ରାପଡାରେ ହୋଇଛି ଗୁଳିକାଣ୍ଡ। ଦୁଇଜଣ ଅଚିହ୍ନା ଯୁବକଙ୍କ ଗୁଳିରେ ପ୍ରାଣ ହରାଇଛନ୍ତି ଜଣେ ବ୍ୟକ୍ତି | ତାଙ୍କ ପତ୍ନୀ ଓ ପୁଅ ଗୁରୁତର ଆହତ ହୋଇଛନ୍ତି । ପତ୍ନୀଙ୍କ ଗୋଡରେ ବାଜିଛି ଗୁଳି । ତାଙ୍କୁ ଗୁରୁତର ଅବସ୍ଥାରେ କଟକ ମେଡିକାଲକୁ ସ୍ଥାନାନ୍ତର କରାଯାଇଛି | ଗୁଳିକାଣ୍ଡ ପଛରେ ପାରିବାରିକ କାରଣ ଥାଇପାରେ ବୋଲି ଅନୁମାନ କରାଯାଉଛି । ଗୁଳିକାଣ୍ଡ ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି | ସ୍ଥାନୀୟ ଲୋକେ ଦୁଇ ଆତତାୟୀଙ୍କୁ କାବୁ କରି ପୋଲିସର ଜିମା ଦେଇଛନ୍ତି । ଅଭିଯୁକ୍ତଙ୍କ ବାଇକକୁ ଉତ୍ୟକ୍ତ ଲୋକେ ଜାଳି ଦେଇଛନ୍ତି ।
ଆଜି ଅପରାହ୍ନ ୨ଟା ୪୦ ମିନିଟ | ଦୁଇଜଣ ଅଚିହ୍ନା ଯୁବକ ଏକ ବାଇକରେ ଆସି କେନ୍ଦ୍ରାପଡା ଜିଲ୍ଲା ମହାକାଳପଡା ଥାନା ଅନ୍ତର୍ଗତ ବବକରପୁର ଗାଁରେ ପହଂଚିଥିଲେ | ଗାଁରେ ଶୁଭକେଶ ମିଶ୍ରଙ୍କ ଘର କେଉଁଠି ପଚାରି ବୁଝିଥିଲେ । ଗାଁ ଲୋକେ ଶୁଭକେଶଙ୍କ ଘର ଠିକଣା ଦେଇଥିଲେ । ହଠାତ ଦୁଇ ଯୁବକ ଶୁଭକେଶଙ୍କ ଘରେ ପଶି ବାପା ଅରବିନ୍ଦ ମିଶ୍ରଙ୍କ ଉପରକୁ ଗୁଳି ଚଳାଇ ଥିଲେ । ପରେ ଅରବିନ୍ଦଙ୍କ ପତ୍ନୀ ଓ ପୁଅ ଶୁଭକେଶଙ୍କ ଉପରକୁ ଗୁଳି ଚଳାଇଥିଲେ । ଅରବିନ୍ଦଙ୍କ ପତ୍ନୀ ମିନାକ୍ଷୀଙ୍କ ପାଦରେ ଗୁଳି ବାଜିଛି । ଶୁଭକେଶ ମଧ୍ୟ ଗୁଳି ମାଡରେ ସାମାନ୍ୟ ଆହତ ହୋଇଛନ୍ତି । ଗୁଳିକାଣ୍ଡ ଘଟାଇ ଯୁବକମାନେ ପଳାଇବାକୁ ଉଦ୍ୟମ କରୁଥିଲେ । ଗ୍ରାମବାସୀ ସେମାନଙ୍କୁ ଘେରାଉ କରି ଦୁଇ ଆତତାୟୀଙ୍କୁ କାବୁ କରି ନେଇଛନ୍ତି । ଆତତାୟୀ ଦ୍ବୟଙ୍କୁ ମହାକାଳପଡା ପୋଲିସ ହାତରେ ଜିମା ଦେଇଛନ୍ତି । ଆତତାୟୀମାନେ ଭୁବନେଶ୍ୱର ଅଞ୍ଚଳରୁ ଆସିଥିବା ଅନୁମାନ କରାଯାଉଛି । ଗତ ବର୍ଷ ଶୁଭକେଶ ଭୁବନେଶ୍ବରରେ ବିବାହ କରିଥିଲେ । ଏହି ଗୁଳିକାଣ୍ଡ ପଛରେ ଜମିବାଡି ବିବାଦ ଥାଇପାରେ ବୋଲି ସ୍ଥାନୀୟ ଲୋକେ କହିଛନ୍ତି ।
