ସାଧରଣ ଜନତାକୁ ସୁରକ୍ଷା ଯୋଗାଇବାର ଦାୟିତ୍ୱ ପୋଲିସର | ଯଦି ପୋଲିସ -ପୋଲିସ ମଧ୍ୟରେ ହୁଏ ମାରପିଟ ତେବେ କହିବା କାହାକୁ ? ଜଣେ ଥାନା ଅଧିକାରୀଙ୍କୁ ହୋଇଛି ଆକ୍ରମଣ | ପୁଣି ଥାନା ଗାଡି ଚଳାଉଥିବା ଡ୍ରାଇଭର କରିଛନ୍ତି ଏଭଳି ଆକ୍ରମଣ | ଗଣ୍ଡଗୋଳରେ ଥାନା ଅଧିକାରୀ ଆହତ ହୋଇଥିବା ମିଳିଛି ସୂଚନା। ଯାଜପୁର ଜିଲ୍ଲା ସୁକିନ୍ଦା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିସରରେ ଗତକାଲି ସନ୍ଧ୍ୟାରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି।
ସୂଚନା ମୁତାବକ ଥାନା ଡ୍ରାଇଭର ସୁକୁମାର ସ୍ୱାଇଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଥିଲେ | ଏହି ସମୟରେ ସୁକିନ୍ଦା ଥାନା ଅଧିକାରୀ ଶିବ ଚରଣ ବେହେରା ଡାକ୍ତରଖାନାରେ ପହଞ୍ଚି ଥିଲେ। ମିଛରେ ଡାକ୍ତରଖାନାରେ ଅଛୁ ବୋଲି ଅଭିଯୋଗ କରି ତାଙ୍କୁ ଓ ପରିବାର ଲୋକଙ୍କୁ ଗାଳିଗୁଳଜ କରିଥିଲେ। ଏହାକୁ ଡ୍ରାଇଭରଙ୍କ ସମ୍ପର୍କୀୟମାନେ ପ୍ରତିବାଦ କରିବାରୁ ସେମାନଙ୍କୁ ମଧ୍ୟ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଏହାକୁ ନେଇ ଡ୍ରାଇଭର ସୁକୁମାର ଓ ସମ୍ପର୍କୀୟଙ୍କ ସହିତ ଥାନା ଅଧିକାରୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏଥିରେ ଉଭୟ ଥାନା ଅଧିକାରୀ ଓ ଡ୍ରାଇଭର ଆହତ ହୋଇଛନ୍ତି। ଘଟଣା ସମ୍ପର୍କରେ ଖବରପାଇ କଳିଙ୍ଗ ନଗର ଅତିରିକ୍ତ ଏସପି ଘଟଣା ସ୍ଥଳରେ ପହଞ୍ଚି ତଦନ୍ତ କରିଛନ୍ତି। ଡ୍ରାଇଭରଙ୍କ ସମ୍ପର୍କୀୟଙ୍କୁ ଥାନାରେ ଅଟକ ରଖାଯାଇଛି।
